Jesusajj walja jaqenakaruw manqʼayäna

Pascuajj 32 maran janïr purinkäna ukhajja apostolonakajj predicacionatwa kuttʼasinipkäna. Wali qaritäpjjänwa, ukatwa Betsaida markan samartʼapjjañapatakejj mä botet Jesusajj irpäna. Botet waña oraqer puripjjäna ukhajja Jesusajj walja jaqenakaruw uñjäna. Uka jaqenakajj Jesusaruw uka lugarkam arkanipjjäna. Jesusajj apostolonakapampiw samartʼañ munäna, ukampis munasiñampiw taqe jaqenakar katoqäna. Usutanakaruw qolläna, Diosan Reinopatwa jornalpach yaticharakïna. Jaypʼöjjäna ukhajja apostolonakajj Jesusar akham sapjjänwa: ‘Jaqenakar manqʼatwa awtjpacha. Manqʼ alasir sarjjapjjañapatak khitjjam’ sasa.

Jesusasti sarakïnwa: ‘Janiw sarapjjañapajj wakiskiti. Antisas jumanak mä qhawqha manqʼ churapjjam’ sasa. Apostolonakajj akham sasaw Jesusar jisktʼapjjäna: ‘¿Jupanakatak tʼantʼa alir sarapjjañajti munta?’ sasa. Felipe sat apostolojj akham sänwa: ‘Walja qollqenïksna ukhasa janiw ukhataq jaqenakatak tʼantʼa alanksnati’ sasa.

Jesusajj akham sasaw jisktʼäna: ‘¿Qhawqha manqʼas utjistu?ʼ sasa. Andresojj sänwa: ‘Phesqa tʼantʼampi pä jiskʼa chawllampikiw utjistu, janiw ukajj alcanzkaspati’ sasa. Jesusajj sarakïnwa: ‘Uka tʼantʼampi chawllamp aptanipjjam’ sasa. Ukat jaqenakarojj grup grupo qonurayäna, sapa gruponjja phesqa tunkani jan ukajj patakaniw utjäna. Jesusajj tʼantʼamp chawllamp aptasajj alajjpach uñtasaw mä oración luräna. Ukatsti apostolonakaparuw uka manqʼ churäna, ukhamat taqenir lakirapjjañapataki. 5.000 chachanakampi walja warminakampi wawanakampiw ukankapjjäna, taqeniw sistʼasiñkam manqtʼasipjjäna. Qheparojj jan inamay jaqtasiñapatakiw jiltʼanak 12 canastanakar apthapipjjäna. Uka milagrojj wali musparkañapunïnwa.

Taqeniw wal musparapjjäna, ukatwa Jesusarojj reyit uttʼayañ munapjjäna. Ukampis Jehová Diosajj janïraw Jesusan reyïñap munkänti. Jesusajj uk sum yatïna, ukatwa jaqenakarojj khitanukjjäna, apostolonakaparojj ‘Galilea qota khurkatar pasapjjam’ sasaw sarakïna. Apostolonakajj botetwa sarjjapjjäna, Jesusajj sapakiw qollur makatäna. ¿Kunatsa? Alajjpachankir Awkiparuw orasiñ munäna. Jesusajj janis tiemponïkchïnjja, orasiñatakejj tiempo apstʼasipunirïnwa.