¿Kunjamäsktasa uk Diosajj yatpachati?

DIOSAN LURATANAKAPAJJ ¿KUNSA YATICHISTU?

Gemeloa jan ukajj ispa wawanakat parltʼañäni. Jupanakajj wali sum uñtʼasipjje, mayakïpkaspas ukhamäpjjewa. Nancy Segal sat warmejja, gemelonakajj kunjamäpjjesa uka toqet jukʼamp yatjjataski uka utan directorapawa, jupajj mä gemela kullakanirakiwa. Gemelonakat parlkasajja, uka warmejj akham siwa: “Gemelonakajj jukʼa arunakampikiw sum entiendisipjje” sasa. Gemela kullakani mä warmejj akham sarakiwa: “Kullakajampejj wali sum uñtʼasipjjta” sasa.

¿Kunatsa gemelo wawanakajj ukham sum entiendisipjjpacha? Wawanakajj kunjamanakansa jilsuwayapjje ukarjamas jilïr jaqer tukupjjchejja, “celulanakapan niya pachpa ADN utjatapatwa gemelo wawanakajj niya kikpäpjje” sasaw yatjjatasiwayi.

AK AMUYTʼAM: Jehová Diosaw gemelo wawanakarojj ukham uñtʼasipjjañapatak wali sum lurawayi, ukhamajj ¿janit Jupajj yaqha jaqenakat sipansa kunjamsa jikjjatastan uk jukʼamp sum yatkaspa? Jïsa, ukatwa Salmonak qellqeri David chachajj akham säna: ‘Jumaw taykajan purakapan utjayasista. Jañchijan jiltatapajj juman uñjatänwa, jan khitin uñjkat luratäkayäta ukchʼañkama. Nayranakamaw lurat jañchij uñjäna, ukanakasti taqpachaw libromar qellqantasïna’ sasa (Salmo 139:13, 15, 16). Diosajj janiw kunjam luratätansa ukak yatkiti, jan ukasti jakañ vidajj kunjam jaqerus tukuyistu ukwa yatiraki. Ukatwa “Diosakiw sum amuyitaspa” sasin confiysna.

DIOSAJJ KUNJAMÄSKTANSA UK YATIWA, ¿KUNJAMSA BIBLIAJJ UK AMUYTʼAYISTU?

David reyejj akham sasaw Diosar mayisïna: ‘Tatay, jumaw chuymaj uñantista, nayar uñtʼarakista. Jumaw qontʼatajsa, sartatajsa yattajja, lupʼitanakajarojj jayatpach amuytajja. Tatay, janïraw lakajampis arskti ukhaw jumajj taqpach yatjjtajja’ sasa (Salmo 139:1, 2, 4). Jehová Diosajja, chuymasan kunjamäsktansa, kuna amtanakanïtansa ukanak sum yati (1 Crónicas 28:9; 1 Samuel 16:6, 7). ¿Kunsa ukajj Jupat yatichistu?

Diosar mayiskasajj kuna amuyunakanïtansa kunjamäsktansa uk sañatakejj janis arunakajj utjchistojja, taqe kun Luriri Diosajj ukanak yatjjewa. Jupajj janiw luratanakasak uñjkiti, jan ukasti kunatsa ukanak lurtan ukwa yatiraki. Janiw ukakïkiti, janis lurirjamäkstanjja, kuna suma luräwinaksa lursna ukwa Diosajj yatiraki. Cheqas Diosaw munasiri jaqëñasatak lurawayistu, ukhamajj ¿janit Jupajj kuna amuyunakanïtansa, kunjamsa jikjjatastan uk wal yatiñ munpacha? (1 Juan 4:7-10).

Bibliajj akham siwa:

• “Jehová Diosan nayranakapajja cheqapar sarnaqer jaqenakaruw uñchʼukiski, jiñchunakapajj jupanakan ruwtʼasitanakaparuw istʼaskaraki” (1 PEDRO 3:12).

• Diosajj akham siwa: “Nayranakajjajj jumaruw uñchʼukisktam, nayaw yatichaskäma, nayaw amuytʼayaskäma, nayaw sarañamäki uka thak uñachayaskäma” sasa (SALMO 32:8).

DIOSAJJ WALI SINTTʼASIRIWA

Diosajj kunjamsa jikjjatastan uk amuyatap yatiñajja, ¿jan waltʼäwinakar saykatañatakejj yanaptʼistaspati? Nigeria markan jakasiri Anna warmejj akham siwa: “Wali llakitäyätwa, janiw jakañsa munjjayätti. Cáncer de mama usunïtaw sapjjetäna ukhajja, esposojajj jiwatäjjänwa, phuchajas hidrocefalia sat usumpiw hospitalankäna (wawan pʼeqepanjja umaw phoqantatäna). Wawajajj hospitalankäna ukharakiw nayarojj operapjjetäna, quimioterapia, radioterapia ukanaksa lurapjjetäna, ukhaman uñjasiñajj wali chʼamapunïnwa” sasa.

¿Kunas jan aynachtʼañatakejj Anna warmir yanaptʼpachäna? Jupajj akham saskakiwa: “Biblian textonakapat lupʼiñaw wal gustitäna, ukanakat mayajj Filipenses 4:6, 7 textönwa, ukanjja ‘Diosaw sumankañapjja churapjjätam, uka sumankañapasti jaqenakajj kuntï amuyki ukat sipansa jukʼampiwa’ sasaw qhanañchi. Uka arunak amtirïta ukhajja, Jehová Diosan jakʼapankiristsa ukhamwa amuyasirïta. Jupaw nayat sipansa kunjamsa jikjjatasiyäta uk sum yatïna. Diosar serviri amigonakajaw yanaptʼapjjarakitäna.

”Usutakïskaktwa, ukampis janiw nayrjam sint llakisjjapjjti. Jan waltʼäwinakas utjchejja, Jehová Diosajj nanakan jakʼankatap yatisajj kusisitaw jakasipjjta. Santiago 5:11 textojj akham siwa: ‘Aguantirinakajj “kusisitäpjjewa” sasaw sistanjja. Kunjamsa Job chachajj aguantäna ukjja jumanakajj istʼapjjtawa, kunjamsa Jehová Diosajj bendisïna uksa yatipjjaraktawa, Jehová Diosajj wali munasir chuymaniwa, wali khuyaptʼayasirirakiwa’”. Kuna jan walinakansa Job chachajj uñjasïna uk Jehová Diosajj sum yatïna. Jiwasajj kuna jan walinakansa uñjastan uk Diosajj yatirakiwa.