¿Tantachäwinakar sarasajj kunjam chuymanïtassa uñachtʼaytanjja?

1, 2. 1) Tatitun Cenap amtañataki millón millón jaqenakajj tantachasipjje ukhajja, ¿kunsa Diosajj uñji? (Nayrïr paginankir foto uñjjattʼäta). 2) ¿Kunsa aka yatichäwin uñjaskañäni?

SAPA marajj Tatitun Cenap amtañataki millón millón jaqenakajj tantachasipjje ukhajja, Diosajj janiw walja jaqenak tantachasitak uñjkiti, jan ukasti, sapa mayniruw uñji. Sañäni, sapa mara saririnakaruw uñji, jupanakat yaqhepajj wali arknaqatas uñjasipkchejja, uka tantachäwit janiw faltasipkiti. Yaqhepajj sapa semanajj apaski uka tantachäwinakar janis sarapkchejja, Jesusan jiwatap amtañataki tantachäwirojj sarapjjapuniwa. Yatiñ munasin nayrïr kuti sarapki ukanakarusa, ukhamarakiw Diosajj uñji.

² Jesusan jiwatap amtañataki waljanir tantachtʼasit uñjasajja, Diosajj wal kusispacha (Luc. 22:19). Ukampis Jupatakejj qhawqhanis uka tantachäwir sarapjje ukat sipansa, kunatsa sarapjje ukaw jukʼamp wakiskirejja. Maysa toqetjja, janiw Jesusan jiwatap amtañataki tantachäwiruk sarañasäkiti, jan ukasti, Diosajj sapa semanatak waktʼayki uka tantachäwinakaruw sarañasaraki, ¿kunatsa ukham sistanjja? Ukwa aka yatichäwin uñjaskañäni.

HUMILDE CHUYMANÏTASATWA TANTACHÄWINAKAR SARTANJJA

3, 4. 1) ¿Kunatsa tantachäwinakar sartanjja? 2) ¿Tantachäwinakar sarasajj kunjam chuymanïtassa uñachtʼaytanjja? 3) 1 Corintios 11:23-26 qellqatarjamajja, ¿kunatsa Jesusan jiwatap amtañataki tantachäwir sarañasapuni?

³ Tantachäwinakar sarasaw Diosar yupaychtanjja, ukanwa Jupajj yaticharakistu, ukatwa tantachäwinakar sartanjja. Jachʼa jachʼa tukur jaqenakajj janiw khitimpis yatichayasiñ munapkiti (3 Juan 9). Ukampis jiwasajj Jehová Diosampi ukhamarak markapampiw yatichayasiñ muntanjja (Is. 30:20; Juan 6:45).

⁴ Tantachäwinakar sarasajja, humilde chuymanïtasa ukhamarak Diosamp yatichayasiñ munataswa uñachtʼaytanjja. Janiw wali importantëtap yatisakejj Jesusan jiwatap amtañataki tantachäwir sarktanti, jan ukasti, humilde chuymanïtasatwa sartanjja, “akjja nayat amtasisin lurasipkakim” sasin Jesusajj siskäna uka arunakar istʼañ munatasatwa sararaktanjja (1 Corintios 11:23-26 liytʼañataki). Uka tantachäwejj jutïr urunak suytʼaskakiñatakiw yanaptʼistu, qhawqsa Diosajj munasistu ukwa amtayarakistu. Ukampis chʼamañchtʼatäñatakisa chuymachtʼatäñatakisa, janiw maran may kuti tantachasiñakejj wakiskiti. Ukatwa Diosajj tantachäwinak sapa semanatak waktʼayi, ukanakar sarañaswa mayirakistu. Humilde chuymanïtasatwa uka mayitapar istʼtanjja. Ukatwa tantachäwinakatak wakichtʼasiñatakisa sarañatakis sapa semana tiempo apstʼastanjja.

5. ¿Kunatsa humilde chuymani jaqenakajj Jehová Diosan invitacionapar “iyaw” sapjje?

⁵ Jehová Diosajj jupat yateqañatakiw invittʼistu, walja jaqenakarakiw ukar “iyaw” sapjje (Is. 50:4). Jupanakajj Jesusan jiwatap amtañataki tantachäwiruw nayraqat sarapjje, ukat mayni tantachäwinakaruw sarapjjaraki (Zac. 8:20-23). Diosar walja maranak servirinakasa, machaqanakas wali kusisitaw Diosan yatichäwinakapsa ewjjtʼanakapsa katoqtanjja, ‘Jupaw jiwasar arjjatistu, qhespiyarakistu’ (Sal. 40:17). Taqe kunat sipansa, Diosampi wali munat Yoqapampi yatichatäñataki tantachäwinakar sarañaw jukʼamp importantejja, ukaw wal kusisiyarakistu (Mat. 17:5; 18:20; 28:20).

6. ¿Kunjamsa mä chacharojj humilde chuymanïñajj tantachäwinakar sarañatak yanaptʼäna?

⁶ Sapa maraw Jesusan jiwatap amtir jutapjjañapatakejj walja jaqenakar invitañatak chʼamachastanjja. Humilde chuymani walja jaqenakarakiw uka tantachäwir sarasajj walja bendicionanak katoqapjje. Walja maranak nayrajja, mä jilataw mä chachar mä invitación churäna, uka chachajj “janiw sarañ puedkäti” sasaw säna. Ukampis tantachäwir saränwa. Kunjamsa wali munasiñamp katoqapjjäna uk uñjasajja, uka chachajj taqpach tantachäwinakaruw sarjjäna. Mä maranjja, kimsa kutikiw tantachäwinakat faltasïna. ¿Kunas uka chacharojj tantachäwinakar sarañatak yanaptʼpachäna? Invitkäna uka jilatajj akham sänwa: “Uka chachajj wali humilde chuymaniwa” sasa. Cheqas Jehová Diosaw uka chacharojj markapar irpanïna, jichhajj bautisatäjjewa (1 Ped. 5:5; Juan 6:44).

7. Kuntï tantachäwinakana ukhamarak Biblia liyisajj yateqktan ukanakajja, ¿kunjamsa humilde chuymanïñatak yanaptʼistu?

⁷ Kuntï tantachäwinakana ukhamarak Biblia liyisajj yateqktan ukanakajja, humilde chuymanïñatakiw yanaptʼistu. Jesusan jiwatap amtañataki mä qhawqha semananak nayrajja, kunjamsa Jesusat yateqassna, jiwas layku jiwasin kunjamsa humilde chuymanïtap uñachtʼayäna uka toqenakatwa tantachäwinakan yateqtanjja. Ukat mä qhawqha urunak faltkipanjja, Jesusan jiwatapata jaktatapat parlir textonak liytʼañatakiw Diosan markapajj chʼamañchtʼistu. Taqe ukanakajja, Jesusan jiwatapat wal yuspärañatakiw yanaptʼistu. Ukatwa jupjam humilde chuymanïñataki, jan walin uñjaskasas Diosan munañap lurañatak chʼamachastanjja (Luc. 22:41, 42).

JAN AJJSARIRÏÑAW TANTACHÄWINAKAR SARAÑATAK YANAPTʼISTU

8. ¿Kunjamsa Jesusajj jan ajjsarirïtap uñachtʼayäna?

⁸ Jesusjam jan ajjsarirïñwa munaraktanjja. Niya jiwañap jakʼäjjäna ukhajj kunanakas pasäna uka toqet amuytʼañäni. Kunjamsa enemigonakapajj jiskʼachapjjani, jawqʼjapjjani, jiwayapjjani uk Jesusajj yatkchïnsa, janiw jiwañ ajjsarkänti (Mat. 20:17-19). Ukatwa jiwañap jakʼäjjäna ukhajj Getsemaní sat lugaran apostolonakapar akham säna: “Sartapjjam, jin sarjjapjjañäni, nayar aljantirejj jakʼankjjewa” sasa (Mat. 26:36, 46). Ukat armantat walja jaqenakajj katuntir jutapjjäna ukhajja, jan ajjsarasaw Jesusajj nayraqatar chellqtasajj khitïnsa uk jupanakar säna, ‘apostolonakajar khitjjapjjamʼ sasaw soldadonakar sarakïna (Juan 18:3-8). Ukham lurasajj jan ajjsarirïtapwa uñachtʼayäna. Jichhürunakanjja, ukhamarakiw ajllit cristianonakasa yaqha ovejanakas jan ajjsarirïñatak chʼamachastanjja.

9. 1) Tantachäwinakar jan faltasis sarañatakejja, ¿kunatsa jan ajjsarirïñajj wakisi? 2) Diosar creyipjjatap layku carcelan jistʼantatäpki uka jilat kullakanakarojja, ¿kunjamsa Diosar servitasajj yanaptʼaspa?

⁹ Inas jan walinak utjipan taqpach tantachäwinakar jan sarañ puedkchiñäniti. Ukhamäni ukhajja, jan ajjsarirïñaw wakisini. Yaqhep jilat kullakanakajj usutäpjjewa, jan ukajj llakita, aynachtʼataw uñjasipjje. Yaqhepasti, autoridadanakansa familiaranakapansa wali jarkʼataw uñjasipjjaraki. Diosar creyipjjatap layku carcelan jistʼantatäpki uka jilat kullakanakarojja, ¿Diosar servitasajj qhawqsa yanaptʼaspa uka toqet amuytʼirïtanti? (Heb. 13:3). Jan walin uñjaskasas Diosar serviskaktan ukhajja, jupanakajj Diosar confiyaskakiñataki, Jupat jan jitheqtañataki ukat jan ajjsarirïñatakiw chʼamañchtʼat jikjjatasipjje. Apóstol Pablojj Roma markankir mä carcelankkäna ukhajja, ukhamarakiw jilat kullakanakan Diosar servisipkakitap yatisajj wal kusisïna (Filip. 1:3-5, 12-14). Carcelat niya mistuñampïkäna, jan ukajj carcelat mistjjäna ukhaw Hebreos libro qellqäna. Ukanjja, tantachäwinak jan jaytanukupjjañapatakiw jilat kullakanakar chʼamañchtʼäna, ukat akham sarakïnwa: “Maynit maynikamajj jilapurjam munasisipkakim” sasa (Heb. 10:24, 25; 13:1).

10, 11. 1) ¿Khitinakarus Jesusan jiwatap amtir jutapjjañapatak invittʼañasa? 2) Efesios 1:7 qellqatarjamajja, ¿kunatsa Jesusan jiwatap amtir jutapjjañapataki jaqenakar invittʼañasa?

¹⁰ Jesusan jiwatap amtir jutapjjañapataki familiaranakasaru, trabajir masinakasaru, vecinonakasar invittʼasaw jan ajjsarirïtas uñachtʼayaraktanjja. ¿Kunatsa invittanjja? Jehová Diosasa Jesusas kuntï jiwas layku lurawayapki ukat yuspärañatakiw jaqenakar invittanjja. Jesusan jiwatap taypejja, kunjamsa Diosan ‘khuyapayasiñapat’ bendicionanak katoqapjjaspa uk yatipjjañapwa munaraktanjja (Efesios 1:7 liytʼañataki; Apoc. 22:17).

¹¹ Tantachäwinakar sarasajj ¿kunjam chuymanïtassa uñachtʼayaraktanjja? Cheqas Diosampi Jesusampejj ukham chuymanïpjjatapwa kunayman toqet uñachtʼayapjjaraki.

MUNASIRÏTASATWA TANTACHÄWINAKAR SARTANJJA

12. 1) ¿Kunjamsa tantachäwinakajj Jehová Diosarusa Jesusarus munasiskakiñatak yanaptʼistu? 2) 2 Corintios 5:14, 15 qellqatarjamajja, ¿kunjamsa Jesusat yateqassna?

¹² Jehová Diosaru Jesusar munasitasatwa tantachäwinakar sartanjja, tantachäwinakasti jupanakar munasiskakiñatakiw yanaptʼistu. Kunanaksa Diosasa Jesusas jiwas layku lurawayapjje ukwa tantachäwinakajj amtayistu (Rom. 5:8). Yamas Tatitun Cenapajj qhawqsa jupanakajj jaqenakar munasipjje ukwa amtayistu, Jesusan jiwatapar jan valoranit uñjapki ukanakarus ukhamarakiw wal munasipjje. Jiwasajj Diosar wal yuspärtanjja, ukatwa Jesusat yateqasis sarnaqañatak sapür chʼamachastanjja (2 Corintios 5:14, 15 liytʼañataki). Jiwas layku Yoqapar khitanitapatsa, Diosar wal jachʼañchañ muntanjja. Ukatwa tantachäwinakan taqe chuyma arstʼañatak chʼamachastanjja.

13. ¿Kunjamsa Jehová Diosarusa Yoqaparus wal munasitas uñachtʼaysna?

¹³ Diosarusa Yoqaparus qhawqsa munastan uk kunayman toqet chʼamachasisaw uñachtʼaysna. Sañäni, tantachäwinakar sarañatakejj wal chʼamachasiñasawa. Semanan apaski uka tantachäwinakat jilapartejja, trabajot qarjat kuttʼanktan ukhaw apasi. Mayni tantachäwisti, niya taqenejj samartʼasipki ukhaw seman tukuyan apasiraki. Qarit jikjjataskasas tantachäwinakar saratasjja, ¿Jehová Diosajj uñjpachati? Jïsa, uñjiwa. Jukʼamp chʼamachastan ukhajja, jukʼamp valoranitwa Diosajj kuntï Jupa layku lurktan ukanak uñji (Mar. 12:41-44).

14. ¿Kunsa Jesusajj yatichawayistu?

¹⁴ Kunjamsa mayninakar yanaptʼañatak chʼamachassna uk sumwa Jesusajj yatichawayistu. Jupajj arkirinakap laykuw jiwäna, sapürurakiw kunjamsa jupanakar yanaptʼaspa uka toqet jukʼamp llakisïna. Jesusajj qaritäkchïnsa llakitäkchïnsa, arkirinakapamp parltʼasiñatakejj tiempo apstʼasipunirïnwa (Luc. 22:39-46). Katoqañat sipansa, kunjamsa mayninakar yanaptʼaspa uka toqetwa Jesusajj jukʼamp llakisirïna (Mat. 20:28). Jehová Diosaru ukat jilat kullakanakar ukham wal munasiñäni ukhajja, Jesusan jiwatap amtañataki tantachäwirusa, mayni tantachäwinakarus sarapuniñäniwa.

15. ¿Khitinakarus jukʼamp yanaptʼañasa?

¹⁵ Cheqpach cristiano jilat kullakanak taypinktanwa, uka taypinkapjjañapatakiw jaqenakar invittʼaraktanjja, ukatakiw tiempo apstʼastanjja. Ukampis ‘jiwasjam creyentëpki ukanakaruw jukʼamp yanaptʼañasa’, jupanakat yaqhepajj Diosan markapat jitheqtatäpjjewa (Gál. 6:10). Tantachäwinakaru, jukʼampejj Jesusan jiwatap amtir jutapjjañapataki invittʼasaw jupanakar munasitas uñachtʼaysna. Kunjamtï Diosasa Jesusas kusisipkejja, ukhamarakiw jiwasanakajj mä jitheqtat jilatasa kullakas Awkisar kuttʼanki ukhajj wal kusistanjja (Mat. 18:14).

16. 1) ¿Kun lurañatakis jiwaskam chʼamañchtʼasiñasa, ukat kunjam chuymanïñatakis tantachäwinakajj yanaptʼistani? 2) ¿Kunatsa aka phajjsejj kuntï Jesusajj Juan 3:16 qellqatan siskäna uk amtañajj wakisi?

¹⁶ Jutïr semananakanjja, 19 de abril urun jaypʼu toqer Jesusan jiwatap amtir jutapjjañapatakiw walja jaqenakar invittʼañasa (“¿Jaqenakar invittʼañäniti?” sat recuadro uñjjattʼäta). Jiwaskamas tantachäwinakar saraskakiñatakiw chʼamañchtʼasiñasa. Akapachajj niyaw tukusjjani. Ukatwa tantachäwinakar sarañasapuni, ukanakaw humilde chuymanïñataki, jan ajjsarirïñataki ukat munasirïñatak yanaptʼistani (1 Tes. 5:8-11). Ukhamajj qhawqsa Jehová Diosasa Jesusas munasipjjestu ukat yuspärapjjapuniñäni (Juan 3:16 liytʼañataki).