“Lurañasti wali jachʼawa”

JERUSALÉN markanjja, wakiskir mä tantachäwiw apasiñampïski. David reyejj israelankir jilïri chachanakaru, reyin servirinakaparu, ejerciton taqe aytata oficialanakaparuw tantachtʼäna. Jupanakajj wakiskir mä yatiyäwi istʼañ wal suyasipki. Jehová Diosajja, Davidan Salomón yoqaparuw Jupar yupaychañataki mä uta lurañapataki mayïna. Chuymankipstata David reyejj Diosan amuytʼayataw templo lurañataki mä plano luräna, uksti Salomón yoqaparuw churäna. Ukatsti akham sarakïnwa: “Lurañasti wali jachʼawa, uka lurañasti janiwa jaqetaki palacio lurañäki ukhamäkiti, jan ukasti Tatit Diosataki templo lurañäki ukawa” sasa (1 Cró. 28:1, 2, 6, 11, 12; 29:1).

Ukatjja, Davidajj ukankirinakar akham jisktʼäna: “Jichhasti ¿khitisa aski chuymampi churañ muni Tatitutakejja?” sasa (1 Cró. 29:5). Jumatï ukankasmäna ukhajja, ¿kamsasmänsa? ¿Templo lurañatak yanaptʼasmänti? Israelitanakajj yanaptʼapjjänwa. “Ukham walja churapjjatapatjja walwa kusisipjjäna, jupanakajj taqe chuymawa Tatitur churapjjäna uka layku” (1 Cró. 29:9).

Walja maranak qhepatsti, jaqen lurat templot sipansa, Diosajj yaqha templo uttʼayäna, ukasti Jesusan jiwatapjjar uttʼayatawa, uka toqew jaqenakajj Jehová Diosar servipjjaspa (Heb. 9:11, 12). Jichhürunakanjja, ¿kunjamsa Jehová Diosajj jupampi sum apasipjjañapatak jaqenakar yanaptʼi? Yatiyir sarktan uka toqew yanaptʼi (Mat. 28:19, 20). Ukham yatiyasitapatjja, sapa maraw waranqa waranqa jaqenakar Bibliat yatichasi, waljaniw bautisasipjje, ukatjja walja tamanakaw uttʼayasiraki.

Ukatwa Bibliat apstʼat qellqatanak jukʼamp imprimiñajj wakisi. Tantachasiñ Utanak lurañasa, sumäskakiñapataki askichtʼañasa, ukat jachʼa tantachäwinakatak utanak lurañas wakisirakiwa. Ukhamasti Diosan suma yatiyäwinakap yatiyasiñapatak yanaptʼañajja wali kusiskañawa (Mat. 24:14).

Jehová Diosan servirinakapajj Juparusa, jaqe masiparus wal munasipjje, ukatwa suma yatiyäwinak yatiyañajj kunja wakiskirisa uk amuyasajj taqe chuymampi Diosatak qollqe churapjje. Taqe kunatï utjkistu ukampi Diosar jachʼañchañasa, ukhamarak kunjamsa ukajj Diosan arunakap yatiyañatak wali amuyumpi sum apnaqasi uk uñjañas wali kusiskañawa (Pro. 3:9).

Kunjamanakatsa Oraqpachan Yatiyasiskakiñapatak Yanaptʼasma

Jichhürunakanjja, waljaniw qollqepat ‘apaqtʼapjje’ ukat tamanakan “Oraqpachan yatiyasiñapataki” siski uka cajar uchapjje (1 Cor. 16:2). Tamanakajj sapa phajjsiw uka qollqjja markapan yatiyasiskakiñapatak sarayki uka sucursalar apayapjje. Yanaptʼañtï munstajja, Jehová Diosan Testigonakapan sucursalapajj markaman utjki ukaruw aptʼayarakisma. Kuna sutjjarus apayasma uk sum yatjjatañatakejj kawkïr sucursalatï markaman yatiyasiñapatak sarayki ukankirinakampiw parlañama. Uka sucursalan direccionapjja, jw.org cheqanwa Internetan jikjjatasma. Akhamanakatwa yanaptʼasma:

JAN KUN MAYIS CHURAÑA

Banco toqe, tarjetanak toqe, celular toqe jan ukajj yaqha ukhamanak toqew qollqejj sucursalar apayasispa. Yaqhep sucursalajj Internetan jw.org sat toqe, jan ukajj yaqha ukham cheqanak toqew katoqaraki.
Qollqe, joyanaka, jan ukajj yaqha ukhamanakwa churasma. Ukatsti janiw kuns maykäti sasinwa mä carta apayañama.

MÄ AMTAMPI CHURAÑA

Qollqe churasintï qhepat mayisiñ munjjäta ukhajja, kuttʼayatäjjasmawa.
Qollqe churkasajja, kuttʼayjjapjjetätawa sasin mä cartanwa qhanañchtʼañama.

SUM AMUYTʼASISAW CHURASIÑAPA

Diosan Reinopat oraqpachan yatiyasiñapatakejja, janiw qollqe, valoran cosasanak churasak yanaptʼksnati, jan ukasti yaqha toqenakatsa yanaptʼaraksnawa. Uk jichhajj uñjañäni. Ukanakat kawkïrimpiy yanaptʼañ munsta uk janïr lurkasajja, markaman utjki uka sucursalankirinakampiw nayraqat parltʼañama. Leyinakasa impuestonakasa janiw taqe markan kikpäkiti, ukatwa sum amuytʼasiñatakejj uka toqet yatjjattʼatanakampi yanaptʼayasiñama.

Seguronaka. Seguro de vida satäkis uksa, jubilasitamat qollqsa Jehová Diosan Testigonakapan sucursalaparuw katuyjjasma.

Bancor qollqe imasitama. Bancon imat qollqesa, qollqe imat documentonakasa, jubilasit qollqsa Jehová Diosan Testigonakapan sucursalaparuw katuyasispa, jan ukajj banconakatak leyejj utjki ukarjamaw churasispa, ukhamat churirejj jiwjjaspa ukhajj uka qollqe irtjjapjjañapataki.

Accionanaka ukat bononaka. Ukanakjja, Jehová Diosan Testigonakapan sucursalaparuw jan kun mayisak churasma, jan ukajj uka sutjjaruw mä contrato lurasma, ukhamata churirejj jiwjjaspa ukhajj uka qollqe jupanakan irtjjapjjañapataki.

Utanaka, oraqenaka. Aljañjamäki uka utanaksa, oraqenaksa Jehová Diosan Testigonakapan sucursalaparuw jan kun mayisak churasispa, jan ukajj churiritï uka utan utjaschejja, jiwañkam ukan utjasiñatakiw mayirakispa.

Qollqe churasajj renta mayirakisma. Mä amtar purisaw qollqsa jan ukajj títulos valores uka documentonaksa Jehová Diosan Testigonakapan sucursalapar churasispa, ukatsti qollqe churirejj jiwañkamaw maran mä kuti renta katoqe. Ukham churasajj impuesto pagañatsa iraqtʼatäspawa.

Testamentonaka fideicomisonaka. Utanaksa, oraqenaksa jan ukajj qollqsa, notario nayraqatanwa mä testamento Jehová Diosan Testigonakapan sucursalapar churasispa, jan ukajj fideicomiso contratsa uka sutjjaruw jupanakan katoqañapatak jaytasirakispa. Ukham lurasajja impuesto pagañatsa iraqtʼatarakïspawa.

“Sum amuytʼasisaw churasiñapa” siski ukarjamajja, kun churañatakis maynejj sum amuytʼasiñapawa. Jehová Diosan Testigonakapajj Oraqpachan yatiyasipki ukar yanaptʼañ munirinakatakejja, Donaciones planificadas para favorecer el servicio del Reino en todo el mundo sat folletow wakichasi, uka folletojj español arutsa inglés arutsa utjiwa. Jichhasa jan ukajj jutïrinsa kunjamanakatsa qollqesa jan ukajj cosasanakas churasispa ukaw uka folleton qhanañchasi. Kunatï ukan qhanañchaski ukajj inas taqpachapunejj jan yanaptʼkchïtamti. Kunattejja, leyinakasa impuestonakasa sapa markan mayj mayjawa. Ukhamanak churasaw waljanejj Diosar yupaychañataki ukat kuna jan waltʼäwinakatï utjki uka luräwinakan yaqhanakar yanaptʼapjje, ukham churasajj kuna impuestonakatï pagañäki uksa iraqtʼatäpjjarakiwa. Uka folletotï markaman utjchejja, tamamankir secretario jilataruw mayisma.

Jukʼampi yatiñ munsta ukhajja, Internetankir jw.org cheqaru mantasin “Quiero hacer una donación para nuestra obra mundial” siski ukar mantam, jan ukajj kawkïr sucursalatï markaman yatiyasiñapatak sarayki ukankirinakampiw parltʼasma.