Wawanakar yatichañataki

Samuelux kunatï askïki ukpun lurirïna

¿JAN walinak luraskir uñjirïtati?a... Samuelusti uñjänwa, ukampis kawkhantï qamkäna ukanxa janiw jan walinakax lurasiñapäkänti. ¿Kuna chiqatsa parlasktanxa? Tabernáculo satäkis ukatwa parlasktanxa, mä arunxa Diosar yupaychañataki utat parlasktanxa, ukasti Siló markankänwa. ¿Uka tuqit jukʼampi yatxatañ munasmati? Ukat aksaruxa kimsa waranqa maranakäxiwa. ¿Kunatsa Samuelux tabernáculo satäkis ukan qampachäna?

Janïr Samuel utjkïpanxa, Ana sat mamapax mä wawanïñ wal munäna. Ukatwa tabernáculo satäkis ukar saräna, ukansti wawanïñatakiw Diosar wal mayisïna. Taqi chuymaw Diosat mayisïna, lakapakiw wal unuqiskäna. Ukatwa Elí sat jilïr sacerdotex umatäpachaw sas amuyäna. Ukampis janiw umatäkänti jan ukasti llakisiñat ukhamäskäna, uk Elí sacerdotex amuyxäna. Ukatwa akham säna: “Israelan Diosaparakiy jumarux kuntix maykta ukxa churpan” sasa (1 Samuel 1:17).

Tiempompisti Samuelux nasxänwa. Anasti walpun kusisïna, ukat Elqaná sat chachaparux akham säna: Samuelux mä jukʼampi jiltani ukhaxa tabernáculo satäkis ukan Diosar luqtañapatakiw jaytanxä sasa. Kunapachatï Samuelux niya phisqa maranixäna ukhaw mamapax tabernáculo satäkis ukarux irpxäna.

Uka tiempotakisti, Elí sat jilïr sacerdotex wali chuymankipstatäxänwa, Ofni ukat Finees sat yuqanakapax Jehová Diosar coleraykir jan walinakpun lurapxirïna. ¿Kuns lurapxirïna uk yattati? ¡Tabernáculo satakis ukar sarir warminakampiw qʼañu luräwinak lurapxäna! ¿Uk uñjasax kunsa tatapax lurañapäna?... Janiw ukhamaki uñchʼukiñapäkänti, ¿janich ukhamäkixa? Chiqpachansa uka wawanakapax chiqañchatäpxañapänwa.

Samuelux tabernáculo satäkis ukan jakirjamaxa kunanaktï Elí sacerdoten yuqanakapax lurasipkäna ukanakxa sum amuypachäna. ¿Samuelux jupanakjamarakiti jan walinak lurpachäna?... Janiwa. Jilkasaxa, kunanaktï awk taykapax yatichapkatayna ukarjamaw kunatï askïki ukanak lurirïna. Ukampisa Jehová Diosax taqi kun uñjaskäna. Ukat wali coleratänwa, ukatwa Elí ukar mä profeta khitäna, familiamaru ukat jukʼampis jan walinak luriri yuqanakamaruw juch uñtʼasiyä sas yatiyañapataki (1 Samuel 2:22-36).

Samuelusti Elí sacerdotempi chikaw tabernáculo satäkis ukan Jehová Diosar luqtaskakïna. Mä arumasti, ikkïpanwa mä aru jupar jawsaskiri istʼäna. Sacerdotïpachaw sasaw mäki saräna, sacerdotesti janiw nayax jawsksmati sarakïnwa. Mä jukʼampirusti uka pachparakiw pasäna. Kunapachatï kimsa kuti ukhamäxana ukhaxa Elí sacerdotex khitis jawsaskäna ukxa amuyxänwa. Ukatwa Samuelorux akham yatichäna: “Tatitutix jawsätamxa: ‘Parlaskakim, servirimax istʼasktamwa’ sasaw sata” sasa. Samuelusti istʼasïnwa ukat Jehová Diosax jupampiw parläna. ¿Kamsänsa uk yattati?...

Elí sacerdoten familiaparuw juchap uñtʼasiyäxa sasaw Samuelur yatiyäna. Qhipüruxa Elí sacerdoter uk yatiyañxa axsaränwa. Elí sacerdotesti akham sasaw mayirakïna: ‘Jan kuns imtʼistati jan ukasti taqpacha yatiyita’ sasa. Ukatwa kunjamtï profetax nayrax Elir yatiykänxa uka kikparakiw Samuelux taqi kuntï Jehová Diosax siskäna uk yatiyäna. Ukat Elí sat jilïr sacerdotex akham sarakïnwa: ‘Kuntix Jehová Tatitux munki uk lurarakpan’ sasa. Tiempompixa Ofni ukat Finees sat yuqanakapax jiwayatäpxänwa, Elí sat tatapasa jiwxarakïnwa (1 Samuel 3:1-18).

Ukäñkamaxa, “Samuelusti niya jilsuskarakïnwa, Tatitusti juparux yanaparakïnwa”. Uka tiempotakix qʼaxu waynäxpachänwa, ukham waynäñax wali askiwa. Ukampis ¿jupatakix jan wali jaqinak taypin askinak lurañax faciläpachänti?... Janiwa. Ukampisa, Jehová Diosat jan jithiqtasaw taqi chuyma luqtaskakïna (1 Samuel 3:19-21).

Jumasti, ¿Samueljamarakiti luräta? ¿Kunatï askïki ukpunti luräta? ¿Kunanakatï Biblian qillqatäki ukat kunanaktï mamamampi tatamampix yatichapktam ukanakarux istʼasïtati? Ukhamtï lurätaxa mamamampi tatamampix wal kusisipxani ukat Jehová Diosax jukʼampi kusisini.

[Qhanañchäwi]

Jisktʼanaka:

○ ¿Kunatsa Samuelux wawatpacha Jehová Diosan Utapan jakasïna?

○ ¿Kunas ukan pasaskäna, ukat kunjamas Samuelux sarnaqäna?

○ ¿Kunsa Samuelut yatiqasisma?