Diosajj janiw sutinïkiti sasaw kʼarisipjje

¿JAQENAKAJJ KAMSAPJJESA?

“Diosajj sutiniti janicha ukajj janiw yatiskiti. Sutinïchi ukhajja, janirakiw sutipsa yatkaraksnati.” (David Cunningham yatjjattʼat chachan Theological Studies libropana.)

¿BIBLIAJJ KAMSISA?

Dios pachpaw akham säna: “Nayätwa Tatitojj,a ukarakiw sutejjajja” sasa (Isaías 42:8). Hebreo arunjja, Jehová sutejja “Kuntï Jupajj Munki ukjja Phoqhasiyapuniwa” sañ muni.

Jehová Diosajj sutipat aytañaswa muni. Bibliajj akham siwa: “Jupar [jan ukajj sutipat] artʼasipjjarakim, markanakarusti yatiyapjjarakim kuntejj jupajj lurki ukanaka, amtayapjjarakim jupajj taqe kunjjankatapa” sasa (Isaías 12:4).

Jesusajj Diosan sutip aytapunirïnwa ukat arkirinakaparus yaticharakïnwa. Mä kutejj akham sasaw Awkipar oracionan säna: “Jupanakarojj uñtʼaysmawa”. ¿Kunatsa uk luräna? Jupajj akham saskakïnwa: “Kunjämtejj nayaru munasista uka munasiñajj jupanakampïñapataki, nayasti jupanakampïñajjatakiraki” sasa (Juan 17:26).

¿KUNATSA UK YATJJATAÑAJJ WAKISISPA?

Biblia toqet yatjjattʼat Walter Lowrie sat chachajj akham sasaw qellqatayna: “Khititï Diosar sutipat jan uñtʼki ukajja, janiw Diosar uñtʼkiti [...] ukat jan uñtʼasajj janiw Juparojj munaskaspati” sasa.

Victor sat mä chachajja, sapa semanaw Iglesiar sarirïna, ukampis janiw Diosat kuns yatkänti. Jupajj akham siwa: “Diosajj Jehová sutinïtap yateqta ukhajja, Juparus uñtʼayapkitaspa ukhamänwa. Jupjjat walja kutiw parlir istʼirïta, ukampis jichhapuniw Juparojj uñtʼta. Diosarojj uñjkiristsa ukhamwa amuyasta, jichhajj munat amigojäjjewa” sasa.

Bibliajj akham sistuwa: “Tatay, sutim yatirinakajj jumaruw iyawsapjjtam, jumar thaqerinakarojj janipuniw apanukktati” sasa (Salmo 9:10). Sutipat artʼasipki ukanakarojja, Diosajj bendiciwa. Bibliajj akham siwa: “Taqe khititejj Tatitun sutipa artʼaski ukajj qhespiyatäniwa” sasa (Romanos 10:13).