“Suma yatiyäwi” yatiyañ urunakanxa, jan ina chʼusar tiempo aptʼasiñäniti

LEPRA usun mayjasir pusi jaqinakaxa, janiw kawkirus sarirjamäxapxänti, kunattix Samaria markar mantañ chiqawjanxa, mayjasisax janiw kuns katuqapkänti. Siria markankir soldadonakaw Samaria markxa muyuntapxatayna, ukatwa jaqinakax uka markan manqʼat jiwarasipkäna. Ukhamasti uka markar mayjasir sarañax inamayäspänwa, kuna laykutix manqʼax wali jilxattatänwa. Chiqas uka markanxa, pä warmiw mä wawa manqʼantxapxatayna (2 Rey. 6:24-29).

Mäpitay ‘sirionakan campamentonakapar sarañäni’ sasaw lepra usun jaqinakax amtapxäna. Ukampis jupanakax kunjamats jiwapxasapänwa. Ukhamawa, jupanakax arumthapiruw sarapxäna. Ukar purisinsti campamentox chʼujukïnwa. Caballonakarusa asnonakarus chinkatat uñjapxäna, ukampis campamento uñjirinakasa soldadonakas janiw ukankapkänti. Yatxatañ munasax mä carparuw jakʼachasipxäna ukat jan khitis utjatap uñjasaxa, taqi kuntï ukan utjkäna uk manqʼapxäna ukat umapxäna. Ukatxa, quri, qullqi, isinak ukat valoran yaqha yänak uñjasasti, taqi kuntï apasirjamapkäna uk katuntasisinxa imantiriw sarapxäna, ukat jukʼamp apsusir kuttʼasipkakïnwa. ¡Sirionakaw campamentpacha apanukuwayasin tʼijtxapxatayna! ¿Kunatsa? Jehová Diosaw mä jachʼa ejerciton jupanakan ukar jutapkaspas ukham istʼayäna. Tukjistaniwa sas amuyasisaw taqi kun jaytawayas tʼijtxapxatayna.

Lepra usun jaqinakax kuttʼanisin jukʼamp apasisipkakïnwa. Akatjamatwa jupanakax Samariankir jaqinakax manqʼat jiwaraskir amtasipxatayna, ukatwa chuymapan mayjtʼat jikxatasipxäna. Jupanakkamaw akham parlakipasipxäna: “Janiw wal lurktanti. Jichhürux suma yatiyäwi apañasaw waktʼistu” sasa. Ukhamasti, kuntï uñjapkatayna uk yatiyirix jankʼakiw Samaria markar sarapxatayna (2 Rey. 7:1-11).

Jiwasax jupanakjamarakiw “suma yatiyäwi” yatiyañ urunakan jakasktanxa. ¿Kuna yatiyäwinakats parlasktanxa? Akapach tukusïw tiemponxa, Jesusax kawkïrinis chimpux sänsa uka tuqitwa parlasktanxa, jupax akham sänwa: “Diosan reinopat aka suma yatiyäwisti aka uraqpachanwa yatiyatäni, ukhamat taqi markanakan yatipxañapataki, ukatsti akapachan tukusiñapaw jutani” sasa (Mat. 24:3, 14). Uk yatisaxa, ¿kunsa lurañasa?

Jakäwisan llakinakaw armtʼayistaspa

Lepra usuni jaqinakax manqʼañanaka ukat suma yänak jikxatapxäna ukhaxa, wali kusisitaw jikxatasipxäna, ukampis kunjamsa Samariankir jaqinakax jikxatasipxäna uk armtʼasipxänwa. Kuntï jupanakatak wakiskäna ukatakwa llakisipxäna. ¿Jiwasarux ukham pasarakistaspati? Chiqas akapach tukusïw tiemponxa, ukhamarakiw “manqʼat awtjayasiñanaka[x]” utjani sasaw Jesusax säna (Luc. 21:7, 11). Ukatwa arkirinakapar akham sasin iwxtʼäna: “Amuyasipxam, jan chuymanakamxa vicionakampi machañanakampi qalarayasipxamti, ukhamarak aka jakañan llakisiñanakampisa” sasa (Luc. 21:34). Ukhamawa, jakäwisan llakinakamp atipayasisax “suma yatiyäwi” urunakan jakasitasxa armassnawa, ukhamasti amuyasiñasawa.

Jichhax Blessing sat kullakat amuytʼañäni, jupax suma yatiyäwi urunakankkatas janiw armaskänti. Jupax yatichirïñatak yatiqañ utar saraskäna ukhatpachaw precursorjam irnaqtʼäna. Ukatxa, Betelan irnaqtʼir mä jilatampiw jaqichasxäna ukat ukan irnaqtʼañatakiw jawstʼapxarakïna, Benín markana. Jupax akham siwa: “Betelan qʼumachirit irnaqtʼaskta, ukham irnaqtʼañax wali kusiskañaw nätakixa” sasa. Uka kullakax tunka payan maranakaw Diosatak sapür irnaqtʼxi ukat “suma yatiyäwi” urunakankkatas jan armasitapatxa, wali kusisitaw jikxatasi.

¿Kunanakas tiempo apaqistaspa?

Jesusax 70 arkirinakapar yatiyir khitäna ukhaxa, akham sasaw säna: “Qhanpachanxa, yapu apthapiñax waljawa, ukampis apthapirinakax jukʼakiwa. Uka layku yapunir mayipxam yapu apthapir irnaqirinak khitaniñapataki” sasa (Luc. 10:2). Yapuchiritï tiempopar jan apthapkaspaxa, achunakax tukusispawa. Niya ukhamarakiwa, jiwasatï jan yatiyir sarkañänixa, jaqinakax tukjatäpxaspawa. Ukatwa Jesusax akham säna: “Janiraki thakina khitirusa [‘qhumantas’, NM] aruntapxamti” sasa (Luc. 10:4, MT). ‘Aruntaña’ sas jaqukipatäki uka griego aruxa, janiw “kamisaki” jan ukax “aski urukïpan” sasin aruntañak sañ munkiti. Jan ukasti, qhumanttʼasis aruntaña ukat amigonakampi jikisis wali jaya parltʼañ sañ munaraki. Kuna yatiyäwitï yatiyapxañapäkäna ukaxa, wali wakiskirïnwa ukat jankʼakirakiw yatiyasiñapäna, ukhamasti Jesusan arkirinakapax janiw tiempo ukhamak aptʼasipxañapäkänti.

¿Kunanakas tiempo apaqistaspa? Chiqas walja maranakaw televisionax jaqir tiempo apaqaski. Ukampis ¿celularanakata ukat computadoranakat kamsasirakispasa? Gran Bretaña markanxa, 1.000 jilïr jaqinakaruw uka tuqit jisktʼasitayna. Ukat uka markan janirak qamiri janirak pobre ukhaman jakasir jaqixa, “88 minutonakwa telefonot parlasa tiempo aptʼasi, celularatxa 62 minutonaka, computadorat mensajenak apayasaxa 53 minutonaka ukat celularat mensajenak qillqas yaqha celularar apayasaxa 22 minutonakaraki”. Phaxsi tukuyar uka minutonak jakthapsna ukhaxa, pä phaxsi precursor auxiliar apsuñatak munaski uka horanakatsa jila horanakwa ukanak lurasin aptʼasi. Jumaxa, ¿ukanak lurasax qhawqha tiempsa aptʼasiskta?

Ernst ukat Hildegard Seliger chacha warmit parltʼañäni, jupanakax janiw tiempo ina chʼusar aptʼasipxirïkänti. Panpachanit jakthapitax 40 maranakaw campos de concentración nazi ukat comunistanakan carcelanakapan jistʼantat uñjasipxäna. Ukat mistusinsti, aka Uraqinkkasax precursoranakjamaw irnaqtʼawayapxäna.

Waljaniw Seliger jilat kullakar cartanak qillqapxäna, jupanakax uka cartanak liyisa ukat jupanakar qillqasaw tiempo aptʼasipxasapäna, ukampis jupanakatakix Jehová Diosar luqtañaw jukʼampi wakiskirïnxa.

Chiqansa, taqiniw familiaranakasampi amigonakasamp parltʼasiñ muntanxa, ukat yaqha luräwinakatakis tiempo apstʼasiñax wali wakiskirirakiwa. Ukampis janiw ukanak lurasakix tiempo aptʼasiñasäkiti, ukhamtï lurañänixa, “suma yatiyäwi[nak]” yatiyañatakix janiw tiempox utjxistaspati.

Suma yatiyäwinak jan qarjtasa yatiyaskakiñäni

“Suma yatiyäwi” yatiyañ urunakan jakañax wali wakiskiripuniwa. Kunjamtï lepra usuni jaqinakax qalltañ armasipkäna ukham janipun armasiñäniti. Qhipatakwa jupanakax “janiw wal lurktanti” sasin amuyasipxäna. Jiwasatakik kun thaqhasa jan ukax jan wakiskir luräwinak luras tiempo aptʼasisksna ukhaxa, janipuniw akchʼas walïkaspati, taqi chuyma Diosan arunakapat yatiyañwa jarkʼaqistaspa.

Uka tuqitxa, apóstol Pablotwa yatiqassna. Jupax nayrïr 20 maranak luqtatapat amtasisaxa, akham sasaw qillqäna: “Criston taqi suma arunakapampi[w] phuqhantawayta” sasa (Rom. 15:19, MT). Ukhamawa, Pablox taqi chuyma yatiyañatakix janipuniw ina chʼusar tiempo aptʼaskänti. Ukhamasti jupat yatiqasis taqi chuyma jan qarjtasa Diosan Apnaqäwipat “suma yatiyäwi[nak]” yatiyasipkakiñäni.

[28 janan fotopa]

Blessing kullakax janiw munañapak thaqhasax tiempo ina chʼusar aptʼaskänti, jan ukasti Diosatak jukʼamp irnaqtʼaskakïnwa

[29 janan fotopa]

Seliger jilat kullakax janiw tiempxa ina chʼusar aptʼasipkänti