Wawanakar yatichañataki
Jesusax istʼasirïñwa yatiqäna
¿JUMATAKIX istʼasirïñax chʼamati?a... Jan llakisimti, taqinitakiw chʼamaxa. ¿Jesusas istʼasirïñ yatiqarakïnwa, uk yatiyätati?...
¿Khitinakarus istʼañamaxa?... Jïsa, Awk taykamaru. Kumjamtï Bibliax siskixa: “Wawanaka, awkimaru taykamaru istʼapxam, Tatitur munasina. Akawa chiqapaxa” sasa (Efesios 6:1). ¿Jumax kamsasmasa, Jesusax awk taykaparux istʼirïpachänti? ¿Khitinakäpxänsa?... Chiqansa, Jehová Diosaw chiqpach Awkipaxa, Jupax Awkisarakiwa (Mateo 6:9, 10). Ukampis Joseyampi Mariyampiw sissta ukasa, chiqäskapunirakiwa. ¿Kunjamatsa Jesusan awk taykapäpxi uk yattati?...
Gabriel angelaw Mariarux mä wawanïyätaw sasax yatiyäna. Ukampis ¿kunjamatarak chachampi jan ikintasisast wawanïsapänsti? Jehová Diosaw mä jachʼa milagro luräna. Angelax akham sasaw Mariar qhanañchäna: “Alaxpach Diosan chʼamapaw mä qinayjam jumarux imxattätam. Ukatwa naskan uka wawax Diosatak yaqhachatäni, ukatsti Diosan Wawapa satarakïniwa” sasa (Lucas 1:30-35).
Jehová Diosaw alaxpachankir Yuqapan jakäwipxa Marian purakapar uchäna. Ukhamatwa, Jesusax kunjamtï wawanakax taykapan purakapan jilapki ukham jilarakïna. Ukatxa, Joseyax Mariampiw casarasxäna, niya llätunk phaxsitsti Jesusax yurxänwa. Joseyaw awkipax sasaw jila part jaqinakax sapxäna, ukampis jupax uywir awkipakïnwa. Chiqansa, Jesusax pä awkinjamänwa.
Tunka payan maranïkasaw Jesusax alaxpachankir Jehová Dios Awkiparu wal munasitap uñachtʼayäna ¿Kunjamatsa? Jesusan familiapax Pascua fiesta amtañatakiw Jerusalén markar wali jaya sarapxapunirïna. Ukampis Nazaret markapar kuttʼankasaxa, Joseyampi Mariampix Jesusax jan jupanakamp chik kuttʼanitapwa amuyasipxäna. ¿Kunjamatsa chhaqtayasipxäna?...
Uka tiempotakix Joseyampi Mariampix yaqha wawanakanïxapxänwa (Mateo 13:55, 56). Ukhamarusa, yaqha familiaranakapampiw sarapxäna, Jacobompi (Santiago), Juanampi ukat uka paninin Zebedeo ukat Salomé awk taykapampi. Salomeax inas Marian kullakapächïna. Ukatwa awk taykapax Jesusax jupanakampïskpachaw sas inas sapxpchïna (Mateo 27:56; Marcos 15:40; Juan 19:25).
Jesusax jan uñasxäna ukhaw Joseyampi Mariampix Jerusalenar wali llakit kuttʼasax taqi chiqan thaqtapxäna. Ukat kimsürutsti templon jikxatxapxäna. Ukhaw Mariax akham sas jisktʼäna: “¡Ay wawa! ¿Kunatarak ukham lurapxistasti? Awkimampi nayampix wali llaktʼataw thaqasipxsma” sasa. Ukampis Jesusax akham sänwa: “¿Kunatarak nayarusti thaqapxistasti? ¿Janit yatipkta nayax Awkixan utapankañaxxa?” sasa (Lucas 2:45-50).
¿Jesusax awk taykapar ukham satapax walikïskiw sasmati?... Chiqansa Joseyamp Mariampix Jesusax Diosan templopar wal sarañ munirïtapxa yatipxänwa (Salmo 122:1). Awk taykajax temploruw nayraqat thaqhir jutapxitani sasaw Jesusax amuypachäna, ¿janicha?... Jesusan arunakapax Mariarux jaya tiempow lupʼiyäna.
¿Ukat uksarux Jesusax awk taykaparux istʼxänti?... Bibliax akham siwa: “Ukapachaw jupanakamp chika Nazaretarux kuttxäna, ukatsti jupanakar istʼasaw sarnaqäna” sasa (Lucas 2:51, 52). ¿Kunsa jupat yatiqasma?... Jïsa, awk taykarux istʼañasawa.
Amuytati, Jesusax istʼasirïnwa, ukampis jupatakix istʼasirïñax janiw faciläkänti, alaxpachankir Awkipar istʼañas janiw facilapunïkänti.
Amuytʼañataki, Jehová Diosax aka Uraqin mä luräwi churäna: jaqinak layku jiwañapänwa. Janïr jiwkäna uka arumaxa, “munsta ukaxa, aka tʼaqhisiñatxa qhispiyita” sasaw Jesusax Diosar mayisïna (Lucas 22:42). Ukhampachas Awkiparux istʼänwa. Jesusax “tʼaqhisiñap tuqi jaysañxa [jan ukax istʼasirïnxa] yatiqäna” sasaw Bibliax saraki (Hebreos 5:8). ¿Jiwasax ukham luraraksnati?...
[Qhanañchäwi]
a Mä wawatakitï aka qillqat liytʼasksta ukhaxa, kimsa puntonak uñjasaxa, wawan arstʼañapatakiw saytʼañama.
JISKTʼANAKA:
▪ ¿Kunjamatsa Mariax Jesusan taykapänxa, ukat kunjamatsa Jesusax pä awkinïxarakïna?
▪ ¿Kunatsa Joseyampi Mariampix Jesusax jupanakamp jan chikätap amuyapxäna?
▪ ¿Jesusax kawkinsa awk taykapan thaqhañapx suyäna?
▪ ¿Kunsa Jesusat yatiqasisma?
[31 janan fotopa]
¿Kunatsa Joseyamp Mariampix Jesusarux temploruw nayraqat thaqhir sarapxañapäna sasax sista?