Jesusajj walja milagronak luräna

Jesusajj Diosan Reinopat suma yatiyäwinak yatiyiriw aka oraqer jutäna. Jehová Diosajj milagronak lurañapatakiw Jesusar espíritu santo churäna, ukhamat Reyëjjäni ukhajj uk uñachtʼayañapataki. Amuytʼañäni, Jesusajj kunayman usunak qollañatak chʼamanïnwa. Taqe cheqanwa usutanakajj ‘qolltʼitaya’ sasin ruwtʼasipjjerïna, jupasti taqeniruw qollarakïna. Juykhunakajj uñjapjjänwa, oqaranakajj istʼapjjänwa, jan sartirinakas sartapjjänwa. Jesusan isip llamktʼasas qollasipjjakïnwa. Ukhamarakiw Jesusajj demonionak alissüna. Jaqenakajj taqe cheqaruw Jesusar arkapjjerïna, jupajj taqeniruw yanaptʼäna, sapakïñ munkäna ukhas yanaptʼaskakïnwa.

Mä kutejja Jesusajj kawkïr utankkäntï ukaruw mä suchu jaqer apanipjjäna. Wali phoqätap laykojj janiw mantañjamäkänti. Ukatwa uta techo jararapjjäna, uknam apantasaw Jesusan ukar puriyapjjarakïna. Jesusasti ‘sarthapim sarnaqarakim’ sasaw säna. Suchu jaqer sarnaqer uñjasajja, jaqenakajj wal musparapjjäna.

Yaqha urojja Jesusajj mä jiskʼa markar puriskäna ukhaw lepra usuni tunka chachanakajj ‘¡Jesús, khuyaptʼayasipjjeta!’ sasin arnaqasipjjäna. Uka tiemponjja, lepra usuninakajj janiw jaqenakar jakʼachasipjjañapäkänti. Leyirjamajja lepra usuninakajj qollatäjjasakiw templor sarapjjaspäna. Jesusajj ‘templor sarapjjam’ sasaw jupanakar säna. Ukar sarkasaw qollatäjjapjjäna. Jupanakat maynejja, qollatäjjatap amuyasisajj Jesusar yuspärañataki ukhamarak Diosar jachʼañchañatakiw kuttʼanïna. Uka tunkanitjja maynikiw Jesusar yuspäräna.

Mä warmejj 12 maranakaw usutäjjäna, jan aguantirjamäsajj qollatäñ wal munäna. Ukatwa jaqenak taypir mantäna, Jesusar qhepäjjat jakʼachasisaw isip llamktʼäna. Ukaratpachaw qollatäjjarakïna. Jesusajj ‘¿khitis llamktʼitu?’ sasaw säna. Warmejj wal sustjasïna, Jesusar jakʼachasisajj kunatï paskäna uk taqpach awisäna. Jesusajj akham sasaw chuymachtʼäna: ‘Wawa, sumak sarjjam’ sasa.

Sinagogan pʼeqtʼiri Jairo sat chachajj akham sasaw Jesusar ruwtʼasïna: ‘Utajar sarañäni. Imill wawajaw wali usuta’ sasa. Ukampis Jairo chachan utapar janïr puripkäna ukhaw wawajj jiwjjäna. Puripjjäna ukhajja, walja jaqenakaw jiwatan familiapampi chikajj wal jachasipkäna. Ukatwa Jesusajj akham säna: ‘Jan jachapjjamti, uka wawajj ikiskiwa’ sasa. Ukatjja uka imill wawar amparat kattʼasaw akham säna: ‘Wawa, ¡sartam!’ sasa. Imill wawajj jankʼakiw sarthapïna, Jesusajj ‘manqʼa churapjjam’ sarakïnwa. ¡Tatapampi mamapampejj walpun kusisipjjpachäna!