¿Jumajj amttati?
¿Aka qhepa phajjsinakan Yatiyañataki sat revista mistkäna uk liytʼtati? Ukhamächi ukhajja, aka jisktʼanakar qhanañchtʼma:
Mateo 18:15-17 qellqatanjja, ¿kuna kasta juchatsa Jesusajj parlaskäna?
Maynimp jan waltʼayasktan ukampik askichañatwa Jesusajj parläna. Ukampis maynir jan waltʼayañatak amtampi kʼarintaña, maynin askipak thaqhasina maynir engañjaña ukanakaw juchajja, jan askichaskaspa ukhajj juchanejj tamat jaqsutäspawa (w16.05, 7 jana).
Biblia liytʼasin sum yatjjatañatakejja, ¿kunas yanaptʼiristam?
Akanakaw yanaptʼiristam: jukʼamp yatjjatañ amtampiw liytʼañama, ukatakejj Biblian kawkïr yatichäwinakapas yanaptʼiristam ukwa amuytʼañama; akham jisktʼasirakim: “¿Kunjamsa akampejj yaqhanakar yanaptʼirista?” sasa; ukatsti liytʼawaykta ukanakjja jukʼamp yatjjatañataki yanaptʼanakajj utjki ukanakampiw yatjjatañama (w16.05, 24-26 jananaka).
Mä cristianotï jiwatanakajj jaktanipjjaniwa sasin creychi ukhajja, ¿mä familiarapan jiwatapata llakisiñapajj walikïskaspati?
Mä cristianojja, jiwatanakajj jaktanipjjaniwa sasinsa creychejja, janiw ukajj llakip chhaqtaykaspati. Abrahamajj Sara esposapan jiwatapat wal llakisïna (Gén. 23:2). Tiempompejj ukham llakisiñajj chhaqtaspawa (wp16.3, 4 jana).
Ezequielajj visionan uñjkäna uka qellqañ yänak aptʼat jaqesa, thuru lawa aptʼatäpkäna uka sojjta jaqenakasa, ¿khitinakampi sasisa?
Taqe jupanakasti, angelanakampi sasiwa, jupanakaw Jerusalén marka tʼunjañatak yanaptʼapjjäna, niyaw jupanakajj akapachar Armagedonan tʼunjapjjani. Qellqañ yänak aptʼata jaqejja Jesusampi sasiwa. Jupaw uwijanakjam uñtʼatäpkani uka walja jaqenakar chimptʼani (w16.06, 16, 17 jananaka).
¿Kuna jan walinakansa Bibliajj uñjasïna?
1) Bibliajj papironakaru ukat pergaminonakaruw qellqasirïna, ukanakasti tiempompejj tukusjjakirïnwa; 2) marka apnaqerinakasa, religión pʼeqtʼirinakas Biblia chhaqtayañwa munapjjäna; 3) Biblian yatichäwinakap mayjtʼayañ munapjjäna (wp16.4, 4-7 jananaka).
Kunatï wakiski ukampik jakasiñatakejja, ¿kunsa lursna?
Kunatï jakasiñatak wakiski ukwa amuytʼañama, kunanakatï inamayäkaspa ukanak janiw alañamäkiti. Kunanakatakis qollqe munäta ukwa qellqtʼasiñama. Kunanaktï jan apnaqkta ukanak janiw imasiñamäkiti, manunakamsa phoqañamarakiwa. Ukatsti minus horanak trabajiñwa amtañama, kunsa Diosar jukʼamp serviñatakejj lurasma uksa amuytʼañamarakiwa (w16.07, 10 jana).
Bibliarjamajja, ¿kunas qorit sipansa jukʼampejja?
Job 28:12, 15 qellqatajja, ‘Diosan yatichäwipajj janiw qorimpejj alatäkaspatiʼ sasaw qhanañchi. Diosan yatichäwip thaqkasajja, iyawsäwin jan aynachtʼañataki, altʼat chuymanïñatak chʼamachasipjjañäni (w16.08, 18, 19 jananaka).
¿Jilatanakan sunkhanïpjjañapajj walikïskiti?
Yaqhep markanakan sunkhanïñajj walikïskiwa, ukampis jilatanakan sunkhanakapajj qʼoma, suma khuchurtʼata ukhamäñapawa. Ukhamäni ukhajja, yatiyapkani ukhajj jaqenakajj istʼapjjaniwa. Ukhamäkchisa yaqhep jilatanakajj jan sunkhanïñwa amtapjje (1 Cor. 8:9). Yaqhep cheqanakanjja, cristianonakan sunkhanïpjjañapajj jan walit uñjatawa (w16.09, 21 jana).
Davidampi Goliatampejja, ¿cheqapunit utjapjjäna?
Jichha tiempon jukʼamp jachʼa jaqejja pä metro chikatanits jilawa. Ukhamajja, Goliat chachatjja 15 centímetro ukchʼa minusakiwa. Maysa toqetjja, Davidajj utjaskapunïnwa, mä nayra qellqatanjja “Davidan utapa” sasin qellqataw uñsti. Jesucristosa David chachat parlarakïnwa. Kunatï Biblian qellqatäki ukajj cheqapunïskiwa (wp16.5, 13 jana).
Uñtʼañasa, amuytʼañasa, amuyumpi sarnaqañasa, ¿kunansa jan kikpäki?
Khititï uñtʼki ukajj taqe kun yatjjati. Khititï amuytʼki ukajja, kunatsa awisajj kunas pasi ukwa amuytʼi. Ukampis amuyumpi sarnaqerejja, kuntï uñtʼki, amuytʼkaraki ukarjamaw sarnaqe, kunatï askïki uk lurañatakis chʼamachasirakiwa (w16.10, 18 jana).