Uma waytasir warmiruw predicäna

Pascuajj tukuyjjäna uka qhepatjja, Jesusampi discipulonakapampejj Galilea toqeruw kuttʼapjjäna. Ukar sarkasajj Samaria oraqnamwa pasapjjäna, Sicar sat marka jakʼankir Jacobun uma phujuparuw puripjjäna. Discipulonakapajj manqʼa alir sarapjjañapkamajja, Jesusajj uka phuju jakʼaruw samartʼañatak quedasïna.

Mä warmiw um apsur jutäna, Jesusajj “umay wajjtʼita” sasaw jupar säna. Warmejj sarakïnwa: ‘Nayajj samaritana warmïtwa, ¿kunatsa parlista? Judionakajj janiw samaritanonakampi parlapkiti’ sasa. Jesusajj sänwa: ‘Nayajj khitïtsa uk yatisma ukhajja, jumaw um mayitasma, nayajj jakañ churir uma churirisma’ sasa. Warmejj akham jisktʼäna: ‘¿Ukampejj kamsañsa munta? Janirakis um waysuñatakejj kunamas utjkitejjä’ sasa. Jesusajj sänwa: ‘Nayajj churkta uka uma umtʼirejj janiw wasitat pharjayaskaniti’ sasa. Warmejj sarakïnwa: ‘Tata, uka umay churita’ sasa.

Ukatjja Jesusajj ‘esposomar jawsanim’ sasaw säna. Warmisti sarakïnwa: ‘Janiw esposonïkti’ sasa. Jesusajj sänwa: ‘Cheq parlasktajja, jumajj phesqa kutiw casarastajja, jichhajj jakaskta uka chachampejj janiw casaratäktati’ sasa. Uk istʼasasti warmejj sänwa: ‘Jumajj profetäpachätawa. Markajanjja, aka qollunsa Diosar adoraksnawa sasaw sapjje, ukampis judionakajj Jerusalenanakwa Diosar adorasiñapa sasaw sapjje. Mesiasajj jutkani ukhakiw kunjamsa Diosar adorasiñapa uk yatichapjjetani’ sasa. Jesusajj sarakïnwa: ‘Nayaw Mesiasätjja’ sasa, ukjja janiw khitirus sirïkänti.

Ukatwa warmejj markapar tʼijüna, samaritanonakar akham sänwa: ‘Mä jaqejj kunanaktï nayajj lurkta ukjja, taqpachwa situ, Mesiasäpachawa. Jutapjjam uñjanipjjam’ sasa. Jaqenakajj jupamp chikaw Jesusar istʼirejj uma phujur sarapjjäna.

Samaritanonakajj markapar quedasiñapatakiw Jesusar mayipjjäna. Pä uruw Jesusajj ukan quedasïna, waljanakwa jupanakar yaticharakïna, waljaniw Jesusar creyipjjäna. Samaritana warmir akham sapjjänwa: “Nanak pachpaw istʼapjjta, yatipjjarakta, cheqpachansa jupajj akapach salviriwa” sasa.