Jesusan yatichäwinakapa
Angelanakax walinsa jan walinsa uñjayistaspawa
“Janïra aka uraqi utjkipan[wa]” Jesusax alaxpachan Awkipamp jakxäna (Juan 17:5). Ukhamaxa, akxar jikxataski uka jisktʼanakar qhanañchañatakix jupakiw yanaptʼistaspa.
¿Angelanakax jiwasan askis munapxpachati?
▪ Angelanakax wal jaqinakan askip munapxi sasaw Jesusax qhanañchäna. Ukatwa akham säna: “Ukhamarakipï kusisiñax Diosan angelanakap taypinx utjixa mä juchararan arrepientisitapatxa” sasa (Lucas 15:10).
Jupanakaw Diosan luqtirinakaparux Alaxpachankir Awkipampi sum apasipxañapatak yanaptʼapxañapa sasaw qhanañcharakïna. Ukatwa Jesusax arkirinakapar akham sispachäna: “[Jilanakamarux] jan jiskʼachapxamti [...] jupanakan angelanakapax alaxpach markanxa Awkixan nayraqatapankasipkapuniwa” sasa (Mateo 18:10). Ukampis uka arunakampixa janiw sapa mayni arkirinakapas mä yanaptʼir angelanïkaspas ukham sañ munkänti. Jan ukasti Diosar luqtir angelanakax chiqpach cristianonakan askip munapxatapwa qhanstayäna.
¿Supayax jan walinak luristaspati?
▪ Supayax janiw jaqinakan Diosar uñtʼapxañap munkiti sasaw Jesusax arkirinakapar qhanañchäna, ukatwa akham säna: “Taqi khitinakatix Diosan suma yatiyäwipa istʼapki ukat janiraki amuytʼapki ukanakax, [...] chuymapar purkäna uka suma yatiyäwinaksti supayaw apsuwayxi” sasa (Mateo 13:19).
Mä kutixa, Jesusax trigo satir mä chachatwa parläna. Ukhamatwa kunsa Supayax jaqinakar sallqxañatak luri uk qhanstayañataki. Satir chachaxa Jesús pachpawa, trigosti chiqpach cristianonakarakiwa jupanakaw Jesusamp chik alaxpachat apnaqanipxani. Uka uñachtʼäwirjamaxa, mä uñisiriw “jutasina jan wali qura jathampi [trigor] phaw[xa]tawayi”. Uka jan wali quraxa, kʼari cristianonakawa ukat “jan wali jathampi phawantirïki ukasti, pachpa supayawa” (Mateo 13:24, 25, 39). Kunjamtï jan wali qurax trigor uñtat jilskixa, ukhamarakiw kʼari cristianonakax chiqpach cristianonakar uñtasitäpxaspa. Ukampis jupanakax kʼarinak yatichasaw jaqinakar sallqxapxi ukat Diosan kamachinakaps pʼakintayapxi. Ukhamatwa Supayax kʼari yatichäwinakampi sallqjas jaqinakar Jehová Diosat jithiqtayi.
¿Kunjamsa Supayat jarkʼaqassna?
▪ Juan 14:30 qillqatarjamaxa, “akapacha apnaq[iri]” sasaw Jesucristox Supayar sutichäna. Ukat kunjamsa Supayat jarkʼaqassna uks yaticharakïnwa. Arkirinakapat llakisaw akham sasin Awkipar mayisïna: “Maysmawa Supayat imañamataki. Kunjämtï nayax jan akapachankirïktxa, ukhamarakiw jupanakax jan akapachankirïpkiti. Chiqa kankañampi qʼumacham [...], arunakamasti chiqawa” sasa (Juan 17:15-17). Ukhamasti, Supayan apnaqat akapachat jarkʼaqasiñatakixa, Diosan Arupat yatxatañasawa.
¿Angelanakax jichhürunakan yanaptʼistuti?
▪ “Akapachan tukusïwipa[n]xa. Angelanakaw mistunipxani, ñanqha jaqinakarusti aski jaqinak taypitwa ajllsupxani” sasaw Jesusax qhanañchäna (Mateo 13:49, MT). Uka tiemponwa jiwasax jakasktanxa, ukat waranqa waranq jaqinakarakiw Diosan Apnaqäwipat suma yatiyäwinakar iyaw sapxi (Mateo 24:3, 14).
Ukampisa, Bibliat yatiqañ qalltapki ukanakax janiw taqinix Diosan askit uñjatäpkiti. Jehová Diosax angelanakapampiw arunakap yatiyapxañapatakix luqtirinakapar yanaptʼayi ukat uka angelanakarakiw Biblian yatichäwiparjam jan sarnaqañ munapki uka jaqinak taypit Diosar taqi chuyma munasipki ukanakar ajllsusipki. Khitinakas Diosan askit uñjatäpxi ukxa, akham sasaw Jesusax qhanañchäna: “Khitinakatix taqi chuymampi Diosan arupx istʼapki, ukhamarak katuqapxi, ukatsti taqi chuyma sarapxi, sum achupxaraki ukanakawa” sasa (Lucas 8:15).
Jukʼamp yatxatañatakix aka libron 10 jaljap uñxattʼäta, ¿kunsa bibliax chiqpachapuni yatichi?. Ukax Jehová Diosan Qhanañchirinakapan luratawa.
[16 janan fotopa]
Khitinakatï Biblian chiqa yatichäwinakap taqi chuyma yatiqañ munapki ukanakarux angelanakaw yanaptʼi