¿Kunanaksa Diosajj luräna?

Maynir jukʼamp uñtʼañatakejja, kunanaksa lurawayi uk yatiñaw yanaptʼistu. Diosar jukʼamp uñtʼañatakejja, ukhamarakiw kunanaksa lurawayi ukanak yatiñasa. Diosajj lurawayki ukajj qhawqsa jichhürunakan yanaptʼistu, jutïrinsa yanaptʼarakistani uk yatiñajj wali musparkañawa.

JAQENAKAR MUNASITAPATWA DIOSAJJ TAQE KUN LURAWAYI

“Jaqenakajj janis Diosarojj uñjapkchejja, Jupajj kunjam Diosas ukajja, aka oraqejj luratäkäna ukhat aksaruw qhan uñjasi. Kunatï luratäki ukanakanwa Jupajj kunjam Diosas ukajj qhan amuyasi” (Romanos 1:20). ‘Tatitojj chʼamapampiw aka oraq luri, amuytʼapampirakiw aka oraqsa saytʼayi, yatiñampiw alajjpachsa uskurakiʼ (Jeremías 10:12). Diosan luratanakapajja, qhawqsa jaqenakar munasi ukwa uñachtʼayistu.

Jehová Diosajj “jupar uñtasitwa” lurawayistu, ukham luratäsajj kusisitaw jakastanjja (Génesis 1:27). Jupatsa yateqasiraksnawa. Jaqenakajj Jehová Diosan amuyunakapa, mandamientonakap amuyiri ukham luratarakïtanwa. Ukanakarjam sarnaqktan ukhajja, kusisitaw jakastanjja, jakäwisas janiw inamayäkiti, Diosan amigoparakïsnawa.

Aka oraqejj qhawqsa Diosajj munasistu ukwa uñachtʼayistu. Kunjamtï apóstol Pablojj siskänjja, “[Diosajj] suma luräwinak lurasaw jupa pachpat qhanañchasïna, alajjpachat jallunaka apayanisa, suma cosecha tiemponak churasa, manqʼañanakampi sistʼayasa, chuymanakamsa kusisiñampi phoqtʼayasaraki” (Hechos 14:17). Jehová Diosajj aka oraq lurkäna ukhajja, janiw kunatï jakañatak wakiski ukak churkistänti jan ukasti, kunanakatï kusisit jakasiñatakejj munaski ukanakwa churistäna. Ukanakajja, taqe kuntï Diosajj jutïrin churañ munkistu ukanakat mä qhawqhakiwa.

Jaqenakan wiñayatak jakasiñasatakiw Diosajj oraq lurawayi. Bibliarjamajja, ‘jaqenakaruw Diosajj oraq katuyi’, “jan chʼusäñapataki, jan ukasti jaqenïñapataki” (Salmo 115:16; Isaías 45:18). ¿Khitinakas aka oraqen jakapjjañapäna, ukat qhawqha tiemposa? Bibliajj akham siwa: “Aski jaqenakajj oraq katoqapjjani, wiñayatakiw ukan jakapjjarakini” sasa (Salmo 37:29).

Uka amtampiw Jehová Diosajj Adanampiru Eva warmimpir luräna. Mä suma paraíso oraqeruw ‘yapuchapjjañapataki, ukhamaraki uñjapjjañapatakʼ usküna (Génesis 2:8, 15). Ukat akham sarakïnwa: “Aka oraqerusti phoqhantapjjarakim, apnaqapjjarakim” sasa (Génesis 1:28). Adanampi Evampejj wiñayatakiw aka oraqen kusisit jakasipjjaspäna. Ukampis jupanakajj janiw Diosar istʼapkänti, ukhamajj janiw aka oraqen jakapkani uka cheqapar sarnaqer jaqenak taypinkapkaniti. Kunjamtï uñjkañänejja, jupanakan jan istʼasipjjatapajj janiw kuntï Diosajj jaqenakatakisa aka oraqetakis amtkäna uk mayjtʼaykänti. Janïr ukat parlkasajja, kunampsa Jehová Diosajj luräna uk uñjañäni.

DIOSAJJ BIBLIA CHURAWAYISTU

¿Kunatsa Jehová Diosajj Biblia churawayistu? Nayraqatjja, Jupar uñtʼañasataki (Proverbios 2:1-5). Bibliajj janiw Diosat jisktʼasktan ukanakar taqpach qhanañchkiti, cheqas janiw kuna libros uk qhanañchkaspati (Eclesiastés 3:11). Ukampis kuntï Bibliajj yatichki ukajja, Diosar jukʼamp uñtʼañatakiw yanaptʼistu. Kunjamsa jaqenakar uñji uk yatisaw Jupajj kunjam Diosasa, kunjam jaqenakas Jupamp katoqatäpjjaspa uk amuysna (Salmo 15:1-5). Diosajj kunjamsa adorayasiñ muni, kunsa qollqe sint munañat amuyi, kunjam sarnaqañassa munaraki ukwa Biblia liytʼasajj yateqsna. Jehová Diosajj kunjam Diosasa ukjja, Jesucriston luratanakapa ukhamarak arunakap yatjjatasaw jukʼamp yatiraksna (Juan 14:9).

Jehová Diosajj kunjamsa kusisit jakassna uk yatiñasatakiw Biblia churarakistu. Ukanjja, kunjamsa familian kusisit jakassna, kunjamsa jan waltʼäwinakar saykatsna ukaw yatichasi. Kunjamtï qhepat uñjkañänejja, Bibliajj akham wali wakiskir jisktʼanakaruw qhanañchi: “¿Kunatsa tʼaqesiñanakajj utji? ¿Kunas jutïr urunakan pasani?”. Amtap phoqañatakejj kunanaksa Diosajj lurawayi ukwa Bibliajj yaticharaki.

¿Kunanakas Bibliajj jan kikpani librötapsa, Diosan apayanitätapsa uñachtʼayaraki? Bibliajj niya 1.600 maranakana mä 40 jaqenakamp qellqatäkchisa, mä toqetakwa parli (2 Timoteo 3:16). Bibliajj qellqaskäna uka tiempot walja maranakas pasjjchejja, kunatï ukan qellqaskäna ukajj pachpakïskiwa, ukjja nayra qellqatanak uñjasaw amuysna. Yaqha nayra libronakajj janiw ukhamäpkiti. Maysa toqetjja, Bibliajj jan yaqha arunakar jaqokipasiñapataki, jan jaqenakar puriñapataki, jan liytʼatäñapataki kunayman jarkʼatas uñjaskchïnjja, jichhürunakkamas utjaskakiwa. Kunjamtï Bibliajj wal aljaski ukham yaqha librojj janiw aljaskiti ni yaqha arunakarus jaqokipaskiti. Jichhürunakkam Biblia utjatapajja, Diosan Arupätapwa uñachtʼayistu, “wiñayatakipuniw jakarakini” (Isaías 40:8).

DIOSAJJ AMTANAKAP PHOQAÑWA ARSUWAYI

Diosajj kuntï jaqenakatak amtawayki uk phoqapuniniwa, ukar confiyañasatakiw Jupajj mä regalo churawayistu. Kunjamtï qalltan sisktanjja, jaqenakajj aka oraqen wiñayatak jakapjjaspa ukwa Diosajj munäna. Ukampis Adán chachaw Diosar jan istʼatapat uka wiñay jakañ aptʼasïna, wawanakapas janirakiw wiñayatak jakasjjapjjaspänti. “Mä sapa jaqen juchapatwa juchajj akapachar mantani, jiwañajj uka juchan utjatapatwa mantaniraki, ukhamatwa jiwañajj taqe jaqenakar katunti, taqenin juchachasipjjatap layku” (Romanos 5:12). Adanan juchar purtʼasitapatjja, “Diosan amtapajj janiw phoqasjjaniti” sasin sañjamänwa. Ukampis ¿kunsa Jehová Diosajj lurpachäna?

Kuntï Jehová Diosajj lurañ amtkäna ukajja, Jupajj kunjam Diosasa ukwa uñachtʼayäna. Cheqaparjam uñjiri Diosätapatwa Adanampir Evampirojj jan istʼasirïpjjatapat castigäna. Ukampis wali munasiri Diosätapatjja, Adanan wawanakapan salvasipjjañapatakiw may lurañ amtarakïna. Jehová Diosajj ukjpachaw wali yatiñampi kunjamsa uka jan waltʼäw askichani uk amtäna (Génesis 3:15). Jupajj Jesucristo toqew juchampita jiwañampit jaqenakar salvañapäna. ¿Kunjamsa uk lurañapäna?

Kuna jan walinakarutï Adanajj Dios contra saytʼasisajj aptʼawaykistu ukanak askichañatakejja, Diosajj Jesusaruw aka oraqer khitanïna, ukhamat jaqenakar jakañar apir thakit yatichañapataki, ukhamarak ‘jakañap churañapataki, waljanir juchat kutsuyañataki’a (Mateo 20:28; Juan 14:6). Jesusajj Adanjam jan juchani jaqënwa, ukatwa jupajj jaqenak layku jiwäna. Ukampis Adanat sipansa, Jesusajj jiwañkamaw Diosar istʼas sarnaqäna. Niyakejjay Jesusajj perfectöchïnjja, janiw jiwañapäkänti, ukatwa Jehová Diosajj jaktayasin alajjpachar katoqjjäna. Jesusajj kuntï Adanajj jan lurirjamäkäna ukwa luräna, mä arunjja, wiñayatak jakapjjañapatakiw jaqenakar yanaptʼäna. “Kunjamtï mä sapa jaqen jan istʼasirïtapat walja jaqenakajj jucharar jaqet uñjatäpkänjja, ukhamarakiw mä sapa jaqen istʼasirïtapat walja jaqenakajj cheqap jaqet uñjatäpjjani” (Romanos 5:19). Ukhamasti, Jesusan jiwatap toqew Diosajj kuntï jaqenakatak amtkäna uk phoqani.

Adanajj utjaykäna uka jan walinakwa Diosajj askichäna. Uk yatiñajja, Jehová Diosar jukʼamp uñtʼañatakiw yanaptʼistu. Janiw khitisa ni kunasa amtanakap phoqañatak jarkʼkaspati, ukatwa Diosajj akham säna: “Kuntejj nayajj siskta ukwa phoqharakï” sasa (Isaías 55:11). Qhawqsa Jehová Diosajj munasistu ukwa uñachtʼayarakistu. “Diosajj mä sapa Yoqaparuw akapachar khitanïna, ukhamat jupïpan wiñay jakañ katoqañasataki, ukhamatwa Diosan munasiñap uñjtanjja. Diosaw Yoqaparojj juchanakas laykojj mä sacrificior uñtat khitanïna, ukhamat jupampi sumankthapiñasataki. Janiw jiwasan juparu munasitas laykojj uk lurkänti, jan ukasti jiwasar munasitap laykuw uk luräna” (1 Juan 4:9, 10).

Niyakejjay Jehová Diosajj Yoqaparu jiwas layku jiwañapatak khitanchïnjja, ¿janit ‘jiwasat khuyaptʼayasisajj taqe kuntï arsuwayki ukanak churkistaspa’? (Romanos 8:32). Diosajj kunanak churañsa arsuwayi uk jichhajj uñjañäni.