BIBLIA TOQET JISKTʼANAKA
¿Kunatsa Oraqpachan sumankañajj jan utjkpacha?
Khititï jaqenakan chuymapat jan wali amtanak chhaqtaykaspa uka apnaqerikiw Oraqpachan sumankañ utjayaspa
Uk sum amuyañatakejj Bibliajj pä toqet qhanañchistu. Mayajj akäspawa, niyakejjay jaqenakajj walja askinak jikjjatawayapjjchejja, janiw jupanak pachpa apnaqasiñatak luratäpkiti. Ukatjja, ‘taqe aka Oraqpachas Supayan munañapankarakiwa’, ukatwa jaqenakajj sumankañ jan jikjjatawayapkiti. (Jeremías 10:23 ukat 1 Juan 5:19 liytʼäta.)
Ukat jaqenakajj jupatakik kuns muniri ukat jupanakan askipak thaqheri ukhamäpjjewa, ukanakaw Oraqpachan sumankañ jan utjañapatakejj jarkʼaraki. Ukhamajj Oraqpachan sumankañ utjañapatakejj Oraqpachan mä apnaqäwikiw utjañapa, ukarakiw jaqenakarojj khuyaptʼayasirïñataki ukat kunatï askïki ukar munasipjjañapataki yatichañapa. (Isaías 32:17; 48:18, 22 liytʼäta.)
¿Khitis aka Oraqen sumankañ utjayani?
‘Taqe Oraqpachankir gobiernonak lantejj mä apnaqäwikwa uttʼayä, ukat ukarakiw taqe jaqenakarojj apnaqani’ sasaw taqe chʼamani Diosajj arsuwayäna (Daniel 2:44). Ukat uka apnaqäwjja Jesusarakiw apnaqani, jupat Bibliajj akham siwa: “Sumankañan Jilïripa” sasa. Cheqas jupaw jan walinak tukjani, ukat sumankañan sarnaqapjjañapatakiw jaqenakar yaticharakini. (Isaías 9:6, 7; 11:4, 9 liytʼäta.)
Jichhürunakanjja, walja millón millón jaqenakaw Jesucristona ukat Biblian yanaptʼapampejj sumankañan jakasipjjañapataki jaqenakar yatichasipki. Ukhamajj niyaw Oraqpachan sumankañajj utj-jjani. (Isaías 2:3, 4; 54:13 liytʼäta.)