“Aka regalojj wali sumapuniwa janipuniw ukham katoqerïkti”

Sasaw 13 marani mä tawaqetajj säna, juparojj mä anoqallu regalapjjäna. Mä empresani warmejja, “tawaqetäkayat ukhajj tatajajj mä computador regalitäna, ukaw jakäwejj mayjtʼawayi” sasaw saraki. Mä chachajja, “esposajajj mä mara casarasipjjatajj amtañatak mä tarjeta lurkatayna ukajj wali suma regalopunïnwa” sasaw saraki.

Sapa maraw walja jaqenakajj mä amigoparu jan ukajj mä familiarapar mä suma regalo churañatakejj wal chʼamachasipjje. Waljanirakiw khitirutï mä regalo churki ukar gustaspa uk munapjje, kunjamtï qalltan parltʼaniwayktan ukhama. ¿Jumajj mä suma regalo churañ munasmati, jan ukajj katoqañcha munasma?

Jaqenakajja, maynir mä regalo churañsa jan ukajj katoqañsa wal munapjje. Ukhamatwa khititï katoqki ukasa, ukhamarak churki ukasa wal kusisipjje. Biblian akham siwa: “Katoqañat sipansa churañanwa jukʼamp kusisiñajj utji” sasa (Hechos 20:35). Cheqansa, maynir mä regalo churktan ukat wali kusisit katoqtʼasistu ukhaw jukʼamp kusistanjja.

Regalos kusisita katoqasiñapatakisa jiwasas kusisit jikjjatasiñatakisa, ¿kunsa lursna? Janitï mä suma regalo churañ puedksna ukhajja, ¿kunsa maynir kuntï munki uk regalañatakejj lursna?