Jehoiadá sacerdotejj jan ajjsarirïnwa

Jezabelan phuchapajj Atalía satänwa. Jupajj mamapjam jan wali warmirakïnwa. Judá markan reyipampiw casarasirakïna. Uka reyejj jiwjjäna ukhajja, yoqapaw reyëjjäna. Jupas jiwjjarakïna ukhajja, Ataliaw marka apnaqjjäna. Apnaqaskakiñatakejj reyin wawanakaparu, khitinakatï jupa lanti reyïpkaspa ukanakaruw jiwarayäna. ¡Pachpa allchhinakaparus jiwayänwa! Ukatwa taqenejj wal ajjsarapjjäna.

Jehoiadá sat jachʼa jilïr sacerdotempi Jehoseba esposapampejja, Atalía warmin ukham jan walinak luratap yatipjjänwa. Ukatwa vidap aptʼasirjamäkasas Atalía warmin mä allchhipar imantapjjäna, uka wawajj Jehoás satänwa. Templonwa uywapjjäna.

Jehoás wawajj paqallqo maranejjäna ukhajja, Jehoiadá sacerdotejj guardianak pʼeqtʼirinakaru, levitanakaruw tantachthapïna. Jupanakar sarakïnwa: ‘Templon punkup uñjapjjam, janipun khitirus mantayanipjjamti’ sasa. Ukatjja Jehoiadá sacerdotejj Jehoás jiskʼa yoqallaruw reyïñapatakejj corona uchäna. Judá markankir jaqenakasti ‘¡reyejj walja maranak jakpan!’ sasaw artʼapjjarakïna.

Atalía reinajj jaqenakar arnaqasir istʼasajj temploruw tʼijüna. Machaq reyir uñjasajj ‘¡naya contraw saytʼapjje!’ sasaw arnaqasïna. Guardianakan pʼeqtʼirinakapajj uka jan wali warmiruw katuntapjjäna, anqar apasaw jiwayapjjarakïna. Uka warmejj Diosatwa markar jitheqtayäna, ¿kunas ukjjar pasäna?

Jehoiadá sacerdotejj Jehová Diosamp mä pacto lurapjjañapatakiw markar yanaptʼäna. Ukanjja jumarukiw adorapjjäma sasaw Diosar mä promesa lurapjjäna. Jehoiadá sacerdotejj Baal diosan templopsa, idolonaksa qʼal tʼunthapiyäna. Templon trabajipjjañapatakejj sacerdotenakampi levitanakamp uchäna. Ukhamat jaqenakajj Jehová Diosar wasitat adorjjapjjañapataki. Ukatjja Dios nayraqatan qʼañut uñjatäpki ukanakan templor jan mantapjjañapatakejj guardianak punkur uchäna. Jehoiadá sacerdotempi guardianak pʼeqtʼirinakampejj palacioruw Jehoás jiskʼa reyir apapjjäna, tronoruw qontʼayapjjarakïna. Judá markan jakasirinakajj wal kusisipjjäna. Ataliajj jiwatäjjänwa, Baal diosar adorañas janiw utj-jjänti, Jehová Dios saparukiw adorjjapjjäna. ¿Kunjamsa Jehoiadá sacerdoten jan ajjsarirïtapajj waljanir yanaptʼäna uk amuytati?