¿Bibliat sum yatxatañatakix kun lurañas wakisispa?
Kunapachatï maynix Bibliat sum yatxati ukhaxa, chuymas chuymaw jikxatasi. Ukampis ¿kunanakas sum yatxatañ yanaptʼistaspa? Uk jichhax kimsa tuqit amuytʼañäni.
1 DIOSAR MAYISIÑASAWA: Nayraqatxa Jehová Diosar mayisiñasawa (Sal. 42:8). ¿Kunatsa? Kuna laykutix Arupat yatxatasaw Jupar yupaychtanxa. Ukhamax Bibliat yatxatañatakix qullan ajay churita ukat suma amuysa churarakïta sasin achiktʼasiñasawa (Luc. 11:13). Misionerot walja tiempo luqtir Barbara kullakax akham siwa: “Biblia liyiñatakisa ukat yatiqañatakis Diosaruw nayraqat mayista. Ukat kunjamsa Jehová Diosax yanaptʼitu uk qhan amuyasta” sasa. Jïsa, kunapachatï Diosar nayraqat mayistan ukhaxa, chuymampi amuyumpwa sum wakichtanxa, ukat ukarjamaw Biblian utjir walja yatichäwinak sum katuqtanxa.
2 LUPʼIÑASAWA: Tiempow jan utjkiti sasaw yaqhip jilat kullakanakax Bibliat ukhamaki liyipxi. Jan sumpach amuytʼasax janirakiw askinak jikxatapkiti. Ukhamasti lupʼiñataki tiempo apsusiñasawa. Uka tuqitxa niya phisqa tunka maranak jila luqtir Carlos sat mä jilatax akham siwa: “Jichax janiw jankʼaki liyirpayxtti. Mä urunxa, niya pä janakwa liyxta. Ukhamatwa sumpach amuytʼasax askinak apsta” sasa (Sal. 77:12). Ukax chiqäskapuniwa, kunapachatï liytʼasin sumpach amuytʼktan ukhaxa, jukʼampiw Diosan arupat yatiqatax uñsti (Col. 1:9-11).
3 YATIQATARJAM PHUQAÑASAWA: Askinak jikxatasax jankʼakiw kunsa ukarjam lurtanxa. Bibliampix ukhamarakiwa. Gabriel sat mä wayna jilatax akham siwa: “Bibliat yatxatasax jan walinakar saykatañatakisa ukat yaqhanakar sum yanaptʼañatakis wakichatätwa. Chiqas kuntï Diosan Arupax yatichki ukarjam phuqañataki chʼamachasiñajawa” sasa (Deu. 11:18; Jos. 1:8). Jïsa, jiwasatakix walipuniw yatiqañax Diosan markapan utji ukat ukarjam phuqañataki chʼamachasiñasarakiwa (Pro. 2:1-5).
AMTAPUNIÑÄNI: ¿Janit jiwasatakix Diosan yatiñkankañapat yatxatañax wali askïki? (Rom. 11:33.) Chiqas ukhamawa. Ukampis ¿kunanakas sum yatxatañ yanaptʼistani? Nayraqatxa, Jupar mayisiñasawa, ukhamatwa qullan ajayupsa suma amuysa churistani. Ukxarusti, lupʼiñataki tiempo apsusiñasarakiwa. Ukat kuntï yatiqktan ukarjam phuqañsa janirakiw armasiñasäkiti. Ukham lurañäni ukhaxa, chuymas chuymäniwa, ukat yatiqatas utjarakiniwa.