Josías reyejj Diosan Leyipar wal munasïna

Josiasajj kimsaqallqo maranikiw Judá mark apnaqañ qalltäna. Uka tiemponjja jaqenakajj magianakwa lurapjjerïna, idolonakaruw adorapjjarakirïna. Josiasajj 16 maranikïskäna ukhajja, kunjamsa Jehová Diosar adorasiñapa uk yatjjatañatakiw chʼamachasïna. 20 maranëjjasajj idolonaksa altaranakaps markpachanwa qʼal tʼunthapïna. 26 maranëjjäna ukhajja Jehová Diosan templop askichañatakiw wakichäna.

Hilquías sat jachʼa jilïr sacerdotejj templonwa Diosan Leyipani rollo jikjjatäna. Inas uka rollojj Moisesan qellqatächïna. Safán sat secretariopaw Josiasan ukar apasajj jachʼat liytʼarapïna. Josías reyejj wali amuyumpiw istʼäna, ukhamatwa israelitanakan walja tiempo Jehová Diosar jan istʼapjjatap amuyäna. Ukatjja Hilquiasarojj akham sarakïnwa: ‘Jehová Diosajj jiwasatak wali coleratawa. Mirä amp suma, kun lurañassa jupajj muni uk jisktʼanim’ sasa. Jehová Diosajj Huldá sat profetisarojj akham sänwa: ‘Judá markarojj nayar apanukutapatwa castigäjja, ukampis janiw jichhajj uk lurkäti, Josiasan humilde reyïtap layku’ sasa.

Josías reyejj uka arunak istʼäna ukhajja, templor sarasaw Judá markpach tantachthapïna. Ukatjja Jehová Diosan Leyipwa markpachatak jachʼat liytʼarapïna. Josiasampi Judá markampejj Diosar taqe chuyma istʼañatakiw mä promesa lurapjjäna.

Walja maranakaw Judá markan Pascua urojj jan amtasjjänti. Ukampis Josías reyejj sapa maraw Pascuajj amtasiñapa sasaw Diosan Leyipan liytʼäna, ukatwa markar akham säna: ‘Jehová Diosatakejj mä fiesta lurañäni, Pascua amtañäni’ sasa. Josiasajj walja sacrificionak wakichapjjañapatakiw mayïna, ukhamarak templon cantapjjañapatakejj mä coro utjañapwa mayirakïna. Ukhamwa Pascua fiesta amtapjjäna, ukatjja Jan Levaduran Tʼantʼa Manqʼañ Fiestampwa amtapjjarakïna, ukjja paqallq urunakaw fiestachapjjarakïna. Samuel profetajj jiwjjäna uka tiempotpachwa Pascuajj jan ukham fiestachasjjänti. Josiasajj cheqpachapuniw Diosan Leyipar munasïna. ¿Jumarojj Jehová Diosat yateqañajj gustaraktamti?