Diosaw taqe amtanakam phoqañatak yanaptʼätam

1. 1) ¿Kunsa wayn tawaqonakajj jutïritak amtapjjañapa? 2) ¿Kunatsa jan ajjsarapjjañapäki? (Aka paginankir fotonak uñjjattʼäta).

WAYN TAWAQO, kunapachatï maynejj kawkirus viajiñ muni ukhajja, nayraqatajj kawkirus sarani ukwa amtañapa ¿janicha? Jakañajj mä viajimpi sasirakiwa. Kawkirus maynejj sarani ukjja, waynäkasaw amtjjañapa. Cheqas kuns lurañäni uk amtañajj chʼamakïspawa. Heather sat tawaq kullakajj akham siwa: “Jakañ vidajan kuns lurä uka toqet lupʼiñajj wal ajjsarayitu” sasa. Jumatï uka kullakjam uñjasirakstajja, Jehová Diosan aka arunakap amtasim, jupajj akham siwa: “Jan ajjsaramti, nayäsktwa juman Diosamajja. Nayaw chʼamañchaskäma, nayarakiw yanapaskäma” sasa (Isa. 41:10).

2. Jehová Diosajj jutïrin kusisit jakasiñamwa muni, ¿kunatsa ukham sistanjja?

² Jehová Diosajja, jutïrin kuns luräta uk sum amuytʼasis amtañamatakiw chʼamañchtamjja (Ecl. 12:1; Mat. 6:20). Kusisit jakasisma ukwa Jupajj munaraki. Ukjja, kuntï jupajj lurawayki ukanak uñjasa, istʼasa, manqtʼasaw yatisma. Jehová Diosajj kunjamsa uñjistu, yaticharakistu ukanakatsa amuytʼarakismawa. Khitinakatï ewjjanakapar jan istʼapki ukanakarojj akham siwa: “Kuntejj nayarojj jan munaskitu ukwa ajllipjjaraktajja” sasa. Ukatjja akham sarakiwa: “Servirinakajjajj [...] kusisitäpjjaniwa, ukampis jumanakajj mä pʼenqa jiskʼachjataw uñjasipjjäta; jupanakajj kusisiñatsa qʼochusipjjaniwa, chuymanakapan kusisiñajj utjatap layku” sasa (Isa. 65:12-14). Kuntï jutïrin lurkañäni uk sum amuytʼasis amttan ukhajja, Jehová Diosaruw jachʼañchtanjja (Pro. 27:11).

KUNAS KUSISITÄÑATAK YANAPTʼIRISTAM

3. ¿Kun lurañamsa Jehová Diosajj muni?

³ ¿Kun lurañamsa Jehová Diosajj muni? Ak amuytʼañäni, animalanakajja manqtʼasipjje, um umtʼasipjje, qallunakanïpjje ukhajj kusisitakïpjjewa. Jupanakajj ukham jakasiñatak luratäpjjewa. Ukampis jaqenakajja, Diosar uñtʼañataki, jupar taqe chuyma servisin kusisit jakasiñatak luratätanwa (Sal. 128:1; Mat. 5:3). Biblianjja, Diosajj “wali munasiri”, “kusisiri” ukhamawa sasaw qhanañchi. Jaqenakarus “jupar uñtasitwa” luräna sasaw saraki (2 Cor. 13:11; 1 Tim. 1:11; Gén. 1:27). Ukhamajj jumatï Diosat yateqasis sarnaqätajja kusisitaw jakasïta. Arupajj akham siwa: “Katoqañat sipansa churañanwa jukʼamp kusisiñajj utji” sasa (Hech. 20:35). ¿Uka arunakajj cheqaw sasmati? Jaqenakajj ukham jakasiñatak luratätanwa. Ukhamajj jutïritak kun lurañ amtasasa, Jehová Diosar munasitama ukhamarak jaqe masimar munasitamwa uñachtʼayañama, ukwa Jehová Diosajj muni (Mateo 22:36-39 liytʼañataki).

4, 5. ¿Kunas Jesusarojj kusisiyäna?

⁴ Jesucristotwa wayn tawaqonakajj yateqasipjjarakisma, jupajj wawaskäna ukhajj anattʼasiñsa yatirakïnwa, kusistʼarakirïnwa. Biblianjja, laruñatakisa kusistʼañatakisa mä horasaw utji sasaw qhanañchi (Ecl. 3:4, NM). Jesusajj Diosan Arupatsa yatjjatarakirïnwa, ukaw Awkipampi sum apasiñatak yanaptʼäna. 12 maranïskäna ukhajja, templon yatichirinakajj “wali amuytʼasirïtapatsa jisktʼanakar qhanañchatapatsa wal musparapjjäna” (Luc. 2:42, 46, 47).

⁵ Jesusajj jilïrëjjäna ukhajja, Diosan munañap lurasajj wali kusisitaw jakasïna. Alajjpachankir awkipajja, ‘pobrenakar suma yatiyäwinak yatiyañapataki’ ‘juykhunakar uñjayañapatakiw’ aka oraqer khitanïna (Luc. 4:18). ¿Kunjamakis ukanak lurasajj jikjjatasïna? Salmo 40:8 qellqatarjamajja, Jesusajj akham sänwa: “Dios Tatitojjay, munañam lurañaw kusisiyitu” sasa. Jehová Diosat jaqenakar yatichañaw Jesusarojj wal kusisiyäna (Lucas 10:21 liytʼañataki). Mä kutejja, kunjamsa Diosar adorasiñapa uka toqetwa Jesusajj mä warmir yatichäna. Uka qhepatjja, akham sasaw discipulonakapar säna: “Nayan manqʼajajja, khitankitu ukan munañap lurañawa, kuna lurañtï jupajj churkitu uk tukuyañajarakiwa” sasa (Juan 4:31-34). Jesusarojj Diosampir jaqenakampir munasiñaw kusisiyäna. Jumatï ukham munasirakïta ukhajj ukhamarakiw kusisit jakasïta.

6. Kun lurañtï amtaskta ukanakjja, ¿kunatsa experienciani jilat kullakanakar yatiyañama?

⁶ Walja jilat kullakanakajj wayn tawaqökasaw precursorat serviñ qalltawayapjje. Ukham lurasinjja wali kusisitaw jakasipjje. Jupanakaruw kunanak lurañsa amtaskta uk yatiyasma. Proverbios 15:22 textojj akham siwa: “Walja amuytʼayirinakampiw sumar mistsuñajj utji” sasa. Precursoräsin kunanaktï yateqkäta ukajj jutïrin sum jakasiñatakiw yanaptʼätam sasaw uka jilat kullakanakajj sapjjätam. Jesusajja, alajjpachankaskäna ukhaw awkipat taqe kun yateqäna. Aka oraqen Diosan arunakap yatiykäna ukhas yateqaskakïnwa. Sañäni, Jesusarojj suma yatiyäwinakampi jaqenakan chuymapar purtʼaña, yantʼanakan Diosat jan jitheqtañaw wal kusisiyäna (Isaías 50:4 liytʼañataki; Heb. 5:8; 12:2). Jumatï precursorat servïtajja kusisitaw jakasirakïta. ¿Kunatsa ukham sistanjja? Uk uñjañäni.

KUNATSA BIBLIAT YATICHAÑAJJ KUSISIYISTU

7. Jaqenakar Bibliat yatichañajja, ¿kunatsa walja wayn tawaqonakar kusisiyi?

⁷ Kunatï cheqäki uk jaqenakar yatichasin nayan discipulojar tukuyapjjam sasaw Jesusajj arkirinakapar säna (Mat. 28:19, 20). Jumatï uk lurañ amtaskstajja, wali kusisitaw jakasïta, Diosarus jachʼañcharakïtawa. Kunjamtï tiempompejj kun lurañs sum yateqtanjja, ukhamarakiw tiempompejj jaqenakar Bibliat sum yatichañ yateqäta. 19 maranïkasin precursorat serviñ qalltiri Timothy jilatajj akham siwa: “Diosar precursorat serviñajj walpun kusisiyitu, ukhamatwa Jupar munasitaj uñachtʼayta. Qalltanjja, janiw maynirus Bibliat yatichkayätti. Ukampis qhepatjja, yaqha lugarar sarasajj niya mä phajjsinakwa waljanir Bibliat yatichañ qalltayäta. Jupanakat maynejj tantachäwinakar sarañwa qalltäna. Qhepatjja Soltero Jilatanakan Bibliat Yatjjatapjjañapatak Escuelaruwa pä phajjsi sarayäta, uka escuelatjja yaqha cheqaruw khitapjjetäna. Ukansti, pusiniruw Bibliat yatichañ qalltayäta. Biblian cheqa yatichäwinakap yatichasajja, kunjamsa Diosan espíritu santopajj jaqenakar yanaptʼi ukwa uñjta, ukajj walpun kusisiyitu” sasa (1 Tes. 2:19).

8. ¿Kunsa yaqhep wayn tawaqonakajj jukʼamp jaqenakar yatiyañatakejj lurapjje?

⁸ Yaqhep wayn tawaqonakajj yaqha aru parlañwa yateqapjjaraki. Estados Unidos markankir Jacob sat jilatajj akham siwa: “Paqallqo maranïskayäta ukhajja, yateqer masinakajajj Vietnam markatäpjjänwa. Jupanakarojj Jehová Diosatwa yatichañ munayäta, ukatwa parlapkäna uka aru yateqta. Uka arjja, Yatiyañataki revistajj inglesat utjkäna ukampi, vietnamita arut utjkäna ukampi igualtʼayasaw yateqta. Utaj jakʼanjja vietnamita aru parlir congregacionaw utjäna, uka congregacionankir jilat kullakanakan amigopayätwa. 18 maranirojj precursorat serviñwa qalltayäta. Qhepatjja, Soltero Jilatanakan Bibliat Yatjjatapjjañapatak Escuelaruw sarayäta. Uka escuelaw jichhajj sirvkta uka congregacionan sum yanaptʼañajatakejj wakichtʼawayitu. Congregacionanjja, naya sapakïtwa jilïr irpirejja, precursoratwa serviskarakta. Vietnamitanakajj walpun arup yateqatajat muspharapjje. Utanakaparus invittʼapjjarakituwa, awisajj Bibliat jupanakar yatichañsa qalltaraktwa. Jupanakat yaqhepajj bautisasjjapjjewa” sasa (Hechos 2:7, 8 uñjjattʼarakïta).

9. Jaqenakar Bibliat yatichasajj ¿kunanaksa yateqäta?

⁹ Jaqenakar Bibliat yatichasajj sum trabajiñsa, sum parltʼañsa, jan ajjsarirïñsa, jaqenakar respetompi parltʼañsa yateqätawa, yaqha ukhamanaksa yateqarakïtawa (Pro. 21:5; 2 Tim. 2:24). Janiw ukakïkiti, kunarutï creykta ukanaksa Bibliamp qhanañchañwa yateqarakïta, Jehová Diosampi trabajiñsa yateqarakïtawa, ukham lurasajj jukʼamp kusisitaw jakasïta (1 Cor. 3:9).

10. Diosan arunakap jan istʼañ munapki uka cheqansa jakstajja, ¿kunatsa Bibliat yatichasajj kusisitäsma?

¹⁰ Jaqenakajj Diosan arunakap jan istʼañ munapki uka cheqan jaksta ukhasa, Bibliat yatichasajj kusisitaw jakasisma. ¿Kunatsa ukham sistanjja? Congregacionanjja taqeniw Bibliat yateqañ munirinakar thaqañatak chʼamachasipjje. Mä jilatakis yateqañ munirirojj katjchejja, taqeniw ukham chuyman jaqenakarojj thaqtanjja, katjasinsti taqenirakiw kusistanjja. Amuytʼañataki, Diosan arunakap jan istʼañ munapki uka cheqanjja, Brandon jilatajj llätunka maranakaw precursorat servïna. Jupajj akham siwa: “Niyakejjay Jehová Diosajj ‘arunakaj yatiyapjjam’ sischistojja, arunakap yatiyañajj wal kusisiyitu. Colegio tukuyasaw precursorat serviñ qalltawayta. Congregacionankir wayn tawaqonakaru chʼamañchtʼañajj wal gustitu, kunjamsa Diosar sapürutjam jakʼachasipjje uk uñjañas wal kusisiyarakitu. Soltero Jilatanakan Bibliat Yatjjatapjjañapatak Escuelar sarayäta uka qhepatjja, yaqha cheqaruw precursorat serviñajatak khitapjjetäna. Nayajj janis khitirus bautisasipjjañapatak yanaptʼkstjja, yaqha jilat kullakanakajj yanaptʼapjjewa. Precursorat Diosar serviñ amtatajatjja walpun kusista” sasa (Ecl. 11:6).

WALJA BENDICIONANAKAW JUMATAK UTJASPA

11. ¿Kun lurasas yaqhep wayn tawaqonakajj Diosar servipjje?

¹¹ Diosan markapanjja walja lurañanakaw utji. Sañäni, walja wayn tawaqonakajj Tantachasiñ Utanak lurañana, jan ukajj yaqha ukhamanakanwa yanaptʼapjje. Oraqpachanjja walja Tantachasiñ Utanakaw munasi. Uka utanaka lurañan yanaptʼañajj Diosar serviñampi sasiwa, Diosaruw jachʼañchi, kusisit jakasiñatakis yanaptʼarakïtamwa. Jilat kullakanakamp chika yaqha ukhamanakan yanaptʼasajj kusisirakïtawa. Diosar serviñataki utanak lurañan yanaptʼasajja, usuchjasirjam jan trabajiñatakisa, suma trabajirïñatakisa, encargadonakar istʼañatakis yanaptʼätamwa.

12. Jumatï precursorat Diosar servïta ukhajja, ¿kuna bendicionanaksa katoqasma?

¹² Kevin sat mä jilatajj akham siwa: “Jiskʼaskayäta ukhajja, precursoratwa Diosar serviñ munayäta. Ukatwa 19 maranëjjasajj precursorat serviñ qalltta. Qollqe ganasiñatakejja, mä jilatampiw construccionan chika uruki trabajiyäta. Ukanwa utanak techañsa, ventananaka punkunaka uchañsa yateqta. Qhepatjja, pä maraw Tantachasiñ Utanak luraña, jilat kullakanakan utanakapajj jachʼa thayampi (huracán) apatäkäna uka utanak askichañ yanaptʼayäta. Sudáfrica toqenwa Tantachasiñ Utanak lurañataki yanaptʼirinakajj munasi sasin istʼayäta ukhajja, ukar sarañatakiw mä solicitud phoqantayäta, ukhamatwa ukar jawsayapjjetäna. Africanjja, Tantachasiñ Utanak lurañan mä qhawqha semananak yanaptʼasajj yaqha lugararuw sararakta. Ukan trabajirinakajj mä familiakïpjjtwa, juntokiw jakasipjjta, Bibliatsa yatjjatapjjta, trabajipjjarakta. Uka cheqanakankir jilat kullakanakampi sapa semana yatiyañajj wal kusisiyitu. Jiskʼäkasajj kun lurañtï amtkayäta ukanak lurañajj kusisit jakasiñatakiw yanaptʼawayitu” sasa.

13. ¿Kunatsa Betelan serviñajj wayn tawaqonakar kusisiyi?

¹³ Nayrajj precursorat servipkäna uka jilat kullakanakajja jichhajj Betelanwa sirvjjapjje. Kunanakatï ukan luraski ukajj Jehová Diosatakiwa, ukan serviñajj wali kusiskañawa. Ukhamarus Betelan trabajir jilat kullakanakajja, Bibliat apstʼat qellqatanak taqeni katoqapjjañapatakiw yanaptʼapjje. Betelan trabajir Dustin sat jilatajj akham siwa: “Llätunk maraniskayäta ukhaw precursorat serviñ amtayäta. Ukatwa colegio tukuyjjasajj precursorat serviñ qalltta. Mä mara chikatani qhepatsti, Betelan serviñajatakiw jawsapjjarakitu. Ukanwa Bibliat apstʼat qellqatanak imprimki uka maquinanak apnaqañsa, computadoranak programañsa yateqta. Diosan markapajj kunjamsa nayrar sartaski ukajj Betelanwa yatiyasi, ukaw wal gustitu. Betelan kunanakatï luraski ukampejja, Jehová Diosan amigopäpjjañapatakiw jaqenakar yanaptʼasi, ukatwa Betelankañajj nayar wal kusisiyitu” sasa.

¿KUNANAK LURAÑSA AMTÄTA?

14. ¿Kunjamsa precursorat serviñatakejj jichjatpach wakichtʼasisma?

¹⁴ ¿Kunjamsa precursorat serviñatakejj jichjat wakichtʼasisma? Jehová Diosar taqe chuyma serviñatakejja, nayraqatajj suma cristianöñatakiw chʼamachasiñama. Ukatakejj sapüruw Bibliat yatjjatañama, kuntï yateqkta ukanakatsa lupʼiñamarakiwa. Tantachäwinakan arstʼañatakis chʼamachasiñamawa. Colegionkkasajj jukʼamp sum yatiyañatakiw chʼamachasiñamaraki. Jaqenakat llakisiñsa yateqañamarakiwa, ukatakejj respetompiw kunsa amuyapjje uk jisktʼañama, ukatsti kamsapjjes uksa sum istʼañamarakiwa. Tantachasiñ Uta qʼomachañsa, askichañsa, jan ukajj yaqha ukhamanakansa yanaptʼarakismawa. Jehová Diosarojja, humilde chuymanïpki, yanaptʼañatakis jankʼakïpki ukanakaw kusisiyi (Salmo 110:3 liytʼañataki; Hech. 6:1-3). Nayra tiemponjja, “wali sumwa jilatanakajj Timoteot parlapjjäna” ukatwa apóstol Pablojj misioneroñapatak invittʼäna (Hech. 16:1-5).

15. ¿Kunsa trabajonïñatakejj lurasma?

¹⁵ Precursoranakatjja niya taqeniw jakasiñatakejj trabajipjje (Hech. 18:2, 3). Ukhamajj jakaskta ukanjja, inas chika uruki trabajiñatak mä oficio yateqchisma. Ukatakejj Tamanak tumptʼiriru ukat precursoranakaruw kunan trabajiñas walïspa uk jisktʼasisma. Kunjamatï Biblian siskejja, “taqe luräwinakamjja Tatitun amparapar jaytam, ukatsti amtäwinakamajj phoqhasiniwa” (Pro. 16:3; 20:18).

16. ¿Kunatakis wayn tawaqökasin precursorat serviñajj yanaptʼiristam?

¹⁶ Jutïrinjja, kusisit jakasisma ukwa Jehová Diosajj muni (1 Timoteo 6:18, 19 liytʼañataki). Precursorat sirvkasajj mayni precursor jilat kullakanakamp chikaw Diosar servïta. Ukaw suma amuytʼasir cristianöñatak yanaptʼätam. Wayn tawaqökasin precursorat serviñajj matrimonionsa yanaptʼapjjetuwa sasaw walja jilat kullakanakajj sapjje. Precursoräkasin casarasipjje ukanakajja, chacha warmjamajj precursorat servisipkakiwa (Rom. 16:3, 4).

17, 18. ¿Kunatï chuymasan utjki ukampi, kun lurañtï amtkañäni ukampejj kunansa niya pachpaki?

¹⁷ Kunatï chuymasan utjki ukarjamaw kun lurañsa amttanjja. Salmo 20:4 textojj Jehová Diosat akham siwa: “Chuymaman munataparjam phoqpan, taqe amtäwinakam phoqhasiypan” sasa. Ukhamajj kunsa jakäwimampejj luräta, Diosajj kunsa jichhajj luraski, Diosar serviñatakejj kunsa lurasma ukanakat sum amuytʼasiñamawa. Ukjjarojj kunas Jehová Diosarojj kusisiyi ukarjam lurañatakiw chʼamachasiñamaraki.

¹⁸ Jehová Diosar taqe chuyma servisajj wali kusisitaw jakasïta, ukham lurasajj Juparuw jachʼañchäta. Ukhamasti, “Tatiturojj suma chuymamp munasim, jupasti chuyma manqheman mayisitamarjamaw churätam” (Sal. 37:4).