Jesusan jiwatapaw Jehová Diosan munasiñap uñachtʼayistu

1. Jesusan jiwäwip toqejja, ¿kuna bendicionanaksa katoqañäni?

JESUSAN jiwatapatwa walja bendicionanak katoqtanjja. Sañäni, khitinakatï Jesusan jiwas layku jiwatapar confiyktan ukanakajj Diosan familiap taypinkañäniwa. Ukatsti kusisitaw wiñayatak jakasiñäni. Jesusan jiwäwipajj alajjpachatakisa, aka Oraqetakisa walja bendicionanakwa apanirakini (Heb. 1:8, 9).

2. 1) ¿Kuna toqenakatsa Jesusajj Awkipar mayisïna? (Aka janankir dibujo uñjjattʼäta). 2) ¿Kuna toqenakatsa aka yatichäwin yatjjataskañäni?

² Jiwayatäñataki pä mara faltaskäna ukhajja, Jesusajj akham sasaw arkirinakapar Diosar mayisiñ yatichäna: ‘Alajjpachankir nanakan Awkejja sutimajj jachʼañchatäpan [jan ukajj qollanaptayatäpan]. Reinomampisti apnaqapjjeta. Munañamasti luratäpan akapachanjja, kunjämatï alajjpachana luratäki ukhama’ sasa (Mat. 6:9, 10, NM). Jesusan jiwatapajj kunjamsa Diosan sutip jachʼañchasiñapatakisa, Diosan Reinop jutañapatakisa, Diosan munañap phoqasiñapatakis yanaptʼi ukwa jichhajj yatjjataskañäni.

‘SUTIMAJJ JACHʼAÑCHATÄPAN’

3. ¿Kunsa Diosan sutipajj amuytʼayistu, ukat kunjamsa Supayajj Diosan sutip jan walit uñjayäna?

³ Jesusajja, Diosan sutip jachʼañchatäñapataki jan ukajj qollanat uñjatäñapatakiw nayraqat mayïna. Diosan Jehová sutipajja, kunjam Diosas ukwa amuytʼayistu. Jupajj wali yatiñani, wali chʼamani Diosawa. Mä kutejja, Jesusajj Awkipar mayiskasajj “qollan Awkejja” sasaw sarakïna (Juan 17:11). Niyakejjay Jehová Diosajj qollanächejja, leyinakapasa taqe kuntï lurki ukanakas qollanarakiwa. Ukampis Edén jardinanjja, Jehová Diosajj janiw jaqenakar leyinak churañatakejj munañanïkiti sasaw Supayajj säna. Ukham sasinjja Supayajj Jehová Diosaruw kʼarintäna, sutipsa jan walit uñjayarakïna (Gén. 3:1-5).

4. ¿Kunsa Jesusajj Diosan sutip jachʼañchañatakejj luräna?

⁴ Maysa toqetjja, Jesusajj Jehová Diosar wal munasïna, ukatwa Diosan sutip jachʼañchañatakejj wal chʼamachasïna (Juan 17:25, 26, MT). ¿Kunjamsa uk luräna? Sarnaqatapampi, yatichäwinakapampiw Jehová Diosan leyinakapajj cheqapätapa, ukhamarak munañap lurañajj jiwasan askisatakïtap uñachtʼayäna (Salmo 40:8-10 liytʼañataki). Ukatjja, Supayajj jiwañapkam wal tʼaqesiykäna ukhasa Jesusajj janipuniw Jehová Diosat jitheqtkänti. Ukhamatwa jan juchani mä jaqejj kunjamsa Diosar taqe chuyma servispa uk uñachtʼayäna.

5. ¿Kunjamsa Jehová Diosan sutip jachʼañchañ munatas uñachtʼaysna?

⁵ ¿Kunjamsa Jehová Diosan sutip jachʼañchañ munatas uñachtʼaysna? Sarnaqatasampiw uñachtʼaysna. Jehová Diosajj munañap lursna ukwa muni (1 Pedro 1:15, 16 liytʼañataki). Mä arunjja, Jupa saparukiw serviñasa, leyinakapsa taqe chuymaw phoqañasaraki. Uñisiñat arknaqat uñjasiñäni ukhasa, Jehová Diosan munañaparjam sarnaqañatakiw chʼamachasiñasa. Jehová Diosan leyinakaparjam sarnaqasajja, sutipwa jachʼañchtanjja (Mat. 5:14-16). Sarnaqatasampiw Jehová Diosan leyinakapajj cheqapätapa, kuntï Supayajj arskäna ukajj kʼarïtap uñachtʼaytanjja. Taqeniw pantjasirïtanjja, ukampis pantjasisajj arrepentisiñasawa. Kunanakatï Jehová Diosan sutip jan walit uñjaykaspa ukanak jan lurañatakis chʼamachasiñasarakiwa (Sal. 79:9).

6. Pantjasirïkstansa, ¿kunjamsa Jehová Diosajj uñjistu?

⁶ Alajjpachar sarañataki ajllitäskstansa jan ukajj ‘yaqha uwijanakjam’ uñtʼatäkstansa, Jesusan jiwataparu taqe chuyma iyawsañäni ukhajja Diosajj juchanakasat perdonistaniwa. Ukhamarus jiwasatï Diosan markap taypinkañ munstan ukhajja, Juparuw jakäwis katuyasiñasa. Jehová Diosajj alajjpachar sarañataki ajllit cristianonakarojj wawanakaparjamaw uñji, ‘yaqha uwijanakarusti’ amigonakaparjamaw uñjaraki (Juan 10:16; Rom. 5:1, 2; Sant. 2:21-25). Ukhamäkchisa Jesusan jiwatapajj Diosamp sum apasiñataki ukhamarak sutip jachʼañchañatakiw yanaptʼistu.

‘REINOMAJJ JUTPAN’

7. Jesusan jiwatapajja, ¿kuna bendicionanaksa Diosan Reinop toqejj utjayani?

⁷ Jesusajj Awkipar akham mayisïna: ‘Reinomajj jutpan’ sasa. Uka Reinosa Jesusan jiwatapasa, ¿kunjamsa Diosan amtap phoqasiñapatak yanaptʼi? Diosan Reinopanjja, Jesusampi 144.000 ajllit cristianonakampiw apnaqanipjjani. Uka ajllit cristianonakajja, Jesusan jiwatapatwa alajjpachat aka Oraqer waranqa maranak reyinakjama sacerdotenakjam apnaqanipjjani (Apo. 5:9, 10; 14:1). Uka waranqa maranakanjja, Jehová Diosajj Reinop toqew aka Oraqe paraisor tukuyani, Jupar taqe chuyma servirinakaparusti jan juchani tukupjjañapatakiw yanaptʼarakini. Ukatjja, alajjpachan servirinakapasa, aka Oraqen servirinakapasa mä familiakiw Jehová Diosar servipjjani (Apo. 5:13; 20:6). Jesusaw Supayarusa, taqe jan walinaksa jan mayampitak chhaqtayjjani (Gén. 3:15).

8. 1) Diosan Reinopajj kunja wakiskirisa uk amuyapjjañapatakejja, ¿kunjamsa Jesusajj arkirinakapar yanaptʼäna? 2) ¿Kunjamsa Diosan Reinopar yanaptʼsna?

⁸ Diosan Reinopajj kunja wakiskirisa uk amuyapjjañapatakiw Jesusajj arkirinakapar yanaptʼäna. ¿Kunjamsa uk luräna? Bautisasisajja, Jesusajj jankʼakiw kawkhanakarutï sarkäna uka cheqanakan “Diosan reinopat” yatiyäna (Luc. 4:43). Arkirinakaparojj Diosan Reinopat “taqe aka oraqpachana” yatiyapjjañapatakiw chʼamañchtʼarakïna (Hech. 1:6-8). Jichhürunakanjja, Diosan Reinopat yatiyir sarktan ukhaw jaqenakajj Jesusan jiwatapat yateqapjjaspa, ukhamarakiw uka Reinomp apnaqatäpjjañapatakis yanaptʼsna. Jiwasasti alajjpachar sarañatak ajllit cristianonakar Diosan arunakap yatiyañ yanaptʼasaw uka Reinor yanaptʼtanjja (Mat. 24:14; 25:40).

‘MUNAÑAMASTI LURATÄPAN’

9. ¿Kunatsa Jehová Diosajj amtap phoqapuniniwa sasin confiysna?

⁹ ‘Munañamasti luratäpan’ sasinjja, ¿kamsañsa Jesusajj munäna? Jehová Diosajj arsutanakap phoqapuniwa sañwa munäna (Isa. 55:11). Supayajj Dios contras saytʼaskchïnjja, Diosajj kuntï jaqenakatak amtkäna ukanakajj phoqasipuniniwa. ¿Kuna amtanïnsa Jehová Diosajj aka Oraqetakejja? Adanampi Evampejj wawanakapampi aka Oraqe phoqantapjjaspa ukwa munäna (Gén. 1:28). Ukampis Adanampi Evampitï jan wawanïsin jiwapjjaspäna ukhajja, Jehová Diosan amtapajj janiw phoqaskaspänti. Ukatwa Jehová Diosajj wawanïpjjañapatak jakayaskakïna. Ukhamasti khitinakatï jutïrin jan juchani, wiñayatak jakasiñ munapki ukanakajja, Jesusan jiwataparuw iyawsapjjañapa. Jehová Diosajj jaqenakar wal munasi, ukatwa kuntï jaqenakatakejj qalltan amtkäna uk phoqani.

10. Jesusan jiwatapatjja, ¿kuna suytʼäwis jiwatanakatak utji?

¹⁰ Waranq waranqa jaqenakaw Jehová Diosar jan uñtʼas jiwawayapjje, ¿kuna suytʼäwis jupanakatak utji? Jesusan jiwatapatwa jupanakajj jaktanipjjani. Jehová Diosajj taqe jaqenakan jakapjjañapwa muni, ukatwa jaktanipkani ukanakarojj Jupat yateqapjjañapatak tiempo churani, ukhamat wiñayatak jakasipjjañapataki (Hech. 24:15). Jehová Diosaw jakañ churir Diosajja, ukhamajj jiwatanakar jaktayasajj jupanakan Awkiparuw tukuni (Sal. 36:9, NM). Jesusajj yatichkäna uka mayisïwinjja, Jehová Diosar mayiskasajj akham sänwa: “Alajjpachankir nanakan Awkejja” sasa (Mat. 6:9). Jehová Diosaw jiwatanakar jaktayañatakejj Jesusar chʼam churi. Ukatwa Jesusajj akham säna: “Nayätwa jaktañasa, jakañasa” sasa (Juan 6:40, 44; 11:25).

11. ¿Kamsänsa Jehová Diosajj walja jaqenakjam uñtʼatäpki ukanakatjja?

¹¹ Jesusajj akham sänwa: “Khitinakatejj Diosan munañapa phoqhapkejja, ukanakaw jilajjasa, kullakajjasa, taykajjasa” sasa (Mar. 3:35). Maysa toqetjja, “taqe markanakata, kunayman janchini, ukhamarak taqe casta parlani” jaqenakajj servipjjaspa ukwa Jehová Diosajj muni. Jupanakat Bibliajj akham siwa: ‘Waljanïpjjapuniwa, janirakiw khitis jaktʼkaspati’ sasa. Uka walja jaqenakajj Jesusan jiwäwipar iyawsapjjewa, ukatjja taqe kunanwa Diosar istʼapjjaraki, ukatwa akham sasin jachʼañchapjje: “¡Qhespiyasiñajj Diosasankiwa, khititejj tronon qontʼatäki, ukhamarak Corderona!” sasa (Apo. 7:9, 10).

12. Jesusajj yatichkäna uka mayisïwirjamajja, ¿kuna amtanis Jehová Diosajj jaqenakatakejja?

¹² Jesusajj yatichkäna uka mayisïwitjja, Jehová Diosajj jaqenakatak kuna amtanisa ukwa yateqawaytanjja. Maya, Jehová Diosan sutip jachʼañchañatakiw chʼamachasiñasa, kunatï sutip jan walit uñjaykaspa ukanak janiw lurañasäkiti (Isa. 8:13). Jesusan jiwatap toqew Diosan sutipajj jachʼañchasi, uka toqerakiw wiñay jakañ suytʼäwinïtanjja. Cheqas Jesusan sutip pachpaw “Jehová Diosajj Qhespiyiriwa” sañ muni. Paya, Jesusan jiwatap toqejj walja bendicionanakwa istʼasirinakajj katoqañäni. Taqe ukanakjja, Reinop toqew Jehová Diosajj phoqani. Kimsa, Jehová Diosan amtap phoqasiñapatakejj janiw kunas jarkʼkaspati, janipuniw ukat pächasktanti (Sal. 135:6; Isa. 46:9, 10).

¿KUNJAMSA JESUSAN JIWATAPAT JEHOVÁ DIOSAR YUSPÄRSNA?

13. ¿Kunsa bautisasisajj uñachtʼaytanjja?

¹³ Jehová Diosar jakäwis katuyasisin bautisastan ukhajja, Jesusan jiwas layku jiwataparus wal yuspärksna ukhamawa. Bautisasisaw Jesusan jiwatapar confiyatassa Jehová Diosatak jakatassa uñachtʼaytanjja. (Rom. 14:8). Maysa toqetjja, bautisasisajj “Diosat mä qʼoma chuyma” mayiraktanjja (1 Ped. 3:21). Jehová Diosajj Jesusan jiwatapatwa uka mayisitasarjamajj qʼoma chuyma churistu, ukatwa kuntï Jupajj churapjjämaw siskistu uk phoqapuniniw sasin confiytanjja (Rom. 8:32).

14. ¿Kunatsa Jehová Diosajj jaqe masisar munasiñamp uñjañas muni?

¹⁴ Jehová Diosajj munasiñatwa taqe kuns luri. Servirinakapajj Jupat yateqasisin munasiñampi uñjasipjjaspa ukwa muni (1 Juan 4:8-11). Jaqe masisar munasiñampi uñjtan ukhajja, Jehová Diosan familiap taypinkañ munatasajj qhanaw amuyasi (Mat. 5:43-48). Amtañäni, pä jachʼa mandamientonakajj akanakawa: maya, Jehová Diosar munasiña, paya jaqe masisar munasiña (Mat. 22:37-40). Jaqe masisar munasitasjja, Diosan Reinopat suma yatiyäwinak yatichasaw uñachtʼaytanjja. Jehová Diosajj jaqenakar munasiñasa jukʼampis jilat kullakanakar munasiñaswa muni, uka mayitapar phoqañänejja, Jehová Diosarojj jukʼampiw munasiñäni (1 Juan 4:12, 20).

JESUSAN JIWATAPATWA BENDICIONANAK KATOQTANJJA

15. 1) ¿Kuna bendicionanaksa Jehová Diosat katoqtanjja? 2) ¿Kuna bendicionanaksa jutïrin katoqañäni?

¹⁵ Jesusan jiwatapar taqe chuyma iyawsañäni ukhajja, Jehová Diosajj taqe juchanakasatwa perdonistani (Hechos 3:19-21 liytʼañataki). Kunjamtï yateqawaytanjja, Jesusan jiwatapatwa Jehová Diosajj yaqhep cristianonakarojj alajjpachar sarapjjañapatak ajlliwayi, jupanakajj wawanakapjam uñtʼatäpjjewa (Rom. 8:15-17). ‘Yaqha ovejanakjam’ uñtʼatäpki ukanakarojja, familiap taypin aka Oraqen jakasipjjañapatakiw invittʼaraki. Jupanakajj jan juchani jaqenakar tukusajja, qhep qhepa yantʼanwa uñjasipjjani. Khitinakatï uka yantʼar atipjapkani ukanakaw aka Oraqen ‘Diosan wawanakapat’ uñtʼatäpjjani (Rom. 8:20, 21; Apo. 20:7-9). Jehová Diosajj wawanakaparojj wiñayatakiw munasini. Jesusan jiwatapatwa walja bendicionanakajj wiñayatak utjani (Heb. 9:12). Ukhamajj Jesusan jiwäwipajj Jehová Diosan mä suma regalopawa, janiw khitis uk apaqkistaspati.

16. Jesusan jiwatapajja, ¿kunjamsa yanaptʼistu?

¹⁶ Juchanakasat taqe chuyma arrepentisiñäni ukhajja, Supayajj janiw Jehová Diosan familiapat jitheqtaykistaniti. Jesusajj “mä sapa kutikiw” wiñayatak jiwawayi. Ukhamajja, juchanakasat wiñayatakiw qhespiyistu (Heb. 9:24-26). Adán chachan pantjasitap laykojj taqeniw jiwtanjja, ukampis Jesusan jiwas layku jiwatapat wiñay jakañ katoqañäni. Ukatjja, Jesusan jiwäwipajj Supayan apnaqat akapachata ukhamarak jiwañar ajjsarañat qhespiyistu (Heb. 2:14, 15).

17. ¿Kunjamsa Diosajj munasiñap uñachtʼayistu?

¹⁷ Jehová Diosajja, kuntï nayratpach arskäna ukanaksa, oraqer apnaqer leyinaksa janiw mayjtʼaykiti, ukhamajj arsutanakap phoqapuniniwa (Mal. 3:6). Jehová Diosajj janiw jakañak churkistuti, jan ukasti munasiñampiw uñjarakistu. Bibliajj akham siwa: “Ukhamanwa yattanjja, iyawsaraktan Diosajj jiwasanakar munatapa. Diosajj munasiñawa” sasa (1 Juan 4:16). Diosajj arskäna ukarjamaw aka Oraqe mä paraisor tukuyani, taqenirakiw maynit maynikam munasiñamp uñjasipjjani. Ukhaw Diosan alajjpachankir servirinakapasa aka oraqenkir servirinakapas akham sapjjani: “Yupaychatäñasa, jachʼa kankañasa, yatiñasa, yuspagarañasa, jachʼañchañasa, munañanïñasa, chʼamanïñasa, Tatit Diosasankpan, wiñayan wiñayapataki. Ukhamäpan!” sasa (Apo. 7:12).