Jiwatanakajj jaktanipjjaniwa

Jiwatanakajj jaktanipjjaniw sasin Biblian yatichki ukar ¿confiytati?a Munat familiaranakasana ukat amigonakasan jaktanipjjañap yatiñajj wali kusiskañapuniwa, ukampis ¿ukajj cheqäpachati? Uk yatiñatakejja, Jesusan apostolonakapat yatjjatañäni.

Jiwatanakajj jaktanipjjaniwa sasin taqe chuymaw Jesusan apostolonakapajj iyawsapjjäna. ¿Kunatsa? Uk pä toqet amuytʼañäni. Mayajj akäspawa: Jesús pachpaw jiwatat jaktayatäna, ukatwa jupanakajj uka suytʼäwirojj taqe chuyma atinisipjjäna. Janiw apostolonakakejj Jesusarojj jaktanit uñjapkänti, jan ukasti ‘phesqa pataka jilatanakaw’ uñjapjjarakïna (1 Corintios 15:6). Ukhamarusa, Jesusan jiwatat jaktanitapajj qellqatawa ukat kunjamtï Mateo, Marcos, Lucas ukat Juan libronakan qhanañchaskejja, niya taqeniw ukarojj iyawsapjjäna (Mateo 27:62–28:20; Marcos 16:1-8; Lucas 24:1-53; Juan 20:1–21:25).

Payasti akarakïspawa: Apostolonakajj Jesusar kimsa jiwatanakar jaktayirwa uñjapjjäna. Mayirejja Naín markana, payïristi Capernaum markana ukat kimsïristi Betania markanaraki (Lucas 7:11-17; 8:49-56; Juan 11:1-44). Betania markanjja, Jesusajj Lázaro amigoparuw jiwatat jaktayäna. Uka toqet sum yatjjatañäni.

‘NAYÄTWA JAKTAÑAJJA’

“Jilamajj jaktaniwa” sasaw Jesusajj Martar säna. Jupan Lázaro jilapajj pusi uruw jiwatäjjäna. Qalltanjja, kuntï Jesusajj siskän uk Martajj janiw amuykänti, kunattejj jutïrinsa jilapajj jaktankaspa ukhamwa amuyäna, ukatwa akham säna: “Jaktañapjja yattwa” sasa. Ukat Jesusajj akham sarakïnwa: “Nayätwa jaktañasa, jakañasa” sasa, ukat ukspachaw Lazaror jaktayäna. Uk uñjasajja, Martajj walpun muspharpachäna (Juan 11:23-25).

Ukat Lazarojj pusi urunak jiwatäkäna ukhajja, ¿kawkïnkaskpachänsa? ¿Jupajj jaktasajj yaqha cheqansa jakkaspa ukhamti parlpachäna? Janiwa. Almapajj janiw alajjpachar sarkänti ni Diosan jakʼaparus sarkänti, Lazarojj janiw jan jiwir almanïkänti. Ukhamajj janiw Jesusajj munkir jan munkir alajjpachat aka Oraqer kuttʼayankänti. Ukhamasti ¿kawkïnkaskpachänsa? Kawkharutï imapkäna ukanwa iktʼaskäna (Eclesiastés 9:5, 10).

Amtañäni, jiwañajj ikimpi sasiwa ukat jiwatat jaktayatäjje ukhajj ikitsa sartkaspa ukhamawa sasaw Jesusajj säna. Ukat akham saskakïnwa: “‘Lázaro amigosajj ikiskiwa, ukampis nayajj sartayanïwa’ sasa. Discipulonakapasti ukjjarojj sapjjarakïnwa: ‘Tata, ikiskchi ukajja, waliptaskaniwa’ sasa. Ukampis Jesusajj uk sasajja, Lazarojj jiwataw sañ munäna, discipulonakapasti amuyapjjänwa cheqpach ikiskatapa. Ukatwa Jesusajj jupanakarojj qhan sarakïna: ‘Lazarojj jiwatäjjewa’” sasa (Juan 11:11-14). Jesusajj Lazaror jaktayasajj familiaparuw katuyjjäna. ¡Martan familiapatakejj ukajj mä jachʼa bendicionapunïnwa!

Jesusajj aka Oraqen jiwatanakar jaktaykäna ukajja, Diosan Reinopan Apnaqjjani ukhajj kuntï lurkani ukwa uñachtʼayaskäna.b Alajjpachat aka Oraqjjar apnaqkani ukhajja, taqe jiwatanakaruw kawkhantï imatäpki uka cheqat jaktayani. Ukatwa Jesusajj akham säna: ‘Nayätwa jaktañajja’ sasa. ¡Munat familiaranakasaru ukat amigonakasaru jiwatat jaktanir uñjañajj kunja kusiskañakïkani! Ukat jiwatat jaktanipkani ukanakas kusisipjjarakiniwa (Lucas 8:56).

IYAWSÄWINÏÑASAWA

Jesusajj Martar akham sänwa: “Khititejj nayaru iyawsarakitu ukajja jiwatäkanisa, jakaniwa. Taqe khititejj jakki, nayaru iyawskarakitu ukanakajj, janiw jiwkaniti kunapachasa” sasa (Juan 11:25, 26). Khitinakarutï Jesusajj waranqa maranak apnaqäwipan jaktaykani ukanakajj wiñayatakiw jakapjjaspa, ukampis Jesusaruw iyawsapjjañapa.

Jiwatanakar jaktayañ toqet qhanañchasajja, akham sasaw Martar jisktʼäna: “¿Iyawstati ukjja?” sasa. Ukat jupajj akham sarakïnwa: “Jïsa Tata, nayajj iyawstwa jumajj Cristötama, Diosan Yoqapa, akapachar jutañapäkän uka” sasa (Juan 11:26, 27). Jiwatat jaktañajj utjaniwa siski ukarojj Martajj taqe chuymaw iyawsäna, ¿jumajj ukham iyawsäwinïñ munarakismati? Ukhamächi ukhajja, Diosan amtapajj kunas jaqenakataki ukwa nayraqat yatjjatañama (Juan 17:3; 1 Timoteo 2:4). Ukaw iyawsäwinïñatak yanaptʼätam. Kuntï Bibliajj jiwatat jaktaniñ toqet siski uk yateqañatakejja, ¿janit Jehová Diosan Qhanañchirinakapar yanaptʼa maykasma? Jupanakajj wali kusisitaw Bibliamp qhanañchapjjätam.