NAYRÏR JANAN PʼEQEÑCHÄWIPA: ¿KUNAPACHAS YAQHACHASIÑANAKAJJ TUKUSJJPACHÄNI?
Yaqhachasiñanakajj Oraqpachanwa utji
ESTADOS UNIDOS markankir Jonathan sat mä jaqerojj jiskʼitatpachwa jañchip laykojj jiskʼachapjjerïna, kunattejj awk taykapajj Corea sat markatapjjänwa. Ukatwa kawkhantï uñnaqtʼap layku jan ukajj jañchip layku jan yaqhachapkaspa ukhar sarjjäna. Doctoräñatak yatjjatasajj Alaska sat markan alay toqen mä jiskʼa markaruw sarjjäna (Estados Unidos), ukat jupamp qollayasipkäna ukanakajj niya taqeniw jupjamäpjjäna. Janis uka cheqan yaqhachasiñajj utjkaspa ukhamwa jupajj amuyarakïna.
Ukampis kuntï jupajj amuykän ukajj janiw ukhamäkänti, ¿kunatsa? Mä kutejj 25 maran mä warmiruw qollaskäna, jupajj niya jiwañampiskänwa, ukat jakatatjjäna ukhajj jan wali arunakampiw toqjjäna, Corea markankirinakar uñisitap layku. Ukham uñjasajj Jonathan waynajj wal chuym ustʼayasïna, ukhamatwa taqe cheqan yaqhachasiñanak utjatap amuyarakïna.
Jonathanan sarnaqäwipajj taqe cheqan yaqhachasiñ utjatapwa amuyayistu. Amuyatajj kawkhantï jaqenakajj utjki ukan yaqhachasiñajj utjakipuniwa.
Yaqhachasiñarojj jan walitwa jaqenakajj uñjapjje, ukampis jaqenak taypinjja, yaqhachasiñajj utjaskakiwa. Cheqansa, yaqhachasiñarojj jaqenakajj uñisipjjewa, ukampis ¿kunatsa jaqenak taypin ukajj utjaskakpacha? Khitinakatï yaqhachasiñarojj jan walit uñjapki ukanakajj jupanak pachpan yaqhachasiñ utjatap janiw amuyasipkiti. ¿Ukhaman uñjasirakismati?
TAQENIW YAQHACHASIRITÄNJJA
Jaqenakar yaqhachañajj utjiti janicha uk amuyañajj chʼamakïspawa, ¿kunatsa? Kunattejj ‘jaqen chuymapajj kʼarintiriw’ sasaw Bibliajj qhanañchi (Jeremías 17:9). Ukampis ‘nayajj taqenimpiw sum apasta janiw khitirus yaqhachkti’ sasin amuysna ukhajj pantjasnawa, jan ukajj ‘jupanakajj jan walinak lurawayapjjetu, ukatwa jupanakar yaqhachta’ sasin amuyasinsa pantjasiraksnawa.
Akhaman uñjasisma ukhajj ¿kunjamakis jikjjatasisma?
Yaqhachasirïtanti janicha uk yatiñatakejja, mä chʼusa ukat chʼamak callenjams sarkasma ukham amuytʼañäni, ukat thakinjam sarkasin mä akatjamat pä jachʼa tansa jaqenakan chʼiwip uñjasma ukat amparapansa mä kuna aptʼasitapjjaspa ukhajj ¿kamachasmasa?
¡Jan walin uñjasta! ¿Sasint sasma? Inas ukham jan walinakan uñjasisin jichhajj wali amuyump sarnaqjjsta. Ukampis uka pä jaqenakar uñjasin ¿jan wali jaqenakaw sasin jankʼak amuyañajj walikïspati? Amuytʼaskakiñäni, ¿kuna kasta jañchinïpachasa jan ukajj kawkïr markatäpachaw sasmasa? Uka jisktʼar qhanañchasaw yaqhachasirïtat janicha ukajj qhan amuyasispa.
Cheq parlkasajj chuymasan taqeninwa yaqhachasiñajj utjaspa, uk janiw khitis janiw siskaspati. Jichhürunakan kuna kasta yaqhachasiñas utji uk Bibliajj mä toqet akham qhanañchi “jaqejj uñnaqakwa uñjejja” sasa (1 Samuel 16:7). Jïsa ukhamawa, taqeniw jan sum yatkas yaqhanakar yaqhachsna, ukat jukʼamp jan walinakakwa utjayaspa. Ukhamajj ¿kunjamatsa yaqhachasiñajj jiwasan jan utjkaspa? Ukat ¿kunapachas yaqhachasiñajj oraqpachan jan utjjpachäni?