Munasir Diosat janipun jitheqtañäniti

1, 2. Munasir Diosat jan jitheqtañatakejj ¿kunas wakisi?

TAQENIW chʼamani jan usuntasa jakasiñ muntanjja, ukatwa sum alimentastanjja, ejercicionaksa lurtanjja, cuerpossa cuidasiraktanjja. Ukham lurañajj chʼamäkchisa, wal yanaptʼistu. Ukampis janiw uka toqetak llakisiñasäkiti, jichhajj kunansa chʼamañchtʼatäñasa kunansa walïskañasa uka toqetwa yatjjataskañäni.

² Jehová Diosar uñtʼañatakejj kunanakas wakisi uk lurjjstansa, Diosan suma amigopäñatakejj chʼamachasiskakiñasawa. Jesusan Judas sat discipulopajja, ‘Diosan wali munat jakasiskakiñatakejj’ kunas wakisi uk akham sasaw qhanañchäna: “Jumanakajj wali santo yatichäwinakampi chʼamañchtʼasisipkakim” sasa (Judas 20, 21). ¿Kunjamsa uk lursna?

DIOSAR CONFIYAÑATAK CHʼAMACHASISKAKIÑÄNI

3-5. 1) Diosan mayitanakapat ¿kunjam amuyañassa Supayajj muni? 2) ¿Kunjamsa Diosan leyinakaparus wiñay yatichäwinakaparus uñjta?

³ Jehová Diosar istʼañajj wali wakiskiriwa, janiw ukat pächasiñasäkiti. Jehová Diosan mayitanakaparjam sarnaqañajj wali chʼamäkaspasa, kunatï walïki kunatï jan walïki uk jiwas pachpa amtasas jukʼamp kusisit jakasksna, ukham amuyañaswa Supayajj muni. Jaqenakajj aka oraqen utj-jjäna ukhatpachwa ukham amuyapjjañap munäna (Génesis 3:1-6). Supayajj jichhakamaw ukham amuyañasatak chʼamachasiskaki.

⁴ ¿Supayan uka amuyupajj cheqäpachati? ¿Diosan mayitanakap phoqañajj sinti chʼamäpachati? Janiwa. Mä suma lugarar paseytʼiris sarkasma ukham sañäni. Mä cheqar mantañatakejj alambret lurat mä jachʼa uyu jarkʼiristam ukhajja, inas akham sischisma: “Kunatakis akham uyuntayapjjpacha” sasa. Akatjamat mä leonar warartatir istʼasajj ¿ukham saskakismati? Jan ukajj ¿“waljjay uyuntayapjjchi” sasmacha? Uka uyu jan utjkaspa ukhajj leonajj manqʼantiristamwa. Jehová Diosan yatichäwinakapajj uka uyur uñtasitawa. Supayasti uka leonar uñtasitarakiwa. Biblian akham sistuwa: “Wali amuyumpipun sarnaqapjjam, amuyasipjjarakim. Jumanakar uñisir Diablojja, mä leonar uñtataw warartʼasis muyuski, maynir manqʼantañwa thaqaskaraki” sasa (1 Pedro 5:8).

⁵ Jehová Diosajj sum jakasiñaswa muni. Janiw Supayan engañjatäñas munkiti, ukatwa jan walinakat jarkʼaqasiñasatakisa kusisitäñasatakisa, leyinakapa wiñay yatichäwinakapa churistu (Efesios 6:11). Santiagojj akham sänwa: “Libre jakañ churirïki, perfectökaraki uka ley maynejj wali amuyumpi uñakipchi, chuymapsa ukar churarakchejja [...] kusisiniwa” sasa (Santiago 1:25).

6. Istʼasirïñajj wali wakiskirïtap amuyañatakejj ¿kunas yanaptʼistani?

⁶ Jehová Diosar istʼasajj sumaw jakastanjja, jukʼampiw juparus jakʼachastanjja. Amuytʼañataki, Diosan mayitaparjam sapa kuti orasiñajj wal yanaptʼistu (Mateo 6:5-8; 1 Tesalonicenses 5:17). Diosan mayitaparjam tantachastan, maynit maynikamas chʼamañchastan, predicañatakis Bibliat maynir yatichañatakis chʼamachastan ukhajja, wal kusistanjja (Mateo 28:19, 20; Gálatas 6:2; Hebreos 10:24, 25). Ukanak lurañajj kunjamsa yanaptʼawayistu uk amuyasajj jukʼampiw Jehová Diosar confiytanjja, jupar istʼañajj kunja wakiskirisa ukjjatsa janiw pächasktanti.

7, 8. Jutïrin kunjamsa yantʼanakar saykatañäni ukjjat jan llakisiñatakejj ¿kunas yanaptʼistani?

⁷ Jachʼa yantʼanakan uñjasï ukhajj kamachäsa sasaw llakissna. Jumatï ukham llakisstajja, Diosan arunakap amtañamawa. Jupajj akham siwa: ‘Nayaw juman Jehová Diosamätjja, nayajj kunatï jumar yanaptʼkiristam ukwa yatichsma, kawki thaktï sarañamäki uknam irparaksma. ¡Mandamientonakajaruk istʼasma! Ukapachajj sumankañamajj jawirar uñtasitäspawa, cheqapar sarnaqatamas lamar qotan oladanakapjamäspawa’ sasa (Isaías 48:17, 18, NM).

⁸ Jehová Diosar istʼañäni ukhajja, kunjamtï jawiran umajj sarkejja, ukhamarakiw chuymasan sumankañajj jan tukuskaniti. Ukatjja kunjamtï oladanakajj waña oraqer sapa kuti mistunkejja, ukhamarakiw cheqapar sarnaqatasajj wiñayatakïni. Kuna jan walin uñjaskasas Diosat janiw jitheqtkañäniti. Biblian akham siwa: “Diosar llakinakam katuyam, jupasti chʼaman tukuyätam, Diosar jaysirin aynachtʼañapjja, janipuniw jupajj munkaniti” sasa (Salmo 55:22).

‘JILÏR JAQER TUKUÑATAK CHʼAMACHASIÑÄNI’

9, 10. ¿Kunjamas mä ‘jilïr jaqejja’?

⁹ Jehová Diosan suma amigopäñatak chʼamachasiskakïta ukhajja, ‘jilïr jaqeruw tuküta’ (Hebreos 6:1). ¿Kunjamas mä jilïr jaqejja?

¹⁰ Janiw walja maranak pasipanjja “jilïr jaqer” tukktanti, jan ukasti Jehová Diosan suma amigopätan, jupjamarak amuytan ukhaw jilïr jaqëjjtanjja (Juan 4:23). Pablojj akham sasaw qellqäna: “Khitinakatï jañchin munañaparjam jakapki ukanakajja, jañchin munañanakapatak lupʼisipki. Khitinakatï espíritu santompi irpayasis jakapki ukanakasti, kunanakatï espíritu santotakejj walïki ukanakwa lupʼipjjaraki” sasa (Romanos 8:5). Mä cristianojj ‘jilïr jaqëjje’ ukhajja, janiw munañapampejj apayasjjeti, ni qollqempis apnaqayasjjeti. Antisas Jehová Diosar serviñatakiw chʼamachasi, suma amtanakaruw puriraki (Proverbios 27:11; Santiago 1:2, 3 liytʼañataki). Kunatï walïki uksa sum yati, kunatï walïki ukpun luraraki, ukatwa jan walinak lurayañ munapki ukhas jan iyawskiti.

11, 12. 1) ¿Kunatï walïki jan walïki ukanak amuytʼañ toqet apóstol Pablojj kamsänsa? 2) “Jilïr jaqer” tukuñasatakejj kunas wakisi uk amuytʼañatakejj ¿kuna uñachtʼäwis yanaptʼistu?

¹¹ ‘Jilïr jaqëñatakejj’ chʼamachasiñasawa. Pablojj akham sänwa: “Waña manqʼajja, jilïr jaqenakatakiwa, jupanakajj sapa kuti amuytʼjjasajja, kunatï walïki jan walïki ukanak amuytʼañjja yateqjjapjjewa” sasa (Hebreos 5:14). “Yateqjjapjjewa” siski ukajja, inas kunjamsa mä atletajj tʼijuñ yatsu uk amtaychistu.

¹² Mä suma tʼijurïñatakejj tiempompi chʼamachasiñampiw wakisi. Janiw tʼijuripuni nasktanti. Yamas nasktan ukhajja, janiw kaysa ni amparsa sum aytktanti. Tiempompiw sarnaqañsa kun aptañsa yateqasktanjja. Uka qhepatwa maynejj wal yatsusin mä atletar tukuski. Niya ukhamarakiw mä suma cristianor tukuñatakejj chʼamachasiñas tiempos wakisi.

13. ¿Kunas Jehová Diosjam amuyañatak yanaptʼistani?

¹³ Aka librojj kunjamtï Jehová Diosajj amuyki ukham amuyañataki, Diosan mayitanakapar respetompi munasiñampi uñjañatakiw yanaptʼawayistu. Jichhajja kun amtañatakis akham sasaw jisktʼastanjja: “¿Diosan kawkïr leyinakapasa kawkïr wiñay yatichäwinakapasa yanaptʼitaspa? ¿Kunjamsa ukanakarjam suma amtar puriristjja? ¿Kun lurañajsa Jehová Diosajj muni?” sasa (Proverbios 3:5, 6; Santiago 1:5 liytʼañataki).

14. ¿Kunsa Diosar confiyaskakiñatakejj lurañasa?

¹⁴ Jehová Diosar confiyaskakiñatakejj chʼamachasiskakiñasawa. Kunjamtï mä suma manqʼajj cuerpos chʼamañchkejja, ukhamarakiw Jehová Diosat yateqañajj jupar confiyañatak chʼamañchistu. Bibliat yateqañ qalltkayätan ukhajja, qallta yatichäwinakampi Diosan mayitanakapampi yateqayätanjja. Ukampis chʼamäki uka yatichäwinak yateqañasarakiwa. Ukatwa Pablojj akham sasin qellqäna: “Waña manqʼajja, jilïr jaqenakatakiwa” sasa. Yateqatarjam sarnaqktan ukhajja, yatiñan jaqeruw tukusktanjja. Biblianjja akham sistuwa: “Taqe kunat sipansa nayraqatajj, yatiñ [...] jikjjatam” sasa (Proverbios 4:5-7; 1 Pedro 2:2).

15. ¿Kunatsa Jehová Diosarus jilat kullakanakarus munasiñasa?

¹⁵ Mä jaqejj chʼamanïskañatakisa jan usuntañatakisa cuidasiñapawa. Mä cristianojj ukhamarakiw Jehová Diosan suma amigopäskakiñatakejj chʼamachasiñapa. Pablojj akham sänwa: “Jumanakajj cristianjamat jakasipkta janicha ukjja amuykiptʼasisipkakim, kunjam jaqëpjjtasa uksa uñakiptʼasisipkakim” sasa (2 Corintios 13:5). Ukampis janiw Diosar confiyañakejj wakiskiti, jan ukasti Jehová Diosaru jilat kullakanakaru munasiñaw jiltañapa. Pablojj akham sarakïnwa: “Nayatejj [...] taqe kun yatirista, qollunak onjjtayañatakis Diosar confiyatajajj wali jachʼarakïspa, ukampis janirak munasiñajj nayan utjkaspa ukhajja, janiw nayajj kunäkiristsa” sasa (1 Corintios 13:1-3).

DIOSAN ARUNAKAP PHOQASIÑAP SUYTʼASKAKIÑÄNI

16. ¿Supayajj kunjamäñassa muni?

¹⁶ Jan wali amuyunakajj jan waliruw apistaspa, Diosatsa jitheqtayistaspawa. Uk yatisaw Supayajj janipunis Jehová Diosar kusisiyksna ukham amuyañas muni. Llakimpi aynachtʼañas muni, problemanakasajj janis askichaskaspa ukham amuyañas munaraki. Janiw jilat kullakanakar confiyañassa, ni kusisit jakasiñassa munkiti (Efesios 2:2). Ukampis Diosaw mä yanaptʼa churistu: jutïrin sum jakasiñ suytʼañasatakiw chʼamañchistu.

17. ¿Kunatsa ‘salvación suytʼañajj’ wali wakiskirejja?

¹⁷ Soldadonakajj guerran pʼeqe jarkʼaqasiñatak casco uchasipkäna ukar uñtasitaw ‘salvación suytʼañajja’ sasaw 1 Tesalonicenses 5:8 texton qhanañchi. Diosan promesanakap suytʼañajja, amuyus jarkʼaqañataki jan wali amuyunak apanukuñatakiw yanaptʼistu.

18, 19. ¿Kunjamsa suytʼañajj Jesusar chʼamañchäna?

¹⁸ Jesusarojj promesanak suytʼañaw chʼamañchäna. Jiwayapkäna uka arumajja, Jesusajj kunayman jan walinakanwa uñjasïna. Mä amigopaw aljantäna. Yaqhasti jupar jan uñtʼiriw tuküna. Mayninakasti jupar jaytanukusaw escapapjjäna. Markapankir jaqenakajj jupa contraw saytʼapjjäna, tʼaqesiyas jiwayapjjañapatakiw autoridadanakar mayipjjarakïna. ¿Kunas aguantañatakejj Jesusar yanaptʼäna? Biblianjja akham siwa: “Jupajj nayraqatapan uskutäkäna uka kusisiñatwa mä tʼaqesiñ lawan jiwañkam aguantäna, phenqʼachatas uñjaskchïnjja janiw ukarojj yäqkänti, jichhajj Diosan tronopan kupëjjaparuw qontʼasi” sasa (Hebreos 12:2).

¹⁹ Jesusajja, jiwañkam aguantasajj Awkiparuw jachʼañchañapäna, Supayan kʼarïtapwa uñachtʼayañaparakïna. Ukanak phoqasiñap suytʼañaw Jesusar wal kusisiyäna. Mä jukʼatjja, Awkip ladoruw alajjpachar sarjjañapäna uk suytʼañajj ukhamarakiw aguantañatak yanaptʼäna. Jiwasajj Jesusatwa yateqasiñasa, kunatï jutïrin phoqaskani ukwa taqe chuyma suyañasa. Ukaw jan waltʼäwinakan aguantañ yanaptʼistani.

20. ¿Kunas Diosar suytʼaskakiñatakejj yanaptʼistani?

²⁰ Jehová Diosajj jupar confiyatamsa aguantatamsa sum yati (Isaías 30:18; Malaquías 3:10 liytʼañataki). Biblianjja siwa: “Jupasti chuyma manqheman mayisitamarjamaw churätam” sasa (Salmo 37:4). Ukhamajj Diosan promesanakap suytʼaskakim. Supayan jan wali amuyunakapampejj jan apayasimti, jupajj janiw Diosar suytʼañam munkiti, antisas Diosajj janis promesanakap phoqkaspa ukham amuyañamwa muni. Jumatï Diosan arunakap phoqasiñap jan nayrjam suyjjstajja, Diosar yanaptʼa mayisim. Filipenses 4:6, 7 textot amtañäni, ukan akham siwa: “Jan jumanakajj kunatsa llakisipjjamti, jan ukasti taqe llakinakamjja Diosaru oracionan yatiyapjjam, taqe chuym ruwtʼasisa yuspärasisa jupar oración lurapjjam. Diosaw sumankañapjja churapjjätam, uka sumankañapasti jaqenakajj kuntï amuyki ukat sipansa jukʼampiwa. Uka sumankañaw chuymanakamsa amuyunakamsa Cristo Jesús taypejj jarkʼaqapjjätam” sasa.

21, 22. 1) ¿Kunjamas machaq oraqen jakasjjañäni? 2) ¿Kunatakis jumajj chʼamachasïta?

²¹ Kunanak phoqasiñaptï suyasktan ukanakat lupʼipjjapuniñäni. Niyaw aka oraqenjja Jehová Diosar adoririnakak jakjjañäni (Apocalipsis 7:9, 14). Jutïrin jakasiñajj kunjamänisa uk amuyañasawa. Amuyktan ukat sipansa jukʼamp sumäniwa. Supayasa, demonionakasa, tʼaqesiñasa, usuntañasa, jiwañasa janiw utj-jjaniti. Ukat sipansa, sapüruw wali chʼamani kusisit sartañäni. Aka oraqe paraisor tukuyañatakis taqeniw mayachtʼat trabajiñäni, taqenitakiw suma manqʼas utjani, mä suma lugaran jakasirakiñäni. Jaqenakajj janiw jichhjam jan sinttʼasiri nuwasiri ukhamäjjapjjaniti, jan ukasti munasiñampiw uñjasipjjani. Tiempompejja, taqe jaqenakajj “Diosan wawanakapjamaw libre jakapjjarakini” (Romanos 8:21).

²² Jehová Diosajj juman suma amigomäñwa muni. Ukatwa taqe kunan jupar istʼañataki amigopäskakiñataki sapür chʼamachasiñama. Taqenis munasir Diosat janipun jitheqtañataki chʼamachasipjjañäni (Judas 21).