Pablompi Timoteompi

Timoteo waynajj Listra markankir congregacionanwa servïna. Tatapajj griego jaqënwa, mamapasti judía warmirakïnwa. Mamapajj Eunice satänwa, abuelitapasti Loida satarakïnwa. Jupanakaw Jehová Diosjjat Timoteorojj jiskʼatpach yatichapjjäna.

Kunapachatï Pablojj predicañatak payïr kutin Listra markar viajkäna ukhaw Timoteon wal chʼamachasitap uñjäna. Timoteojj wal jilat kullakanakar munasïna, wal yanaptʼañ munarakïna. Ukatwa Pablojj viajepan jupamp sarañapatak invittʼäna. Tiempompejja, suma yatichirïñapataki suma predikirïñapatakiw Pablojj Timoteor yaticharakïna.

Espíritu santow Pablompir Timoteompirojj irpäna. Mä arumajja Pablojj mä jaqeruw visionan uñjäna. ‘Macedoniar yanaptʼir jutam’ sasaw uka jaqejj säna. Ukatwa Pablompi, Timoteompi, Silasampi, Lucasampejj uka markar predikiri congregacionanak uttʼayir sarapjjäna.

Macedonian Tesalónica sat markapanjja walja chachanakampi warminakampiw cristianöjjapjjäna. Ukampis yaqhep judionakajj Pablotsa jupamp chik sarir mayni cristianonakatsa wal envidiasipjjäna. Ukatwa walja jan wali jaqenakar tantachthapipjjäna, marka apnaqerinak nayraqataruw uka jilatanakarojj qatatipjjarakïna. Akham sasaw uka judionakajj arnaqasipjjäna: ‘¡Aka jaqenakajj Roma marka gobiernopan enemigonakapäpjjewa!’ sasa. Pablorus Timoteorus jiwayañwa munapjjäna, ukatwa arumajj Berea markar escapjjapjjäna.

Berea markankir jaqenakajj Diosan suma yatiyäwinakap wal istʼañ munapjjäna, walja griegonakampi judionakampiw creyentëjjapjjäna. Ukhamaruw yaqhep judionakajj Tesalónica markat jan waltʼayiri jutapjjäna. Ukatwa Pablojj Atenas markar sarjjäna. Timoteompi Silasampejj Berea markanwa jilat kullakanakar chʼamañchañatak quedasipjjäna. Tiempompejja, Pablojj Tesalónica markaruw Timoteor khitäna, ukhamat uñisiñat arknaqatäpkäna uka jilat kullakanakar aguantañ yanaptʼañapataki. Qhepatjja, yaqha congregacionanakar visitañapataki chʼamañchañapatakiw Timoteor khitarakïna.

Pablojj akham sasaw Timoteor säna: ‘Jehová Diosar serviñ munirinakajj arknaqataw uñjasipjjani’ sasa. Timoteojj arknaqataw uñjasïna, Diosar creyitap laykojj carcelar llawintataw uñjasirakïna. Ukhaman uñjaskasas jupajj wali kusisitänwa, ukham aguantasaw Jehová Diosar taqe chuym servitap uñachtʼayäna.

Pablojj akham sasaw Filipos markankirinakar säna: ‘Timoteoruw khitanipjjäma. Jupaw cheqa thakin sarnaqañsa predicañsa yatichapjjätam’ sasa. Pablojj Timoteor wal confiyäna. Walja maranakaw Diosar servipjjäna, wali suma amigöpjjarakïnwa.