Janipun kunas Jehová Diosampi jachʼar aptatäñat jarkʼistpati

1, 2. 1) Biblian ‘jachʼar aptatäña’ sasin jaqokipatäki uka arunakajja, ¿kunsa amuytʼayi? 2) ¿Kuna jisktʼanakarus aka yatichäwin qhanañchtʼasiskani?

‘JACHʼAR aptatäña’a sasin istʼta ukhajja, ¿kunsa amuyta? ¿Jehová Diosan muspharkañ luratanakapatti amuyta? (Apo. 4:11.) ¿Qamirinakaru, wali yatjjattʼatanakaru jan ukajj wali muspharkañ luririnakar jachʼañchapki ukanakatcha amuyta? Biblianjja, ‘jachʼar aptatäña’ sasin griego arut jaqokipatäki uka arojja, jathi sañ muni. Nayra tiemponjja, qollqjja qorita ukat qollqetwa lurapjjerïna. Ukat qhawqha jathïnsa ukarjamaw valorapajj uñjatäna. Ukatwa ‘jachʼar aptatäña’ sasin jaqokipatäki uka arunakjja, kunanakatï wali askirjam uñjatäki ukat muspharkañäki ukanakat parlañataki apnaqasiwayjje.

² Inas jaqenakajja, mayninakarojj munañanïtapata, aytatätapata jan ukajj wali uñtʼatätapata jachʼar aptapjjchi. Ukampis ¿Jehová Diosajj kunjam jaqenakarus jachʼar aptpacha? Proverbios 22:4 qellqatajj akham siwa: “Llampʼu chuymampi Tatitur ajjsaras sarnaqañajja, qamir kankaña, jachʼar aptatäña jakaña katoqañawa utji” sasa. Ukat discípulo Santiagojj akham sarakïnwa: “Dios nayraqatan jiskʼar tukupjjam, jupasti jachʼaruw aptapjjätam” sasa (Sant. 4:10). ¿Kunjamsa Jehová Diosajj jachʼar aptistu? Jehová Diosampi “jachʼar aptatäñjja”, ¿kunas jarkʼistaspa? ¿Mayninakajj jiwasjam jachʼar aptatäpjjañapatakejj kunsa lursna?

3-5. ¿Kunjamsa Jehová Diosajj jachʼar aptistu?

³ Salmo 73 qʼochu qellqerejja, Jehová Diosaw kupi amparapampi wayjjarutani ukat jachʼar aptitani sasaw taqe chuyma confiyäna (Salmo 73:23, 24 liytʼasiñapawa).b ¿Kunjamsa Jehová Diosajj altʼat chuyman servirinakapar jachʼar apti? Wali askirjam uñjasa ukat kunayman toqenakat bendicisa. Amuytʼañäni, Jupaw amtanakap sum amuytʼañ yanaptʼistu ukat Jupamp sum apasiñsa yanaptʼarakistu (1 Cor. 2:7; Sant. 4:8).

⁴ Ukat Jehová Diosajja, arunakap yatiyañasataki khithasaw jachʼar aptarakistu (2 Cor. 4:1, 7). Kunapachatï Jehová Diosar jachʼañchañataki ukat jaqenakar yanaptʼañatak yatiyir sartan ukhajja, Jupajj jachʼaruw aptistu. Ukat akham sarakistuwa: ‘Khitinakatejj nayarojj jachʼar aptapkitani, ukanakarusti jachʼaruw aptarakëjja’ (1 Sam. 2:30, NM). Ukhamasti Jehová Diosampejj wali askit uñjatäsnawa ukat tamankirinakas ukhamarakiw uñjistani (Pro. 11:16; 22:1).

⁵ Jehová Diosarutï taqe chuymampi suytʼañäni ukat kamachinakaparjam sarnaqañäni ukhajja, suma jakasiñwa jutïrin churistani. Bibliajj akham siwa: “[Jehová Diosaw] oraq katoqañamatakejj chʼamañchätam, ñanqha luririnakan tʼunjasïwip uñjarakïta” sasa (Sal. 37:34). Ukhamasti Jehová Diosaw wiñay jakañ churasajj jachʼar aptistani, uka suytʼäwinïtanwa (Sal. 37:29).

“JANIW JAQENAKAN JACHʼAÑCHÄWINAKAPJJA KATOQKTI”

6, 7. ¿Kunatsa waljanejj Jesusarojj jan iyawsapkäna?

⁶ Kunjamtï yateqaniwayktanjja, Jehová Diosajj jachʼar aptañwa munistu. Ukampisa, ¿kunas jachʼar aptatäñat jarkʼistaspa? Mayajj akäspawa: khitinakatï Diosamp jan askit uñjatäpki ukanakan amuyunakap askit uñjaña. Jesusan urunakapan utjkäna uka apnaqerinakarojj ukaw pasäna. Jupanakjjat kunsa apóstol Juanajj qellqatayna uk amuytʼañäni: “Walja judionakaw Jesusar iyawsapjjäna, yaqhep jilïri wali aytat jaqenakasa. Ukampis jupanakajj janiw jaqenakan istʼkata arsupkänti, fariseonakar ajjsaratanakap layku, sinagogat jan jaqsuyasiñataki. Diosamp jachʼañchayasiñat sipansa, jaqenakampiw jachʼañchayasiñ munapjjäna” sasa (Juan 12:42, 43). Fariseonakan amuyunakaparutï wali askit jan uñjapkaspänjja, sumaruw sartapjjaspäna.

⁷ Jesusajj Diosan Arupat aka Oraqen yatiykäna ukhajja, kunatsa waljanejj jupar jan katoqapkäna ukat jan iyawsapkäna uk sum qhanañchäna (Juan 5:39-44 liytʼasiñapawa). Israel markajja, walja maranakaw Mesiasana jan ukajj Criston puriniñap suyasipkäna. Ukat kunapachas Mesiasajj uñstañapäna uk sum Daniel profetajj qhanañchäna. Ukat inas Bautisir Juanar yatiyaskir uñjasajj yaqhepajj akham sapjjchïna: “Inas Juanajj Cristöchi” sasa (Luc. 3:15). Ukampis mä qhawqha phajjsinak qhepatjja, Jesusajj jupanak taypinwa yatiyaskäna. Ukat khitinakatï Ley sum uñtʼapkäna ukanakajj janiw Jesusarojj Mesiasarjam katoqapkänti. Kunatsa ukham pantjasipjjäna ukjja, akham sasaw Jesusajj qhanstayäna: “Jumanakatejj jaqenakan jachʼañchäwinakapak maynit maynita katoqapjjta ukatsti janiraki mä sap Diosata jachʼañchäwinakapa thaqapkstati, ukarojja ¿kunjäms jumanakajj iyawsapjjasmajja?” sasa.

8, 9. ¿Kunjamsa jaqenakampi jachʼañchatäñ munañajj Jehová Diosampi jachʼar aptatäñat jarkʼistaspa? Mä uñachtʼäwimp qhanañchtʼam.

⁸ ¿Jaqenakampi jachʼar aptatäñati wali wakiskirejja, jan ukajj Jehová Diosampi jachʼar aptatäñacha jukʼampi wakiskirejja? Uk sum amuytʼasiñatakejja, alajjpachan kʼajiri warawaranakampita ukat jachʼa markan utjki uka lusanakampita amuytʼañäni. Alajjpachanjja waranq waranqa warawaranakaw utji. ¿Alajjpach uñkatas ukham waranq waranqa warawaranak uñjatam amtastati? ¿Uka warawaranakan kʼajapjjatap uñjasajj waljjay musphartanjja? (1 Cor. 15:40, 41.) Ukampis walja lusanakani jachʼa markan jikjjatastan ukat alajjpachar uñkattan ukhajja, janiw waranq waranqa warawaranak uñj-jjtanti. ¿Kunatsa? ¿Callenakana ukat utanakana jan ukajj jachʼa altus utanakan lusanakapajj warawaranakat sipan jukʼamp sum qhantatapatti? Janiwa. Jan ukasti uka lusanakajj jiwas jakʼankatap laykuw warawaranak kʼajanir jan sum uñjañatak chʼamaktʼayistu. Muspharkañ warawaranak aruman uñjañatakejja, lusanak jiwtʼayaña jan ukajj mä chʼamak cheqar sarañaw wakisispa.

⁹ Kunjamtï jachʼa markan lusanakapajj jiwas jakʼankkejja, ukhamarakiw jaqenakampi jachʼar aptatäñajj chuymas jakʼankaspa, ukaw Jehová Diosampi jachʼar aptatäñat jarkʼistaspa. Kamsapjjanisa amigonakajajja jan ukajj familiaranakajasa sasin ajjsarasaw waljanejj Diosan suma yatiyäwinakapar jan iyawsañ munapkiti. Ukampisa, ¿Diosaru katuyasita cristianonakat kamsasispasa? ¿Jaqenakamp jachʼañchatäñ munapjjaspati? Mä waynat amuytʼañäni, jupajj kawkhantï taqenis jupar uñtʼapki uka cheqanwa yatiyañapa, ukampis Jehová Diosan Qhanañchiripätap janiw yatipkiti. ¿Uñjapjjetaniwa sasinti ajjsarayasini? Yaqha jilatat amuytʼarakiñäni, jupajj jukʼampwa Diosar yupaychañatakejj chʼamachasiski, ukampis mayninakajj jupat wal larusipjje. ¿Kamachanisa? ¿Diosar jan taqe chuyma yupaychapki ukanakan amuyunakapampit apayasini? ¿Ukat mä cristianotï jachʼa juchar purtʼaschi ukhasti? ¿Taman luräwinakap jan aptʼasiñ laykuti jan ukajj familiaranakaparu ukat amigonakaparu jan chuym ustʼayañ munatap laykucha juchap jan arsuskani? Jupatakitï Jehová Diosamp sum apasiñajj wali wakiskirïchejja, ukhaman uñjasisajj jankʼakiw tamankir irpir chuymaninakarojj yanaptʼayasiñatak jawsani (Santiago 5:14-16 liytʼasiñapawa).

10. 1) Mayninakajj kunsa jiwasat amuyi ukatak wal lupʼisksna ukhajja, ¿kunas pasaspa? 2) ¿Altʼat chuymanïñäni ukhajj kunas pasistani?

¹⁰ Jiwasatï suma cristianöñataki chʼamachasisksna ukat mä jilatas jan ukajj mä kullakas ewjjtʼistaspa ukhajj ¿kamachañänisa? Altʼat chuymanïñäni ukhakiw ewjjtʼa arunakapajj yanaptʼistani. Ukhamasti kunapachatï ewjjtʼapkistu ukhajja, ukajj janiw ukhamäkiti sasin suma jaqet uñtʼayasiñatakikejj janipun saykatañäniti. ¿Mä jilatarutï mä luräwin yanaptʼañ waktʼistani ukhasti? ¿Suma amuytʼanïtasata jan ukajj chʼamachasitasatcha jachʼañchtʼayasiñ munañäni? Ukhamanti jikjjatasiñänejja, ak amtapuniñäni, “jiskʼaru tukuñawa [jan ukajj altʼat chuymanïñaw] jachʼar aptatäñjja utjayi” (Pro. 29:23).

11. Jachʼañchtʼapkistu ukhajja, ¿kun lurañasäspasa, ukat kunatsa?

¹¹ Khitinakatï taman sarayapki jan ukajj sarayirïñ munapki ukanakajj janiw mayninakampi jachʼar aptatäñ thaqhapjjañapäkiti (1 Tim. 3:1; 1 Tes. 2:6). Ukat mayninakatï mä jilataru kuns sum luratapat taqe chuyma jachʼañchtʼapjjani ukhajja, ¿kunsa jilatajj lurañapa? Cheqansa, janiw Saúl reyjamajj sutipjjar “mä jachʼa pilar” saytʼayasiñapäkiti (1 Sam. 15:12). Ukjja Jehová Diosan yanapapampikiw phoqhawayta, ukat jutïrinsa Jupan bendicionapampi ukat yanaptʼapampikirakiw phoqhäjja, ¿sasat jupajj amuyi? (1 Ped. 4:11.) Kunapachatï mayninakajj jachʼañchtʼapkistu ukhajj kunjamsa jikjjatastan ukaw khitimpi jachʼañchatäñs thaqhasktan uk qhanstayani (Pro. 27:21).

“KUNTEJJ [AWKIMAJJ] MUNKI UKWA LURAPJJARAKTAJJA”

12. ¿Kunatsa yaqhep judionakajj Jesusan arunakap jan istʼañ munapkäna?

¹² Jan walinak lurañ munañaw Diosampi jachʼar aptatäñ jarkʼarakistaspa, uka munañampik apnaqayassna ukhajja, inas kunatï cheqäki uk istʼañ jan munkchiñäniti (Juan 8:43-47 liytʼasiñapawa). Supayan munañanakap lurañ munasaw yaqhep judionakajj jan istʼañ munkituti sasaw Jesusajj säna. Ukatwa jupanakar akham säna: “Kuntejj [awkimajj] munki ukwa lurapjjaraktajja” sasa.

13, 14. 1) ¿Lejjwisata ukat jaqenakan arunakapat kunas yatisi? 2) ¿Khitirus istʼañäni uk kunjamatsa amuytʼassna?

¹³ Awisajj kuntï istʼañ munktan ukakwa istʼtanjja (2 Ped. 3:5). Kuntï jan istʼañ munktan uk lejjwisajj (lajjwi) janiw katoqkiti, ukhamwa Jehová Diosajj lurawayistu. Amuytʼañataki, ak lurañ yantʼam: añchhitajj kunanaksa istʼaskta uk amuytʼam. Inas ninkharajj ukanakat yaqhepjja jan istʼkchiyätati. Kunattejj lejjwisajja, kuntï istʼktan uk taqsa katoqchispajja, kuntï lurañamäki ukar chuym churañatakiw yanaptʼaskayätamjja, ukatwa ukanak jan istʼkayätati. Ukampis akaw yatisiraki, kunapachatï jaqenakajj mayak taqenis parlarpayapjje ukhajja, kuntï sapa maynejj arski uk janiw amuyañjamäkiti. Ukatwa kunapachatï pä jaqejj pachpa tiempon parljjayapjjeristam ukhajja, khitirus istʼäta uk ajlliñamajja, kunattejj janiw panpachanirojj kuntï sasipktam uk istʼkasmati. Ukhamajja, kunsa istʼañ munta ukarjamaw khitirus istʼäta uk ajllïta. Ukwa judionakajj lurapjjäna, jupanakajj Supayan munañapwa lurañ munapjjäna, ukatwa Jesusarojj jan istʼañ munapkänti.

¹⁴ Proverbios librojja, yatiñ kankañata ukat pisi yatiñat parlistu (Pro. 9:1-5, 13-17). Yatiñ kankañasa ukat pisi yatiñasa jupanakar istʼañasatakiw pachpa tiempor parljjayistu. ¿Khitirus istʼañäni? Khitin munañapjjay lurañ munstan ukaruw istʼañäni. Jesusan ovejanakapajj arup istʼasaw jupar arkapjje (Juan 10:16, 27). Jupanakajj ‘cheqanwa sarnaqapjje’ ukat janiw yaqhanakan arup uñtʼapkiti (Juan 10:5; 18:37). Khitinakatï ukhamäpki ukanakajja, altʼat chuymanïpjjewa, ukatwa Diosamp jachʼar aptatäpjjani (Pro. 3:13, 16; 8:1, 18).

“JUMANAKATAKEJJ MÄ JACHʼA JACHʼAÑCHÄWIWA”

15. ¿Kunatsa Pablon tʼaqhesitanakapajj mayninakatak mä jachʼañchäwïnjja?

¹⁵ Kuntï Jehová Diosan munañap lurkasajj aguantktan ukajj Diosamp jachʼar aptatäñatakiw jaqenakar yanaptʼi. Apóstol Pablojj akham sasaw Éfeso markankir jilat kullakanakar qellqäna: “Ukatpï jumanakarojj achiktʼapjjsmajja, jumanak layku tʼaqhesitajjatjja jan pächasipjjamti, antisas akajj jumanakatakejj mä jachʼa jachʼañchäwiwa” sasa (Efe. 3:13). ¿Uka arunakampejj kamsañsa Pablojj munäna? ¿Kunatsa tʼaqhesitanakapajj mayninakatak mä jachʼañchäwinjja? Kunattejj yantʼanakansa uñjaskchïnjja, jilat kullakanakaparojj yanaptʼaskakïnwa. Uk lurasaw Jehová Diosar serviñajj taqe kunat sipansa wali askïtap uñachtʼayäna. Pablotï ukham yantʼanakan aynachtʼaspäna ukhajja, Jehová Diosamp sum apasiñasa, Diosan Arupat yatiyañasa, ukat suytʼäwipasa janis kuna askïkaspa ukhamwa uñachtʼayaspäna. Ukham aguantasaw Pablojj Cristor arkañajj wali wakiskirïtapa ukat jupar arkañatak chʼamachasitanakapas jan inamayätap uñachtʼayäna.

16. ¿Kuna jan walinakansa Pablojj Listra markan uñjasïna?

¹⁶ Pablon jan aynachtʼatapa ukat aguantatapaw mayni jilat kullakanakar yanaptʼpachäna. Hechos 14:19, 20 qellqatajj akham qhanañchi: “Mä qawqha judionakaw purinipjjäna, Antioquiampita Iconiompita. Jaqenakar amtayasinsti Pablorojj qalampiw kʼupjayapjjäna, ukatsti: ‘Jiwatäjjew’ sasaw [Listra] marka anqäjjarojj qatatnukunipjjäna. Kunapachatejj Tatitur arkirinakajj Pablo nayraqatar sarthapipjjäna ukapachajja, jupajj saytʼasisinwa wasitat markar mantjjäna. Qhepürusti Bernabeampejj Derbe markaruw sarjjapjjäna”. Uka urojja jiwatawa sasaw sapjjäna, ukampis qhepürojj 100 kilometronakwa Pablojj kayuk sarjjäna.

17, 18. 1) Kunjamsa Pablojj Listra markan tʼaqhesiwayäna uk Timoteojj ‘sumwa arkatayna’ sasajja, ¿kunatsa sissna? 2) ¿Kunjamsa Pablon tʼaqhesïwipajj Timoteor yanaptʼpachäna?

¹⁷ Pablojj ukham jan walin uñjaskäna ukhajj inas Timoteojj jupar yanaptʼchïna, ukampis Hechos librojj janiw uka toqet qhanañchkiti. Kuntï Pablojj Timoteor payïr cartapan qellqkäna uka toqet amuytʼañäni: “Jumajj sumwa arkawayta nayan yatichäwinakajjaru, sarnaqatajjaru” sasaw säna. Timoteojj janiw Antioquía markat Pablor jaqsupjjatapak yatkänti, jan ukasti Iconio markan jiwayañ munapjjatapsa ukhamarak Listra markan qalamp kʼupjapjjatapsa sum yatïna (2 Tim. 3:10, 11; Hech. 13:50; 14:5, 19).

¹⁸ Kunjamsa Pablojj tʼaqhesiwayäna ukat kunanaksa aguantawayäna ukanak Timoteojj ‘sumwa arkatayna’. Timoteojj Pablon sarnaqäwipat wal yateqpachäna. Ukat Pablojj Listra markar kutʼkäna ukhajja, “Listrankir ukhamarak Iconionkir jilatanakasti [...] Timoteorojj wali suma jaqetwa uñtʼapjjäna” (Hech. 16:1, 2). Tiempompejja, Timoteojj taman jukʼamp luräwinak katoqañatakejj wakichtʼatäjjänwa (Fili. 2:19, 20; 1 Tim. 1:3).

19. ¿Kunjamsa aguantatasajj mayninakar yanaptʼaspa?

¹⁹ Jehová Diosan munañap jan aynachtʼas lurañäni ukhajja, ukhamarakiw mayninakajj jiwasat yateqasipjjaspa, yamas wayn tawaqonakaw jukʼamp yateqasipjjaspa. Sarnaqatas uñjasaw jupanakajj Jehová Diosan suma servirinakapar tukupjjaspa. Kunjamsa jaqenak nayraqatan parlktan, Diosan Arup yatiytan ukat jan waltʼäwinakar saykattan uk sumwa jupanakajj uñjapjje. Ukatwa Pabljamajj taqe kuna aguantañasa, ukhamat mayninakarojj Diosat jan jitheqtapjjañapataki ukat “wiñay jachʼa qhespiyasiña katoqapjjañapataki”, mä arunjja, jachʼar aptatäpjjañapatak yanaptʼañäni (2 Tim. 2:10).

20. ¿Kunatsa Jehová Diosampi jachʼar aptatäñ thaqhañasa?

²⁰ Ukhamajja, ¿‘Diosampi jachʼar aptatäñ thaqhaskakiñasajjaya’? (Juan 5:44; 7:18.) Khitinakatï Diosampi jachʼar aptatäña thaqhapki ukanakarojj Jehová Diosajj wiñay jakañwa churani. Ukhamarusa, sarnaqatasajj Jehová Diosat jan jitheqtapjjañapataki ukat wiñay jakañ jikjjatapjjañapatakiw mayninakar yanaptʼaspa. Ukhamasti janipun kunas Jehová Diosampi jachʼar aptatäñatjja jarkʼistpati.