Wali wakiskir mä libro

Bibliar uñtasit yaqha librojj janiw utjkiti. Nayra tiempotpachwa, Diosar creyipjjañapatakejj walja jaqenakar Bibliajj yanaptʼawayi. Ukhamarusa, jaqenakajj walpun Biblia uñakipawayapjje ukat kunayman jan walinakwa parlawayapjjaraki.

Amuytʼañataki, yaqhep yatjjattʼatanakajja, ‘jichha tiempon utjki uka Biblianakajj janiw nayra tiempon qellqatäkäna ukhamäjjeti’ sasaw sapjje. Uka toqetjja, religión toqet yatjjattʼat mä chachajj akham sänwa: “Bibliajj sumti copiasiwaypacha janicha ukjja janiw sum yatktanti. Jichhürun utjkistu uka Biblianakajj pantjatawa, kunattejj walja maranak qhepatwa Bibliajj copiasiwayi, ukatwa nayra qellqatanakampejj jan pachpäkiti” sasa.

Yaqhepanakajja, familiapan kunanakatï yatichaskäna uka laykuw Bibliajj janiw cheq parlkiti sasin sapjjaraki. Amuytʼañataki, Faizal chachan familiapajj janiw cristianökänti, Bibliajj qollanawa ukampis mayjtʼayatawa sasaw juparojj yatichapjjäna. Jupajj akham siwa: “Jaqenakajj Bibliat parlapkitäna ukhajja, janiw confiyirikti. Jupanakajj janiw qalltan utjkäna uka Biblianïpkänti, Biblianakapajj mayjtʼayatawa sasaw amuyirïta” sasa.

¿Bibliajj mayjtʼayatati janicha uk yatiñajj wakispachati? Ak amuytʼañäni: Bibliajj jutïr urunakatakejja, suma yatiyäwinakaniwa. Uka arunakajj nayra Qollan Qellqatan janiw qellqatäkpachänti sasin pächasna ukhajja, kuntï Diosajj jutïr urunakatak arsuwayki ukar ¿confiysnanti? (Romanos 15:4). Biblianakatï mayjtʼayatächi ukhajja, trabajo jikjjatañatakisa, familian kusisit jakasiñatakisa, jan ukajj Diosar yupaychañatakis ¿yanaptʼayassnati?

Qalltan utjkäna uka Qollan Qellqatanakajj janis jichhürunakan utjchejja, uka qellqatanakat copiaskäna ukanakatwa yatjjatsna, ukanakajj amparampiw copiasïna. Bibliajj jan walinakan uñjaskasasa, jaqenakan chhaqtayaña, mayjtʼayaña munatpachasa ¿kunjamatsa jan chhaqtayasiwayki? Ukanakat yatjjatañajja, ¿kunjamsa Bibliar jukʼamp confiyañatak yanaptʼiristam? Akjjar jutki uka yatichäwinakanjja, uka jisktʼanakaruw qhanañchasiskani.