Diosajj wali qhoru Diosawa sasaw kʼarisipjje

¿JAQENAKAJJ KAMSAPJJESA?

“Jachʼa juch luras jiwapki ukanakan almapajja, jankʼakiw infiernor sarjje, ukat ukanwa ‘wiñay aqkir ninan’ tʼaqhesiski.” (Catecismo de la Iglesia Católica.) Infiernonjja, jaqejj Diosat jitheqtatapuniwa sasaw Iglesia pʼeqtʼirinakat waljanejj sapjje.

¿BIBLIAJJ KAMSISA?

“Jiwatanakajj janiw kunsa yatipkiti.” (Eclesiastés 9:5.) Ukhamajja, jiwatanakatï jan kuns yatipkchejja, ¿kunjamarak ‘wiñay aqkir ninan’ tʼaqhesipjjaspasti, jan ukajj Diosat jitheqtatäpjjaspasti?

Gehena siski uka griego arojja, aymara Biblianjj ‘infierno’ sasin jaqokipatawa. Ukajja, jan mayampitaki tukjaña sañ muni, ukat janirakiw kunäkipansa ukat jaktankaspati. Ukhamasti ukajj janiw ‘wiñay aqkir ninan’ tʼaqhesiñ lugaräkiti (Mateo 5:29). Ukat Biblianjja “nina asufre qota[twa]” parlaraki (Apocalipsis 20:10). ¿Ukajj kamsañs muni? Bibliajj akham qhanañchi: “Aka nina qotasti payïri jiwawa” sasa (Apocalipsis 20:14; 21:8). Ukhamajj janiw mä cheqpach tʼaqhesiñ lugaräkiti, janirakiw cheqpach aqkir ninäkiti. Cheqansa, nina qotan wiñayatak tʼaqhesiñajj “payïri jiwa[mpi]” sasiwa, janiw ukat jaktañajj utjkiti.

¿KUNATSA UK YATJJATAÑAJJ WAKISISPA?

Diosar mä qhoru Diosjam uñjañajj Jupat jitheqtayistuwa. México markankiri Rocío warmejj akham siwa: “Infiernon utjatap jiskʼatpachaw yatichapjjetäna. Ukatwa Diosar wal ajjsarirïyäta, Jupajj janis munasirïkaspa ni khuyapayasirïkaspa, ukat coleratakïkaspasa qhorükaspasa ukham amuyayäta” sasa.

Kuntï Bibliajj Diosata ukat jiwatanakat qhanañchi uk yatiñaw Rocío warmirojj yanaptʼäna. Jupajj akham siwa: ‘Kunatï cheqäki uk yatisajja, sumakiw jikjjatasjjayäta. Ukat Diosajj jiwasan askis munirïtapa, wali munasirïtapa ukat jiwasas Jupar munasiraksna ukwa amuyasiyäta. Jichhajja, kunjamtï mä munasir awkejj wawanakapar wali sum uñjki ukat jupanakatak askinak munki ukhamwa Diosar uñj-jjta’ sasa (Isaías 41:13).

Infiernor ajjsarasaw waljanejj Dios chuyma tukupjje, ukampis Diosajj jan ajjsaras Jupar yupaychsna ukwa muni. Uka toqet Jesusajj akham sänwa: “[Jehová] Dios Tatitumaruw munäta” sasa (Marcos 12:29, 30). Maysa toqetjja, Diosajj jichhürunakan jaqenakar jan tʼaqhesiyatap amuytan ukhajja, kunjamtï jutïrin juchañchkani ukarojj confiysnawa. Kunjamtï Job chachan Eliú amigopajj siskän ukhamarakiw jiwasajj sissna: “Cheqpachansa taqe chʼamani Diosajja, janiw kuna ñanqhsa, kunatejj jan cheqapäki uksa lurkiti” sasa (Job 34:12).