Llampʼu chuyman jaqejj amuytʼasiriwa
Antonia kullakat parltʼañäni, jupajj usutanakar uñjiri enfermerawa. Mä kutejj mä warmin ukaruw saräna. Timbre tuktʼäna ukhajja, wali colerataw uka warmejj mistunïna, ukatsti ‘kunatsa mamajar uñjirejj qheptʼat purinta’ sasinwa jan wali arunakampi toqjjäna. Antoniajj janiw qheptʼat purkänti. Ukampis jupaw llampʼu chuymampi disculpa mayisïna.
QHEPÜROJJA, uka warmejj wasitatwa toqjjäna. ¿Kunsa Antoniajj lurpachäna? Kullakajj siwa: “Ina chʼusatwa toqetäna, janipuniw walïkänti” sasa. Ukhamäkchïnsa, Antoniajj wasitampiw disculptʼasïna. Ukatsti sarakïnwa: “Kunja llakitas jikjjatasta uk amuysmawa” sasa.
Antonia kullakjam uñjasisajja, ¿kunsa lurasmäna? ¿Llampʼu chuymampit aguantasmäna? Jan ukajj ¿colerampich atipayasismäna? Ukhamanakan uñjasisajja, inas coleramp atipayassna. Kunapachatï maynejj toqjjestu, jan ukajj llakita jikjjatastan ukhajja, llampʼu chuymampi aguantañajj chʼamakïspawa.
Bibliajj llampʼu chuymanïpjjam sasaw sistu. Llampʼu chuymanïñajja, amuytʼasirïñampi sasiwa sasaw Bibliajj saraki. Santiagojj akham sänwa: “Jumanak taypintejj maynejj wali yatiñan utjchejja amuytʼasiriraki, uñachtʼaypan uka yatiñapjja suma sarnaqatapampi, llampʼu chuymampiraki kunjämtï uka yatiñapajj churki ukhamarjama” sasa (Sant. 3:13). Diosatwa llampʼu chuymanïñajj juti sasajja, ¿kunatsa sistanjja? ¿Kunas llampʼu chuymanïñatak yanaptʼistaspa?
AMUYTʼASIREJJ LLAMPʼU CHUYMANIWA
Llampʼu chuymanïñajj colerwa apjtayaspa. “Suma arumpi kuttʼayañajja colerañjja apaqewa, ukampis jan wali arumpi kuttʼayañajja, jukʼampwa colerasiyi” (Pro. 15:1).
Colerat parlasajja, jukʼamp jan walinakwa utjaysna. Ninarus jukʼamp lawamp apjjatksna ukhamäspawa (Pro. 26:21). Ukampis llampʼu chuymampi arsuñäni ukhajja, taqe kunas sumäniwa. Colersa apjtaysnawa.
Antoniajja, toqjkäna uka warmirojj llampʼu chuymampiw uñjäna. Uk uñjasasti uka warmejj jachaqtʼasïnwa. Ukatjja kuna jan walinsa jupasa, familiapas uñjasipjjäna uka toqetwa kullakar awistʼäna. Qhepat uka warmejj Antoniampiw Bibliat yateqjjäna. Cheqas llampʼu chuymampi, sum uñjatapatwa Bibliat yateqjjäna.
Llampʼu chuymanïñajj kusisiñwa utjayaspa. “Kusisiñanïpjjew llampʼu chuymaninakajja, jupanakarakiw Diosan arsutaparjama oraqe katoqapjjani” (Mat. 5:5).
¿Kunatsa llampʼu chuymaninakajj kusisitäpjje? Yaqhepajja, nayrajj jan wali jaqëpjjänwa, ukampis jichhajj llampʼu chuymanïsajj kusisitaw jakasipjje. Jutïrin suma jakasiñ utjatap yatisas kusisipjjarakiwa (Col. 3:12). Españankir tamanak tumptʼir Adolfo jilatat parltʼañäni. Diosar jan uñtʼasajja, janiw sum jakaskänti.
Jilatajj siwa: “Janiw kusisit jakaskayätti, ratukiw colerampi atipayasirïyäta. Uk uñjasajja, amigonakajajj wal sustjasipjjerïna. Mä kutejja, mä nuwasïwinkaskayäta ukhaw cuchillompejj sojjta cheqat usuchjat uñjasiyäta. Wilajj walpun jalitäna, niyapuniw jiwta. Ukampis qhepatjja, jakäwijajj qʼalaw mayjtʼäna” sasa.
Adolfo jilatajja, jichhajj mayninakaruw llampʼu chuymanïña yatichaski. Ukampis janiw arumpikejj yatichkiti, luratanakampiw uñachtʼayi. Adolfojj wali munasiri, taqeninsa jakʼachaskaya ukham jilatawa. Jilatajj saskakiwa: “Jichhajj wali kusisitaw jakasjjta, Diosaw llampʼu chuymanïñatak yanaptʼawayitu, ukatwa Jupar wal yuspärta” sasa.
LLampʼu chuymani jaqejj Diosaruw kusisiyi. “Munat wawajjay, yatiñanïmaya, nayarojj kusisiyitätawa; ukhamatwa arsusëjja nayar [qallasirijarusa, NM]” (Pro. 27:11).
Supayajja, Jehová Diosarojj aynachtʼayañ wal muni. Ukhamïpan Diosajj wal colertʼasispa, ukampis janiw ukhamäkiti. Bibliajj Diosat akham siwa: “Janiw jankʼaki colerasirïkiti” sasa (Éxo. 34:6). Ukhamarus khuyapayasir Diosarakiwa, jiwasatï ukham chuymanïñatak chʼamachasiñäni ukhajja, Jupajj wal kusisini (Efe. 5:1).
Jichhürunakanjja, jaqenakajj jan wali lurañanakanwa sarnaqapjje. ‘Jachʼa jachʼa tukurinaka, jilamp parlirinaka, Diosat jan wal parlirinaka, aru apnaqerinaka, munañapampi apayasirinaka, qhorunaka ukhamäpjjewa’ (2 Tim. 3:2, 3). Ukhamäkchisa, maynejj llampʼu chuymani jaqëspawa. Bibliajj siwa: ‘Diosan yatiñaparjam sarnaqerinakajj suma jaqenakäpjjewa, suma amuytʼanïpjjarakiwa’ sasa (Sant. 3:17). Sumankayiri, amuytʼasiri chuymanïtas uñachtʼayasajja, amuytʼasirïtaswa uñachtʼayañäni. Ukaw ina chʼusat toqepjjestani ukhajj llampʼu chuymanïñatak yanaptʼistani. Jehová Diosar jukʼamp jakʼachasiñatakis yanaptʼarakistaniwa, Jupaw amuytʼasirïñatakejj yanaptʼistu.