Jehová Diosajj suykayäta ukat sipansa jukʼampwa bendisiwayitu

Precursorat serviñ qalltkayäta ukhat jichhakamajja, walja bendicionanakwa katoqawayta (Efes. 3:20). Kunas vidajan pasäna uk cuenttʼapjjäma.

Segunda Guerra Mundialajj mä qhawqha phajjsinakakiw qalltaskäna, ukhaw Berlín (Alemania) markana 1939 maran nasiyäta. Guerrajj 1945 maran tukuyañampëjjäna ukhajja, walpun Berlín markarojj avionanakat bombanak jaqtʼanipjjäna, yaqhepajj utaj jakʼaruw purïna. Familiajampejja, mä jarkʼaqasiñ utaruw sarjjapjjayäta. Qhepatjja, Erfurt sat markaruw escapjjapjjayäta, ukanwa mamajajj nasitayna.

Mamajajj Diosar wal uñtʼañ munäna. Ukatwa filosofonakan libronakapatsa, walja religionanakan yatichäwinakapatsa yatjjatäna, ukampis ukanakajj janiw chuymapar purtʼkänti. 1948 maranjja, pä Testigonakaw utajar jutapjjäna. Utar mantayasajja, wal mamajajj jupanakar jisktʼäna. Ukat niya mä hora qhepatjja, akham sasaw sullka kullakajampiru nayampirojj sapjjetäna: “Jichhakuchaw kunatï cheqäki uk yateqasktjja” sasa. Tiempompejj mamajasa, kullakajasa, nayasa, Erfurt markan utjkäna uka tantachäwinakaruw sarjjapjjayäta.

Berlín markaru 1950 maran kuttʼasajja, Berlín-Kreuzberg congregacionaruw sarañ qalltapjjayäta. Yaqha cheqar sarjjapjjayäta ukhajja, Berlín-Tempelhof congregacionaruw sarapjjarakiyäta. Tiempompejja, mamajajj bautisasjjänwa, ukampis nayajj janis bautisasiñatak wakichtʼatäkirista ukhamwa amuyasiyäta.

¿KUNAS JAN AJJSARIRÏÑATAK YANAPTʼITÄNA?

Wali ajjsarirïtaj laykojja, janiw Diosar sum serviñ puedkayätti. Pä maras predicacionar mistkchiyätjja, janiw khitimpis parlkayätti. ¿Kunas yanaptʼitäna? Jehová Diosat jan jitheqtiri, jan ajjsariri jilat kullakanakaw yanaptʼapjjetäna. Yaqhepajj campos de concentración nazi ukanakana, Alemania oriental cheqankir carcelanakanwa uñjasipjjatayna. Yaqhepasti, jamasatwa qellqatanak Alemania oriental cheqar apantapjjatayna. Uk yatisajj akham sayätwa: “Uka cristianonakajj Jehová Dios laykusa, jilat kullakanak laykus niyaw vidap aptʼasipjjäna. Ukhamajj ¿janit nayajj jan ajjsarirïñatak chʼamachaskirista?” sasa.

Jan ajjsarirïñatakejja, 1955 maran utjkäna uka campaña especialan predicañaw yanaptʼitäna. Informadora sat qellqatan mistuniri mä cartanjja, Nathan Knorr jilatajj akham sänwa: “Diosan markapajj wal predicasiñapatakiw mä campaña wakichaski. Taqenitï yanaptʼañäni ukhajja, jan armkañapuniw uka phajjsejj yatiyañäni” sasa. Ukajj cheqäskapunïnwa. Uka qhepatwa Jehová Diosar jakäwij katuyasiyäta, ukat 1956 maranwa tatajampi kullakajamp chikajj bautisasiyäta.

“Precursorat serviñajawa” sasinsa amuykchiyätjja, janiw ukham serviñ qalltkayätti. “Nayraqatjja, kunjamsa yaqha markanakat cosasanak alirista, aljarakirista ukwa Berlín markan yateqä” sasaw amtayäta. Ukatjja, “experiencianïñatakejj profecionajan trabajiñajawa” sasaw sarakiyäta. Ukatwa 1961 maran Hamburgo cheqar trabajir sarjjayäta, ukanwa Alemania markan jukʼamp jachʼa puertojj utjäna. Jukʼamp trabajisajja, jukʼampirakiw precursorat serviñ jayarstʼayaskayäta. ¿Kunas yanaptʼitäna?

Munasir walja jilat kullakanakaw Jehová Diosaru jakäwijan nayrar uchañatak yanaptʼapjjetäna, uka amigonakajat wal Diosar yuspärta. Jupanakat waljanejja, precursorat serviñwa qalltapjjäna, nayajj jupanakjamäñwa munarakiyäta. Erich Mundt jilatajja, Jehová Diosar confiyañatakiw chʼamañchtʼitäna, jupajj campo de concentración ukanwa uñjasitayna. Jilatajj akham sitänwa: “Campo de concentración ukanjja, jupanak pachpar confiyasirinakajj aynachtʼapjjänwa. Jehová Diosar confiyirinakasti, janiw Jupat jitheqtapkänti, markaparus wal yanaptʼapjjäna” sasa.

Martin Poetzinger jilatajja, akham sasaw jilat kullakanakar chʼamañchtʼirïna: “Taqe kunat sipansa, jan ajjsarirïñaw jukʼamp valoranejja” sasa. Qhepatjja, jilatajj Oraqpachan Jilïr Irpirinakat maynirëjjänwa. Jilatan arunakapat wal lupʼirïta, ukaw trabajo jaytañatak yanaptʼitäna, ukat 1963 maran junio phajjsinwa precursorat serviñ qalltayäta. Ukham luratajat janiw arrepentiskti. Pä phajjsinak qhepatjja, precursor especialat serviñatakiw invittʼapjjetäna. Mä qhawqha maranakatsti, clase 44 ukaruw Galaad Escuelar invittʼapjjarakitäna. Cheqansa, Jehová Diosajj suykayäta ukat sipansa jukʼampwa bendisitäna.

GALAAD ESCUELAN WALI SUM YATEQAYÄTA

“Mä asignación katoqasajj jan jankʼak aynachtʼapjjamti” sasaw Nathan Knorr jilatasa, Lyman Swingle jilatasa Galaad Escuelan yatichapjjetäna. “Jan waltʼäwinakas utjkchinejja, aguantasipkakiñamawa” sasaw sapjjetäna. Nathan Knorr jilatajj akham sänwa: “¿‘Qʼañuwa, laqʼonakaw utji, jaqenakajj sinti pisinwa jakasipjje’ sasat llakisipjjäta? ¿Jan ukajj arbolanaka, panqaranaka, jaqenakajj kunja kusisitäpjjesa ukcha amuyapjjäta? Taqe jaqenakar munasiñwa yateqapjjañama” sasa. Mä urojja, kunatsa yaqhepajj jankʼak aynachtʼapjje uk qhanañchkasajja, niyapuniw Lyman Swingle jilatajj jachaqtʼasïna. Ukajj chuymarupuniw purtʼitäna. “Janipuniw Cristorusa ajllit jilanakaparus chuym ustʼaykäti” sasaw amtarakiyäta (Mat. 25:40).

Kawkjarus servir sarapjjä uk yatjjapjjayäta ukhajja, kimsa betelitanakaw “¿kawkjarus sarapjjäta?” sasin jisktʼapjjetäna. Mayninakajj kawkjarus sarapjjani uk istʼasajja, betelitanakajj wal kusisipjjäna, ukampis nayajj “República del Congo markaruw saräjja” sasin sayäta ukhajja, amukiw istʼapjjetäna, ukat “¿Congo markaru? Jehová Diosajj jumampïpan” sasakiw sapjjetäna. Uka tiemponjja, “Congo markan nuwasiñanaka, jiwayasiñanakakiw utjaski” sasaw istʼasïna. Nayarojj kuntï Galaad Escuelan yateqkayäta ukaw yanaptʼitäna. Escuelat graduasisajja, 1967 maran septiembre phajjsinwa, Heinrich Dehnbostel ukat Claude Lindsay sat jilatanakampejj Kinsasa sat markar sarjjapjjayäta.

KHITAPKITÄNA UKA CHEQAJJ MISIONEROT SUM SERVIÑATAKIW YANAPTʼAPJJETÄNA

Kinsasa markar purisajja, kimsa phajjsinakaw francés aru yateqapjjayäta. Ukatjja, Lubumbashi (nayrajj Elisabethville) markaruw avionat sarjjapjjayäta, uka markajj Zambia marka jakʼankiwa. Lubumbashi markar purisajja, misioneronakatak utjkäna uka utanwa quedasipjjayäta.

Ukanjja, jilaparte cheqanakajj janiw predicatäkänti, ukatwa uka cheqanakan wal predicañ munapjjayäta. Mä qhawqha tiempotjja, walja jaqenakaw Bibliat yateqañ munapjjäna, taqe jupanakar yatichañatakejj janiw tiempos utj-jjapjjetänti. Gobiernotak trabajirinakarusa policianakarus predicapjjarakirïtwa. Jupanakat waljanejja, wali respetompiw Bibliarusa predicacionarus uñjapjjäna. Niyakejjay jilaparte jaqenakajj suajili aru jukʼamp parlapjjchïnjja, Claude Lindsay jilatampejj uka aru yateqañatakiw chʼamachasipjjayäta. Qhepatjja, suajili aru parlir congregacionan serviñatakiw khitapjjetäna.

Uka cheqanakan predicañajj wali sumäkchïnsa, jan waltʼäwinakaw uñjarakïna. Walja kutiw machantat soldadonakasa, wali qhoru policianakas nanakat kʼarinak parlapjjäna. Mä kutejja, armantat policianakaw tantachäwir mantasajj policiar apapjjetäna. Ukanjja, oraqeruw qonorayapjjetäna, niya tunka arum horaskamaw ukankapjjayäta.

Khä 1969 maranjja, congregacionanak tumptʼirit serviñatakiw invittʼapjjetäna. África cheqankir walja markanakaruw sarañajäna, awisajj monte cheqanakan kayukiw wali ñeqʼerar thakinakanjam wali jay sarirïta. Mä jiskʼa markanjja, ikkayäta uka catre manqhan mä wallpaw chhiwchhinakapamp ikïna. Willjtanjjäna ukhajj kunjamsa uka wallpajj wal taraqëna uk janipuniw armkäti. Bibliat parlañatakejj kunjamsa jilat kullakanakampejj nina jakʼan qontʼasipjjerïta uksa, janirakiw armkäti.

Kitawalab sat gruponkirinakaw jukʼamp jan walinak congregacionan utjayapjjäna. Jupanakat yaqhepajja, Testigötwa sasaw sapjjäna, bautisasisajj jilïr irpirit kunaw servipjjarakïna. ‘Uman chhaqtayat uka jachʼa qalanakajja’, janiw Diosar taqe chuyma servir jilat kullakanakar engañjapkänti (Jud. 12). Tiempompejja, Jehová Diosajj congregacionanak sum qʼomachjjäna, jukʼamp jaqenakarakiw markapar mantanipjjäna.

Kinsasa markankir sucursalaruw 1971 maran khitapjjetäna. Ukanjja, cartanak katoqasa, qellqatanak apayasa ukat Departamento de Servicio ukanwa trabajiyäta. Wali pisin jakasiri mä jachʼa markan kunjamsa taqe kunas sum sarayasispa ukwa Betelan yateqayäta. Awisajja, avionat apayapkayäta uka cartanakajj walja phajjsinakatwa congregacionanakar purïna, ¿kunatsa? Avionat apaqasajja, barconakatwa cartanakajj apayasirïna. Ukampis jacintos de agua sat alin wal jilantatapatjja, walja semananakaw barconakajj uman sayantjjapjjerïna. Ukham jan waltʼäwinakas utjkchïnjja, cartanakajj congregacionanakar puripunirïnwa.

Jilat kullakanakajj kunjamsa jachʼa tantachäwinak jukʼa qollqempik wakichapjjerïna uk uñjasajj wal musparirïta. Termitanakan utap patjjaruw plataforma waktʼayapjjerïna, pasto elefante sat jachʼa hojanakampiw perqanaksa qonuñanaksa lurapjjerïna. Bambú sat lawanakampisti, utan columnanakapwa saytʼayapjjerïna, totorat lurata esteranakampiw techonaksa mesanaksa lurapjjerïna. Arbolanakan tʼunanakapwa clavonak lantejj apnaqapjjarakirïna. Ukham lurir uñjasasa, kunjamsa jan walinakar saykatapjjäna uk uñjasas wal musparirïta. Jupanakar walpun munasiyäta. Yaqha cheqar khitapjjetäna ukhajja, wal jupanakat llakisiyäta.

KENIA MARKANWA SERVIRAKIYÄTA

Nairobi (Kenia) markankiri sucursalan serviñatakiw 1974 maran khitapjjetäna. Uka sucursalajja, tunka yaqha markanakaruw yanaptʼarakïna. Uka markanakat yaqhepanjja, predicañajj jarkʼatänwa. Ukhamasti, walja lurañanakaw sucursalan utjäna. Jarkʼat uñjasipkäna uka markanakar visittʼirejj walja kutiw khitapjjetäna, yamas Etiopía markarojj khitapjjapunitänwa. Ukanjja, jilat kullakanakajj wali tʼaqesiyata, arknaqataw uñjasipjjäna. Yaqhepajj carcelan llawintata, jiwayataw uñjasipjjarakïna. Ukampis Jehová Diosampi jilat kullakanakampi sum apasipjjatap laykojja, janiw Diosat jitheqtapkänti.

Khä 1980 maranjja, Canadá markankiri Gail Matheson kullakampiw casarasiyäta. Galaad Escuelanwa jupamp uñtʼasipjjayäta, ukhatpachwa cartanaksa qellqasipjjarakiyäta. Jupajj Bolivia markanwa misionerat serviskäna. Tunka payani maranak qhepatsti, Nueva York markanwa jikisipjjayäta, mä qhawqha tiempotjja, Kenia markanwa casarasipjjarakiyäta. Gail esposajajj Diosjam amuyañatakiw chʼamachasi, kunatï utjapkitu ukampejj kusisitakiw jakasiraki, ukhamätapat wal yuspärta. Jupajj jan jaytjasiri munat compañerajawa.

Sucursal sarayirit serviskayäta ukhaw 1986 maran “congregacionanak tumptʼirinakan uñjiripatwa servirakïta” sasin sapjjetäna. Kenia markankir sucursalajj uñjkäna uka markanakat walja markanakaruw Gail esposajamp visitapjjayäta.

Asmara (Eritrea) markan 1992 maranjja, kunjamsa mä jachʼa tantachäwejj apasïna uk janipuniw armkäti. Uka tiemponjja, predicañajj janiw uka markan jarkʼatäkänti. Jachʼa tantachäwi apañatakejja, kawkjantï manqʼañanakajj imaski uka utakiw utjäna, uka utajj jan walipuniw anqat uñtasïna, manqhajj jukʼamp jan walïnwa. Ukampis tantachäw urojja, jilat kullakanakajj kunjamsa uka uta Diosar yupaychañatak mä suma lugarar tukuyapjjatayna uk uñjasajj wal musparayäta. Waljaniw qʼoma telanak apasajj jan sum uñjaskäna uka cheqanak sum tapjjatapjjatayna. Jachʼa tantachäwejj wali sumänwa, 1.279 ukhaniw tantachasipjjarakiyäta.

Congregacionanak visittʼapjjayäta ukhajja, kunayman lugaranakanwa alojasipjjerïta. Awisajj lamar qota jakʼankir mä suma jachʼa utanwa quedasipjjerïta. Awisasti, mä jiskʼa utanakwa ikipjjerïta, bañopas 100 jila metronak jayankänwa. Ukampis kunjamsa precursoranakampisa, mayni jilat kullakanakampis jan tiempon wal predicapjjerïta ukaw nanakatakejj jukʼamp jan armkañajja. Yaqha cheqar khitapjjetäna ukhajja, walja jilat kullakanakatwa despidtʼasipjjayäta, wal jupanakat llakisipjjarakiyäta.

ETIOPÍA MARKANWA WALJA BENDICIONANAK KATOQAPJJARAKIYÄTA

Khä 1987 marat 1992 marakamajja, Kenia markankir sucursalajj uñjkäna uka markanakat walja markanakanjja, Diosar serviñajj janiw jarkʼatäjjänti. Ukhamajj jukʼamp sucursalanaka ukat oficinas de país ukanakaw utj-jjäna. 1993 maranjja, Adís Abeba (Etiopía) markan utjki uka oficinan serviñatakiw khitapjjetäna. Uka markanjja, Diosar serviñajj jarkʼatänwa, jichhajj janiw jarkʼatäjjeti.

Jehová Diosajj Etiopía markan predicasiski ukar wal bendisiwayi. Ukanjja, walja jilat kullakanakaw precursorat servisipki. 2012 maratjja, sapa tunkanit paniniw sapa marajj precursor regularat serviwayapjje. Diosan markapan utjki uka escuelanakasti, walja jilat kullakanakaruw wakichtʼawayaraki. 120 jila Tantachasiñ Utanakaw lurasiwayi. 2004 maranjja, Betel familiajj yaqha machaq oficinanakaruw sarjjapjjäna. Uka pachpa cheqanjja, Salón de Asambleas utaw lurasiwayaraki, ukajj taqe jilat kullakanakaruw yanaptʼawayi.

Taqe uka maranakanjja, Gail esposajampejj wali sumaw Etiopía markankir jilat kullakanakamp apasipjjayäta. Kunjamsa jupanakajj wali munasiñampi uñjapjjetäna ukajj chuymaruw purtʼapjjetäna. Usutäpjjataj laykojja, jichhakiw Europa central cheqankir sucursalan serviñatak khitapjjetu. Ukan wali munasiñampis uñjapkchitojja, Etiopía markankir jilat kullakanakat janiw armasipkti.

JEHOVÁ DIOSAW JILTAYAWAYI

Jehová Diosajj kunjamsa markapan jiltañapatak wal yanaptʼawayi uk nanak pachpaw uñjawayapjjta (1 Cor. 3:6, 9). Congo markar cobre thaqañatak sarapkäna uka Ruanda markankir mineronakar nayrïr kuti predicayäta ukhajja, janiw mä Testigos Ruanda markan utjkänti, jichhajj 30.000 jila Testigonakaw utj-jje. 1967 maranjja, 6.000 jilat kullakanakaw República del Congo markan utjäna, jichhajj niya 230.000 yatiyirinakaw utj-jje. 2018 maransti, 1.000.000 jila jaqenakaw Jesusan jiwatap amtañatak tantachasipjjäna. Kenia markankir sucursalajj uñjkäna uka markanakanjja, 100.000 jila yatiyirinakaw utj-jje.

Phesqa tunka maranak nayrajja, Jehová Diosajj jupar sapürunjam serviñatakejj walja jilat kullakanakampiw yanaptʼawayitu. Jan ajjsarirïñatakejj chʼamachasiskaktwa, ukampis Jehová Diosar confiyañwa yateqawayta. África cheqan serviñajja, paciencianïñataki ukat kunatï utjkitu ukampik kusisit jakasiñatakiw yanaptʼawayitu. Kunjamsa jilat kullakanakajj purapat yanaptʼasipjje, jan walinak aguantapjje, Jehová Diosar confiyapjje uk uñjañajj wal kusisiyapjjetu. Jehová Diosajj wali munasiñampiw uñjawayitu, ukatwa wal yuspärta. Diosajj suykayäta ukat sipansa jukʼampwa bendisiwayitu (Sal. 37:4).