Ester reinajj markaparuw salväna

Esterajj judía tawaqönwa, Persia oraqen Susa sat markanwa jakäna. Walja maranak nayrajja, Nabucodonosor reyiw familiaparojj Jerusalén markat apäna. Juparojj Mardoqueo primopaw uywasïna. Mardoqueojj Persia markan Asuero reyin serviripänwa.

Asuero reyejj mä machaq reina munäna. Ukatwa servirinakapajj markan utjkäna uka suma uñnaqtʼani warminak reyin ukar irpapjjäna, Ester tawaqorus irpapjjarakïnwa. Taqe uka warminak taypitjja, reyejj Esteraruw reinäñapatak ajllïna. Mardoqueojj ‘janipuniw khitirus judiätam arsütati’ sasaw Esterar sarakïna.

Uka markanjja jachʼa jachʼa tukuri Hamán sat mä jaqew utjäna, jupajj taqe jilïr jaqenakan jefepänwa. Taqeni jupa nayraqatan altʼasipjjaspa ukwa munäna. Ukampis Mardoqueojj janiw uk lurañ munkänti. Ukatwa Hamán chachajj jupatak wal coleräna, jiwayañ munarakïna. Kunapachatï Mardoqueon judiötap yatïna ukhajja, taqe judionakar jiwarayañwa amtäna. Reyirojj akham sarakïnwa: ‘Judionakajj jan walinwa uñjasiyistaspa, jiwarayañaw wakisispa’ sasa. Asuero reyejj sänwa: ‘Kunatï jumatakejj waljamäki uk luraskakim’ sasa. Mä ley apsuñapatakiw permiso churarakïna. Uka leyinjja, ‘13 de adar urunwa taqe judionakar jiwarayasiñapa’ sasaw säna. Ukampis taqe ukanakjja Jehová Diosaw sum uñjaskäna.

Esterajj janiw uka leyit yatkänti. Ukatwa Mardoqueojj mä copia akham sasin apayäna: ‘Reyimp parlir sarañamawa’ sasa. Esterajj akham sänwa: ‘Jan jawsatäkas reyin ukar saririrojj jiwayapjjewa. Reyejj 30 urunakaw jan jawsjjetuti. Ukampis saräwa. Reyitï qorit lurat cetrop naya toqer aytaninejj jakaskäwa, jan ukhamäkanejj jiwayapjjetaniwa’ sasa.

Esterajj reyin ukar saräna ukhajja, reyejj Ester toqeruw qorit lurat cetrop aytäna. Ester reinajj jakʼachasïna ukhajja, reyejj akhamwa jisktʼäna: ‘Ester, ¿kunsa munta?’ sasa. Esterajj akham sänwa: ‘Nayajj manqtʼasiñatakiw jumampir Hamán chachampir invittʼañ munapjjsma’ sasa. Ukar sarapjjäna ukhajja, yaqha manqʼäwiruw Esterajj invittʼarakïna. Ukanjja wasitampiw reyejj ‘Ester, ¿kunsa munta?’ sasin jisktʼäna. Esterajj akham sänwa: ‘Mä jaqew nayampiru markajampir jiwarayañ munapjjetu. Mirä amp suma, salvasipjjakitaya’ sasa. Reyisti sarakïnwa: ‘¿Khitis jiwayañ muntam?’ sasa. Reinasti sarakïnwa: ‘Aka jan wali Hamán jaqew jiwayañ munapjjetu’ sasa. Asuero reyejj wal colerasïna, ukaratpachaw Hamán chachar jiwayapjjañapatak mayirakïna.

Hamán chachajj ley apskäna ukjja, janiw khitisa ni reyis chhaqtaykaspänti. Ukatwa reyejj Mardoqueo chachar jilïr jaqenakan jefepat uttʼayäna, juparojj yaqha ley apsuñapatakiw permiso churarakïna. Uka machaq leyirjamajja, judionakajj jiwayañ munatajj jarkʼaqasiñ puedipjjaspänwa. 13 de adar urunjja, judionakajj enemigonakapar atipapjjänwa. Sapa maraw ukham atipapjjatap amtapjjerïna.