Cuerpo Gobernanten cartapa

Munat jilat kullakanaka:

Jehová Diosar servirinakapjamajja, Bibliar wal munastanjja. Biblian yatichäwinakapajj cheqapawa, ewjjtʼanakapas sum jakasiñatakiw yanaptʼistu, qhawqsa Jehová Diosajj jaqenakar munasi uksa qhanañcharakistuwa (Salmo 119:105; Lucas 1:3; 1 Juan 4:19). Nanakajj Diosan Arupan utjki uka suma yatichäwinak mayninakan yateqapjjañapwa munapjjtjja. Uka amtampiw Biblian yatichäwinakap yateqañäni sat libro wali kusisit yatiyaniñ munapjjsma. Aka librojj kunjamasa uk mä qhawqha qhanañchtʼapjjäma.

Aka librojj wawanakar yatichañatak luratawa. Ukampis Bibliat jukʼamp yateqañ munir jilïr jaqenakarus yanaptʼarakispawa. Niyakejjay Bibliajj taqenitakïchejja, kuna suma yatichäwinakas Biblian utji uk amtañajj taqeniruw kusisita sum jakasiñatak yanaptʼistani.

Diosajj jaqer lurkäna ukat aksarojj kunjamsa jaqenakajj jakapjjäna ukanakatwa aka librojj Bibliarjam yatichistu. Akan utjki uka yatichäwinakajj taqenitak fácil amuykañäspa qhanäspa ukatakiw chʼamachasipjjta. Kunas nayraqat pasäna, kunas ukjjar pasarakïna ukarjam lurañatakiw chʼamachasipjjarakta.

Ukampis aka librojj janiw Bibliat aleqak cuentkiti, jan ukasti jaqenakajj kunjam chuymanïpjjänsa, kunanaksa lurapjjäna ukanak jiwas pachpas uñjksna ukham amuyañasatak qellqatawa, dibujonakas ukatakiw yanaptʼarakistu.

Biblianjja khitinakas Jehová Diosar istʼapjjäna, khitinakas jan istʼapkarakïna ukanakatwa parli. Ukat kunanaksa uka jaqenakat yateqsna ukanak amuyañatakiw aka librojj yanaptʼistu (Romanos 15:4; 1 Corintios 10:6). Aka librojj 14 seccionar jaljatawa. Sapa sección qalltanjja, mä qhawqha arunakampiw kunanaksa yateqsna ukajj qhanañchasi.

Jumatï wawanakanïstajja, mä temat liytʼasajj dibujonakatwa wawanakamamp parltʼapjjasma. Ukjjarojj kawkïr textonakat apstʼatasa ukwa Bibliat liytʼapjjarakisma. Wawamarojja aka libron utjki uka yatichäwinakajj Bibliat apstʼatätap amuyañapatakiw yanaptʼañama. Mä jilïr jaqerojja, ukhamarakiw Biblian yatichäwinakap amuytʼañapatakejj yanaptʼasirakispa.

Suma chuyman wayn tawaqonakasa jilïrinakas Bibliat yateqapjjaspa, ukan utjki uka yatichäwinakarjam sarnaqapjjarakispa ukwa munapjjta, ukatwa yanaptʼañatakejj aka libro qellqanipjjta. Ukhamat suma chuymani jaqenakajj Jehová Diosar adorapjjañapataki, ukhamarak Diosan munat familiap taypinkapjjañapataki.