Jerusalén markan murallanakapa

Mä qhawqha maranak nayrar kuttʼañäni. Persiankir Susa markanjja Nehemías sat mä israelitaw jakäna. Jupajj Artajerjes reyin serviripänwa. Mä urojja Nehemiasan jilapaw Judá oraqet jan wali yatiyäw puriyäna, akham sänwa: ‘Jerusalenar kuttʼir israelitanakajj janiw jarkʼaqatäpkiti. Babilonionakan allthapit murallanakasa punkunakas janïraw askichatäkiti’ sasa. Nehemiasajj wal llakisïna, yanaptʼañwa munarakïna, ukatwa Diosar akham mayisïna ‘reyejj Jerusalenar khitakitaspa’ sasa.

Qhepatjja reyejj Nehemiasar llakit uñjasajj akham sänwa: ‘Janipuniw ukham llakit uñjirïksmati. ¿Kunas pastam?’ sasa. Nehemiasajj sarakïnwa: ‘Jerusalén markajajj qʼala tʼunjatawa, ¿kunjamarak jan llakiskästi?’ sasa. Reyejj ‘¿kunjamsa yanaptʼirisma?’ sasaw jisktʼäna. Uka ratojj chuyma manqhanwa Nehemiasajj ortʼasïna. Ukat akham sänwa: ‘Mirä amp suma, murallanakap mayamp lurañatak Jerusalenar khitita’ sasa. Artajerjes reyejj sarañapatakiw permiso churäna. Jerusalenar sarkasin jan kuna jan walis pasañapatakiw yanaptʼarakïna. Ukatsti Judá markan gobernadorat serviñapatakiw uttʼayarakïna, Jerusalenan punkunakap lurañatakis maderanakwa churarakïna.

Nehemías chachajj Jerusalén markar purïna ukhajja, murallanakap uñjiriw saräna. Ukatsti sacerdotenakaru, marka apnaqerinakar tantachthapisaw akham säna: ‘Jan waltʼañanwa uñjastanjja. Markan murallanakap saytʼayañasawa’ sasa. Markankirinakajj walïspawa sasaw sapjjäna, ukatjja murallanak mayamp lurañwa qalltapjjäna.

Yaqhep enemigonakapajj israelitanakat burlasipjjänwa, akham sapjjarakïnwa: ‘Lurasipkta uka muralljja, mä qamaqes allthapispawa’ sasa. Ukampis israelitanakajj jan yäqasaw lurasipkakïna. Ukhamatwa murall jachʼaptayasipkakïna, sum saytʼayapjjarakïna.

Ukatsti walja cheqanakatwa enemigonakapajj mä akatjamat israelitanakar nuwantañatak sarañ amtapjjäna. Uk yatisajja judionakajj ajjsarapjjänwa. Ukampis Nehemiasajj akham sänwa: ‘Jan ajjsarapjjamti. Jehová Diosaw jiwasampïski’ sasa. Ukatjja trabajirinakar jarkʼaqañatakejj guardianakwa uchäna. Ukhamatwa enemigonakapajj jan kamachapkänsa.

Markan murallapas punkunakapas, 52 urunakanakwa tukuyatäjjäna. Uk fiestachañatakiw Nehemiasajj levitanak Jerusalenar irptanïna. Ukatsti cantapjjañapatakiw pä grupor jaljäna. Esdrasajj mä grupompiw saräna, Nehemiasasti mayni grupompiw sararakïna. Murall patjjar makatasaw mä grupojj maysnama, mayni grupojj maysnamarak mark muytapjjäna. Trompetanak tuktʼasisa, címbalo sat instrumentonaka, arpanak tuktʼasisaw, Jehová Diosatak canttʼasis sarapjjäna, templor puriñkama. Chachanakasa, warminakasa, wawanakas taqeniw sacrificionak Jehová Diosar churapjjäna, wal fiestachapjjarakïna. Wali kusisitäpjjänwa, cantapjjatapas wali jayaruw istʼasïna.