¿Kawkhantï yatiyirinakax munaski ukar jumax sarasmati?

“Wali sumwa Estados Unidos markan jakasipxayäta. Ukampisa, kawkhantï jakapkayäta uka jaqinakax qullqi chuymapxänwa ukaw mayjtʼayistaspa sasaw llakisipxayäta. Warmijamp nayampix misioneronakjamaw nayrax irnaqapxayäta, ukat uka tiemponxa janiw walja yänakanïpkayäti ukampis wali kusisitaw jakasipxayäta, ukham jakasiñwa wasitat munapxayäta.”

UKA amtampiw Rodolfompi Pamelampix 1991 maran sucursalanakar qillqapxatayna. Kawkhantï yatiyirinakax munaski ukar sarañwa munapxäna. Ukat Mexicon utjki uka sucursalaxa, inglés parlirinakar yatiyañatakix aksanwa munasi sasaw sapxatayna. Yapu apthapiñ horasäkapas ukhamaw sasaw sapxäna (Juan 4:35). Ukatwa Rodolfompi Pamelampi ukat pä wawapampix jankʼaki uka markar sarxañatakix wakichtʼasipxäna, jilïr wawapax tunka payan maranïnwa, sullkïristi kimsaqallq maranirakïnwa.

Walipuniw jaqinakar yatiyañax utjäna

Rodolfox akham sasaw amtasi: “Janïr Estados Unidos markat sarapkayäta ukhax akham sasaw yaqhip jilat kullakanakax sapxitäna: ‘Yaqha markan jakañax wali chʼamawa’. ‘¿Usuntapxäta ukhax kamachapxätasa?’ ‘Kunatsa yaqha markar inglés parlirinakar yatiyir sarapxäta, uka jaqinakax janiw Bibliat yatiñ munapkiti’ sasa. Ukampisa, uksar sarañatakix amtatäxänwa, janiw ukhak amtapkayäti, jan ukasti walja maranakaw ukham yatiyir sarañatakix wakichasipxayäta. Ukatwa manunakarus janix mantapkayätti, qullqsa imasipxayäta ukat kuna jan waltʼäwis utjaspa uka tuqitsa walja kutiw parlapxarakiyäta” sasa.

Rodolfompi familiapampix México markankir sucursalaruw nayraqat visittʼir sarapxäna. Ukanwa, kawki chiqarus yatiyir sarapxañapäna ukxa mä mapan uñachtʼayapxäna. Ukhamax San Miguel de Allende sat markaruw sarapxäna uka chiqanxa, yaqha markat jutirinakaw jakapxäna, ukat uka markax México markat 240 kilometronak alay tuqir sarañankiwa. Ukat kimsa maratxa, inglés arut parlir mä tamaw uttʼasïna, uka tamanxa tunka llätunkani jilat kullakanakakiw utjäna. Ukampis ukax qalltakïnwa.

Estados Unidos markankir jaqinakatxa mä millón ukhaw Mexicon jakapxi. Ukampisa, Mexiconkirinakatxa walja yatiqirinaka ukat yatxattʼatanakaw inglés parlañ yatipxaraki. Ukat Rodolfox akham saskakiwa: “Walpun Jehová Diosar yanapirinak khitaniñapatakix mayisipxta. Ukampis utajanxa jilat kullakanakar qurpachañatak mä utax utjapunïnwa” sasa.

Jukʼamp yatiyir sarañatakiw chʼamachasipxi

Ukat jukʼamp yatiyir sarañ munir yaqha jilat kullakanakarakiw uka markar puripxäna. Billimpi Katimpix Estados Unidos markankirïpxänwa ukat pä tunka phisqan maraw kawkhantï yatiyirix wal munaski uka chiqanakan chacha warmpach irnaqtʼapxatayna. Jupanakax español aru yatiqañ amtasipkäna, ukampis kunapachatï Ajijic markar jakir sarxapxäna ukhaw uka amtapax mayjtʼxäna, uka markaxa Chapala sat quta thiyankiwa, ukat uka chiqanxa, Estados Unidos markankir walja jubilatanakaw jakapxi. Billix akham siwa: “Ajijic markanx inglés parlir ukat Bibliat yatiqañ munir jaqinakar wal thaqhapxayäta” sasa. Pä maratxa, Billimp Katimpix México markanx inglés arut parlir payïr tama uttʼasirwa uñjapxäna.

Ken ukat Joannex Canadá markankirïpxiwa, jupanakax jukʼampwa Jehová Diosatakix irnaqañ munapxäna. Ukat phuchapamp kunaw México markar sarañ amtapxatayna. Ken jilatax akham siwa: “Qalltanxa wali chʼamapunïnwa, janiw jariqasiñatakix juntʼu umas utjkänti, janirakiw lusasa ni telefonos utjkänti” sasa. Ukampisa, wali kusisitaw yatiyirix sarapxirïna. Ukat mä tiempotxa, Ken jilatarux irpir chuymaninakan yanapiripjamaw uttʼayapxäna ukat pä mara qhipatxa, irpir chuymanïxänwa. Qalltanxa, Brittany sat phuchapatakix ukham yatinuqtañax chʼamarakïnwa, kunattix inglés aru parlir tamanx janiw waljäpkänti, mä qhawqha wayn tawaqukiw utjäna. Ukampisa, kunapachatï Tantachasiñ Utanak lurañ yanaptʼir saräna ukhaxa, walja amigonakwa jikxatäna.

Patriciompi Roxanampix Texas markanwa jakasipxäna, ukatxa inglés arut yaqha markar yatiyir sarañatakix janiw wali jaya markar sarapxañapäkänti, uk amuyasax walpun kusisipxäna. Patriciox akham siwa: “Kunapachatï Monterrey markar sarapxta ukhaxa, Jehová Diosas uksar irpapkitaspa ukhamwa amuyasipxta” sasa. Ukat Monterrey markar sarañatakix phisqa urut Texas markan utjkäna uka utap aljapxäna. México markan jakañax chʼamakïwa, ukampisa wali askinakwa jikxatawayapxäna, kunattix pä maratxa, janiw tunka paqallqun yatiyirinakakïxapxänti, jan ukasti pusi tunkanïxapxänwa, ukat mä tama uttʼayapxäna.

Jeff ukat Deb chacha warmix ukhamarakiw Jehová Diosatak jukʼamp irnaqañatakix chʼamachasipxäna. Estados Unidos markan jachʼa utap aljxasaxa, Cancún markaruw jakasir sarxapxäna, ukanxa utapax jiskʼakïnwa, ukat uka markax lamar quta jakʼankänwa. Estados Unidos markanxa, jachʼa tantachäwinakar sarañatakix janiw jaya sarapxañapäkänti ukat ukanx aire acondicionado satäkis ukaw utjarakïna, ukhamax ukar yatitäpxänwa. Ukampis jichhax inglés arut istʼañatak jachʼa tantachäwinakar sarañatakix kimsaqallqu horaw sarapxañapäna ukat ukax pelot anatañ jachʼa canchan apasïna, ukat wali lupipunïnwa. Taqi uka luratanakapax janiw inamayäkänti, kunattix qhipatxa, phisqa tunka jilat kullakanakaw utjxäna ukat mä tamaw uttʼasiwayäna.

Mexiconkir yaqhip jilat kullakanakax ukhamarakiw inglés arut yatiyañ qalltxapxäna. San Miguel de Allendenxa inglés aru parlir mä tamaw uttʼayasxäna ukat markpachanwa uka arut parlirinakarux yatiyir sarapxäna, uk yatisax Rubén jilatampi familiapampix jankʼakiw uka tamar yanaptʼañ amtapxäna. Inglés aru parlañwa yatiqapxañapäna ukat kunjamtï uka jaqinakax jakapki ukar yatinuqtapxañapänwa, ukat tantachäwir sarañatakix 800 kilometronakwa sarapxañapäna. Rubenax akham siwa: “Yaqha markanakat México markar jakasir sarapki uka jaqinakamp parltʼañax wali sumawa, kunattix janiw jupanakax Biblian yatichäwinakapat pachpa arupan istʼapkataynati. Ukat yaqhipax jachtʼasis kunaw yuspärasipxiri” sasa. Uka jilatax familiapampix nayraqatxa, Guanajuato markanwa precursorjam irnaqapxäna. Ukanxa, inglés arut parlir mä tama uttʼayañwa yanaptʼapxäna, kimsa tunkat jukʼamp jilat kullakanakaw uka taman utji. Jichhaxa Irapuato markanwa inglés aru parlir mä qhawqha jilat kullakanakar yanaptʼasipki, uka markax Guanajuato jakʼankakiwa.

Jan jikxatañjamakäna ukanakarus yatiyapxiwa

Janiw yaqha markat jutirinakakix inglés aru parlañ yatipkiti, jan ukasti walja mexicanonakaw parlapxaraki. Ukampis Diosan arunakapat jupanakar yatiyañax wali chʼamawa, kunattix qamirinakax jakapxi uka chiqanakanwa jakapxi ukat irnaqirinakapakiw punksa jistʼarapxi. Ukampis khitinakatï punku jistʼarapki ukanakax janiw Jehová Diosan Qhanañchirinakapamp parlañ munapkiti, kunattix aka chiqan yupaychir mä jiskʼa tamakïpachaw sasaw amuyapxi. Ukampisa kunapachatï yaqha markat jutir jilat kullakanakax punkup liqtʼapki ukhax istʼapxiwa.

Gloria sat mä warmit jichhax parltʼañäni, jupax Querétaro sat chiqan México markan jakasi. Jupax akham siwa: “Jehová Diosan Qhanañchirinakapax walja kutiw utar jutapxiri, ukampis nayax janiw istʼirïkti. Ukat familiajasa ukat amigonakajas jan waltʼäwinakan uñajasïna ukhaxa, wali llakitapuniw jikxatasiyäta. Uka jan waltʼäwit mistsuñataki yanaptʼita sasaw Diosarux wal mayisiyäta. Uka qhipatxa inglés parlir mä warmikiw punk liqtʼanïna, aka utan maynis inglés parlir utjiti sasaw jisktʼitu. Ukat yaqha markat jutir uka warmir uñjasaxa, ‘nayaw parlta’ sasaw sista. Jupax Bibliat parlaskitäna ukaxa, ¿kunarak aka chiqan luraspacha?, sasaw chuymajan jisktʼasiyäta. Ukampis ukhakiw Diosarux yanaptʼita sasin mayisiskayäta, ukat juparuw Diosax khitanpacha sasaw amuyasta” sasa. Gloriax Bibliat yatiqañ qalltäna ukat mä qhawqha tiempotxa, janis familiapax munkchïnxa, jupax bautasasxänwa. Jichhax precursora regularjamaw irnaqtʼaski, ukat chachapasa yuqapas Jehová Diosarurakiw luqtasipki.

Diosatak jukʼamp irnaqirinakaxa, ¿kuns katuqapxi?

Kawkhantï yatiyirinakax munaski uka chiqanakar sarañax chʼamakiwa, ukampis wali askinakwa jikxattanxa. Qalltan parlkayätan uka Rodolfo jilatax akham siwa: “China, Gran Bretaña, Jamaica, Suecia markanakat jutiri jaqinakaruw Bibliat yatichapxta, Ghana markan Reyin familianakaparus yatichapxaraktwa. Ukat yaqhipax bautisasxapxiwa ukat sapürjamarakiw Diosatakix irnaqasipki. Aka qhipa maranakanxa, familiajampix inglés arut parlir paqallqu tamanak uttʼasirwa uñjapxta. Panpacha yuqajaw nänakamp chika precursorjam irnaqañ qalltawayapxi, jichhaxa Estados Unidos markan Betel utanwa irnaqtʼasipki” sasa.

México markanxa, inglés arut parlir 88 tamanakaw jichhax utjxi, ukhamarak walja gruponaka. ¿Kunatsa ukham jilxattpachäna? Kuna laykutix yaqha markat México markar jakir jutapki ukanakax janiw may kutis Jehová Diosan Qhanañchirinakapamp parlapkataynati. Ukat yaqhipax janiw markapanxa Bibliat yatiqapkaspänti, familiaranakan jan ukax amigonakan jarkʼataw uñjasipxaspäna. Ukat yaqhipasti jubilatäxapxarakiwa, ukhamasti Dios tuqit yatxatañatakix tiemponïxapxiwa, ukatwa jupanakax Bibliat yatiqañ qalltawayapxaraki. Maysa tuqitxa, inglés parlir tamanakanxa, sapa kimsanitxa mayniw precursorjam irnaqtʼaski, ukaw ukham jilxattañapatak yanaptʼawayaraki.

Bendicionanak katuqäta

Kunapachatï pachpa arupat yatiyir sarañäni ukhaxa, waljaniw Diosan arupat istʼapxani. Ukat kawkhantï yatiyirinakax munaski ukar sarañataki yatxattʼat jilat kullakanakax chʼamachasipxi ukhaxa, wali chʼamachataw uñjasiraktanxa. Yaqha chiqar sarañax chʼamäkchisa, kunapachatï jaqinakax Jehová Diosar taqi chuym luqtapxi ukhaw ukham chʼamachasitasat wal kusistanxa. ¿Kawkhantï walja yatiyirix munaski uka chiqaru, jan ukax yaqha markar jumax sarasmati? (Luc. 14:28-30; 1 Cor. 16:9.)a Jumatï ukham saräta ukhaxa, walja bendicionanakwa katuqäta.

[Qhanañchäwi]

[21 janan recuadropa]

Wali kusisit jubilatanaka

Beril sat warmix Gran Bretaña markat Canadá markaruw sarxäna, ukanwa walja jachʼa negocionak pʼiqtʼäna. Caballot tʼijuñsa wali sum yatirakïna, ukatwa Canadá markat juparu Juegos Olímpico satäkis ukar sarañatak 1980 maran ajllipxatayna. Ukat jubilatäxäna ukhax Chapala markarurakiw chachapampi sarxäna. Manqʼa aljapki uka utanakanxa, inglés parlasir wali kusisit jubilatanakaruw uñjäna, ukatwa jupanakarux jikxatäna ukat kunsa México markan lurasipkta sasin jisktʼäna. Khitinakarutï ukan uñjkäna ukanakax niya taqiniw Jehová Diosan Qhanañchirinakapäpxäna. Jupanakarutï Diosar luqtañax kusisiychixa, ukhamax Diosar uñtʼañasarakiwa, sasaw chachapampix amtapxäna. Ukat walja phaxsinak tantachäwinakar sarasaxa, Berilix Bibliat yatiqañ qalltxäna, bautisasxäna ukat walja maranakaw precursorjamax irnaqawayäna.

[22 janan recuadropa]

“Jupanakampïñax wali askipuniwa”

Khitinakatï ukham markap jaytasin yaqha markanakar sarapxi ukanakarux wal jilat kullakanakax munasipxi. Caribe chiqan utjiri mä sucursalax akham sasaw qillqäna: “Yaqha markat jutir jilat kullakanakatï sarxapxaspa ukhaxa, tamanakax aynachtʼataw uñjasipxaspa, jupanakampïñax wali askipuniwa” sasa.

Bibliax akham siwa: “Tatituw mä yatiyäw arsu, waranq waranq [‘warminakaw’, NM] ukxat yatiyapxäna” sasa (Sal. 68:11). Ukatwa taqi chuyma Diosatak irnaqir yaqha markanakan walja kullakanakar uñjtanxa, jupanakan ukham jutapxatapax wal yanaptʼi, Europa del Este uksankïr mä sucursalax akham siwa: “Sapäkasin uka kullakanakax yaqha markat irnaqtʼir jutapxi, uk uñjasax wali kusisitaw jikxatasipxta, kunattix tamanakarux niya jilpachaniw jichhak jutasipki ukat sapa tunkatxa, niya paqallquniw warminakäpxi. Ukat precursoranakaw uka kullakanakar yanaptʼasipki. Chiqpachansa mä aski churäwiw nänakatakixa” sasa.

Yaqha markar sarasaxa, ¿kunjamsa uka precursor kullakanakax jikxatasipxi? Kimsa tunka phisqan marani Angélica sat mä kullakaxa, walja maranakaw yaqha markan precursorjam irnaqäna, jupax akham siwa: “Chiqansa, yaqha markan irnaqañax wali chʼamawa. Kawkintï mä kutix jakkayäta ukhanxa, thakinakax ñiqʼikamakïnwa ukat sapürus jaqinakan tʼaqhisiñapakwa uñjaskirïta, ukax wali llakkañänwa. Ukampis jupanakar yanaptʼañasa ukat kullakanakan suma arunakapa istʼañas walpun kusisiyitäna. Maynix akham sasaw situ: ‘Jaya markat precursorjam akar irnaqir jutatamasa Diosar taqi chuyma luqtatamasa ukham sapürjam Diosatak irnaqañatakiw chʼamachtʼitu’” sasa.

Phisqa tunka marani, jan jaqichat Sü sat mä kullakax akham siwa: “Chiqansa jan waltʼäwinakax utjiwa, ukampis kuna bendicionanaktï katuqktan ukhaxa, uka jan waltʼäwinakax janiw kunäkisa. Yatiyir sarañax ¡wali khusapuniwa! Sapürus tawaq kullakanakampipuniw yatiyir mistta, ukat kunjamsa Bibliata ukat Bibliat apstʼat qillqatanakat jan waltʼäwinakar saykatañ yatiqta uka tuqinakatwa jupanakarux parlta. Ukat kunjamsa jumax walja maranak precursorjam jan waltʼäwinakar saykatta ukax jan waltʼäwinakar saykatañwa yaticharakitu sasaw yaqhipax sapxitu. Uka kullakanakar yanaptʼañax walpun kusisiyitu” sasa.

[20 janankir mapa]

(Sumpach amuytʼañatakix qillqatn mistki uk uñxatañamawa)

MÉXICO

Monterrey

Guanajuato

Irapuato

Ajijic

Chapala

Chapala sat quta

San Miguel de Allende

Querétaro

MÉXICO MARKA

Cancún

[23 janan fotopa]

Yaqha markat jutiri yaqhip jaqinakax janiw may kutis suma yatiyäwinak istʼapkataynati