Jesusajj uma patjjan sarnaqäna

Jesusajj janiw usutanakarukejj qollkänti, ni jiwatanakarukis jaktaykänti, jan ukasti thaysa jallsa tʼakurayänwa. Qollun orasiñ tukuyatarojja, Jesusajj Galilea qotaruw uñtäna, ukan thayaw wal sartäna. Apostolonakapajj thayamp jan apayasiñatakejj taqe chʼamampiw bote apañatak chʼamachasisipkäna. Ukatwa Jesusajj qollut saraqasajj boten ukar uma patjjnam saräna. Apostolonakapajj mä jaqer uma patjjan jutaskir uñjasajj wal sustjasipjjäna. Ukampis Jesusajj akham sänwa: “Nayäsktwa, jan ajjsarapjjamti” sasa.

Pedrojj akham sänwa: “Tata, jumästa ukhajja, uma patjjnam jutam sita” sasa. Jesusajj ‘jutam’ sasaw säna. Ukatwa Pedrojj botet saraqasajj wal thaytʼaniskäna ukhajj Jesusan ukar uma patjjnam saräna. Jesusar jakʼachasjjäna ukhajja, Pedrojj thayar uñtasajj wal ajjsarayasïna. Ukatwa umar jalantasajj ‘¡tata waysuta!’ sasin säna. Jesusajj amparat katthapisaw akham säna: ‘¿Kunatsa pächasta? ¿Janit Diosar confiykta?ʼ sasa.

Jesusamp Pedrompejj boteruw makatjjapjjäna, thayas ukaratpachaw tʼakurjjarakïna. ¿Apostolonakapajj kunjamas jikjjatasipjjpachäna uk amuytati? “Jumajj Diosan Yoqapäskapuntawa” sasaw sapjjäna.

Jesusajj janiw uka mä kutikejj thayjjar chʼamanïtap uñachtʼaykänti. Yaqha urojj apostolonakapampiw Jesusajj qota khurkatar botet sarasipkäna, Jesusajj bote qhepäjjanwa iktʼaskäna. Ukapachaw thayajj wal sartanïna. Oladanakajj boter wal jawqʼsüna, umas phoqantarakïnwa. Apostolonakajj jachʼat arnaqasisaw Jesusar sartayapjjäna: ‘¡Yatichiri, jiwarañäniwa! ¡Yanaptʼapjjeta!’ sasa. Jesusajja sartasajj akham sasaw qotar säna: “¡Amuktʼam! ¡Tʼakuram!” sasa. Ukaratpachaw thayas qotas tʼakurjjäna. Jesusajj apostolonakaparojj akham sasaw jisktʼäna: “¿Janit Diosar confiyapkta?” sasa. Jupanakajj maynit maynikamajj akham sasipjjänwa: “Thayas qotas arunakap istʼakirakisä” sasa. Jupanakatï Jehová Diosaru Jesusar confiyapjjaspänjja, janiw ajjsarayasipkaspänti ukwa apostolonakajj yateqapjjäna.