Jesusan yatichäwinakapa

‘Akapachan tukusiñapa’

¿Kunas “akapachan tukusiñapaxa”?

Mä kutixa, arkirinakapax Jesusar akham jisktʼapxäna: “¿Kawkïrïnis chimpuxa jumax kuttʼankät ukkaxa, ukhamarak akapach tukuskan uka urutsa?” sasa (Mateo 24:3). Jesusax uka jisktʼar jaysasaxa, janipuniw aka Uraqin tukjatäñapat parlkänti. “Akapachan” sasinxa, aka Uraqpachax Supayan apnaqatäki politiconak tuqita, jachʼa alakipanak tuqita ukat yupaychäwi tuqinakat nayratpach parläna (Mateo 13:39, 40, 49). Ukhamaxa, Jesusax “akapachan tukusiñapaw jutani” siskäna uka arunakampixa: kunanakas aka Uraqxaru munañanïki ukanakan tukusiñapat parlaskäna (Mateo 24:14).

¿Kunjamänisa?

Aka ñanqha pachan tukusiñap yatiñaxa kusiskañawa sänwa Jesusaxa, ¿kunatsa? Akham saskakïnwa: “Diosan reinopat aka suma yatiyäwisti aka uraqpachanwa yatiyatäni, ukhamat taqi markanakan yatipxañapataki, ukatsti akapachan tukusiñapaw jutani” sasa. Ukat akhamäniw sarakïnwa: “Ukürunakanxa walja tʼaqhisiñanakaw utjarakini. Ukham tʼaqhisiñsti janiw jichhürkamax khitis uñjkiti aka uraqi luraski ukürutpacha, ni uka pasatats utjkarakiniti. Diosatix uka urunakxa jan jiskʼaptaykaspa ukaxa, janiw khitis qhispiyaskaspati” sasa (Mateo 24:14, 21, 22).

¿Khitinakas tukjatäpxani?

Khitinakatix Jehová Diosaru Jesusaru jan munapki ukat kamachinakaparjamas jan sarnaqapki ukanakaw tukjatäpxani. Jesusax akham sänwa: “Kunjämatix Noen urunakapanxa paskatayna ukhamarakïniwa Jaqin Yuqapax jutkani ukkhaxa. Uka urunakanxa janïra uma juicio paskipanxa [...] janirakiw amuyasipkänti kunürutix uma juiciox purinisin taqiniru apasxäna ukürkama” sasa (Mateo 24:36-39). Walja jaqinakaw jiwañar apiri thakinkapxi, ukampis “jakañaru irpiri thakisti wali kʼullkʼuwa, [...], jukʼanikirakiw ukarux mantapxi” sasaw qhanañcharakïna (Mateo 7:13, 14).

¿Kunapachas uka arunakax phuqasini?

Kawkïrïnis chimpuxa jumax kuttʼankäta “ukhamarak akapach tukuskan uka urutsa” sasin jisktʼapkäna ukaruxa, Jesusax akham sänwa: “Mä jachʼa markax yaqha jachʼa marka contraw nuwasini, mä markasti yaqha marka contrarakiw sartani, ukapachaw manqʼat pistʼañax utjani, usuñanakasa, uraq khatatinakasa [...] Uka taqi tʼaqhisiñanak utjipanxa yaqhipanakax munasiñapxa chhaqtayasiniw maynit maynir munasiñäkis ukxa” sasa (Mateo 24:3-12). Ukhamaxa, llakisiykir yatiyäwinak istʼañax janiw jan walipunïkiti, ¿kunatsa? Diosan apnaqäwipax niyaw aka Uraqpacha apnaqxani Jupar taqi chuym yupaychirinakatakisa wali sumankaña apanirakini. Ukatwa Jesusax akham säna: “Akanak pasir uñjapkäta ukkhaxa, yatipxam Diosan reinopax jakʼankatapa” sasa (Lucas 21:31).

¿Qhispiñatakix kun lurañas wakisispa?

Diosax “mä sapa Yuqapar khitani, taqi khitinakatix jupar iyawsapki ukanakax jan chhaqañapataki, jan ukasti wiñay jakañanïñapataki” (Juan 3:16). Ukhamaxa, iyawsäwinïñatakix Jesusar ukat Diosaru wali sum uñtʼañasaw wakisi. Ukatwa Jesusax akham säna: “Aka wiñay jakañax juma sapa chiqpach Diosar uñtʼañanwa utji, ukhamarak Jesucristoru kawkïrirutix jumax khitankta ukaru” sasa (Juan 17:3).

Kunjamtï uñjawayktanxa, llakinakas jan waltʼäwinakas Jehová Diosaru sum uñtʼañatakisa ukat jupar munasiñ uñachtʼayañatsa janipuni jarkʼaqistpanti. Jesusax akham iwxtʼäna: “Amuyasipxam, jan chuymanakamxa [...] qalarayasipxamti, ukhamarak aka jakañan llakisiñanakampisa jan khä urun jumanakax akatjamat katjayasipxañamataki kunjämtix mä sipitax jistʼantaskis ukhama. Uka urusti ukhamwa jutani taqi uraqpachan jakirinakxaru” sasa. Uka arunakarutï istʼañänixa, ‘taqi akanak paskani ukat jaltapxañäniwa’ (Lucas 21:34-36).

Jukʼamp yatxatañatakixa, ¿Kunsa Bibliax chiqpachapuni yatichi?,a sat libron 9 jaljan “¿‘Qhipa urunakankxtanti’?” siski uka yatichäwi uñxattʼäta

[Qhanañchäwi]