Diosan Reinopajj wiñayatakïniwa

Mä arumajja, Nabucodonosor reyejj mayj samkasïna. Samkapajj wal llakisiyäna, janiw ikiñsa puedkänti. Reyejj magia luririnakar jawsasaw akham säna: ‘Samkajajj kamsañs muni uk qhanañchapjjeta’ sasa. Jupanakajj sapjjänwa: ‘Jachʼa rey, kunsa samkasta uk awisapjjeta’ sasa. Reyisti sarakïnwa: ‘¡Janiwa! Jumanak kunsa nayajj samkasta uk yatiyapjjeta. Jan sapkitätajj jiwarayapjjämawa’ sasa. Wasitat magia luririnakajj akham sapjjäna: ‘Kunsa samkasta uk yatiyapjjetäta ukhakiw kamsañsa samkamajj muni uk yatiyapjjerisma’ sasa. Reyisti sarakïnwa: ‘Jumanakajj engañjañ munapjjestajja. ¡Kunsa nayajj samkasta uk yatiyapjjeta!’ sasa. Jupanakajj sapjjarakïnwa: ‘Aka oraqenjja, janiw khitisa kuntï mayipkista uk lurkaspati’ sasa.

Nabucodonosor reyejj wali coleratänwa, yatiñan taqe jaqenakar jiwarayasiñapwa mayirakïna. Daniel, Sadrac, Mesac, Abednego waynanakarus jupanakamp chikwa jiwayapjjañapäna. Ukampis Danielojj tiempwa reyir mayïna. Ukatsti jupampi amigonakapampiw Jehová Diosar yanaptʼa mayisipjjäna. ¿Kunsa Diosajj lurpachäna?

Diosajj mä visionanwa Nabucodonosor reyin samkap Danielur uñachtʼayäna, kamsañsa muni uks yatiyarakïna. Qhepürusti, Danielojj reyin serviripamp parliriw saräna, akham sarakïnwa: ‘Yatiñan jaqenakarojj jan jiwarayapjjamti. Nayaw reyin samkap qhanañchäjja’ sasa. Ukatsti jupajj Nabucodonosor reyin ukaruw Danielor irpäna. Danielojj reyir akham sänwa: ‘Diosaw kunas jutïrin pasani uk yatiytamjja. Akhamwa samkastajja: jumajj jaqer uñtata mä jachʼa estatua uñjtajja, pʼeqepajj qoritänwa, pechopasa amparanakapasa qollqe metalatänwa, purakapampi lankhu charanakapampejj cobretänwa, chikat charapajj hierrot luratänwa, kayunakapasti hierrompi ñeqʼempi mezclatänwa. Ukatjja mä jachʼa qalaw mä qollut estatuan kayupar wali chʼamamp purïna. Ukhamatwa estatuajj qʼala tʼunjatäjjäna, thayaw uka polvonak qʼal apasjjarakïna. Uka qalasti mä jachʼa qollur tukusaw oraq phoqantarakïna’ sasa.

Danielojj saskakïnwa: ‘Samkamajj ak sañ muni: reinomajj qori pʼeqempi sasiwa. Qollqe metaläki ukasti jumjjar apnaqkani uka reinowa. Cobrëki ukajj ukjjar apnaqkani uka reinowa, oraqpachwa jupajj apnaqarakini. Ukjjarusti hierror uñtata wali chʼaman reinow apnaqani. Tukuyarojj jaljtat mä reinow utjani, mä qhawqha partejj hierror uñtat wali chʼamanïniwa, mä qhawqha partesti ñeqʼer uñtat jan chʼamanirakïniwa. Qollur tukki uka qalajj Diosan Reinopawa, jupajj taqe reinonakaruw tukjani, wiñayatakiw apnaqarakini’ sasa.

Nabucodonosor reyejj Daniel nayraqataruw qonqortʼasïna, oraqer puriñkamaw altʼasïna, akham sarakïnwa: ‘Diosamaw samkaj qhanañchtamjja. Janiw jupjam yaqha diosajj utjkiti’ sasa. Nabucodonosor reyejj Danielur jiwayañat sipansa, yatiñani jaqenakar pʼeqtʼañapataki, Babilonian mä apnaqerïñapatakiw uttʼayäna. ¿Kunjamsa Jehová Diosajj Danielon oracionap istʼäna uk amuytati?