¿Escudosajj kunjamäskisa?

1, 2. 1) Efesios 6:16 textorjamajja, ¿kunatsa mä ‘jachʼa escudonïñajj’ wakisi? 2) ¿Kuna jisktʼanakarus qhanañchañäni?

NIYAKEJJAY Diosar confiyatasajj ‘mä jachʼa escudor uñtasitächejja’ ¿escudosajj qhawqchʼasa? (Efesios 6:16 liytʼañataki). Kunjamtï mä jachʼa escudojj niya taqpach cuerpor jarkʼaqkejja, ukhamarakiw Diosar confiyañajj qʼañu juch lurañanakatsa, nuwasiñanakatsa, yaqha ukhamanakatsa jarkʼaqestu.

² Ukampis ‘qhepa urunakan’ jakatas laykojja, Diosar confiyatas uñachtʼayañajj wakisiskakiniwa (2 Tim. 3:1). Ukhamajja, ¿escudosajj sumäskiti janicha uk kunjamatsa yatsna? ¿Kunsa escudos sum katjjaruñatakejj lurañasa? Uka jisktʼanakar jichhajj qhanañchañäni.

¿ESCUDOSAJJ KUNJAMÄSKISA?

3. Nayra tiemponakanjja, ¿kunjamsa soldadonakajj escudonakap sum cuidapjjerïna, ukat kunatsa ukham lurapjjerïna?

³ Bibliajj qellqaskäna uka tiemponakanjja, escudonakajj lipʼichimpi forrantatänwa. Lipʼichin jan qholuntañapatakejja, soldadonakajj aceitempiw uchapjjerïna, metaläkäna uka cheqanakarus ukhamarakiw jan saruntañapatakejj aceitempi uchapjjerïna. Mä soldadojj escudopan jan walïtap uñjäna ukhajj askichañapänwa, ukhamatwa yaqha nuwasïwitak listokëjjäna. Diosar confiyañat parlañatakejja, ¿kunatsa mä escudot parltanjja?

4. Escudosajj kunjamäskisa uk ¿kunatsa uñakipañasa, ukat kunjamsa uk lursna?

⁴ Kunjamtï soldadonakajj nayra tiempon lurapjjerïkänjja, ukhamarakiw jiwasajj escudos sapa kuti uñakipañasa askichañasaraki, mä arunjja Diosar confiyaskakiñatakiw chʼamachasiñasa. Ukhamatwa jan wali espiritunakampi nuwasiñatak listokïñäni, cristianonakajj jupanakampiw nuwastanjja (Efes. 6:10-12). Janiw khitis escudos askichkaspati. Ukhamajj ¿kunjamsa yantʼanakar saykatañatak wakichtʼassna? Nayraqatjja, Diosaruw oracionan yanaptʼa mayiñasa. Ukatjja, Arupwa liyiñasa, ukhamatwa Diosar taqe chuymat confiyasktan janicha uk yatiñäni (Heb. 4:12). Bibliajj akham siwa: “Tatitur taqe chuymamampi katuyasim; juman chʼikhi kankañamarukejj jan alkatasimti” sasa (Prov. 3:5, 6). Uka arunakarjam amuytʼasajja, ¿kuna amtanakarutï jichhak puriwayktan uka toqet amuytʼañajj janit wakiskaspa? Sañäni, qollqet pistʼat uñjaskayätan ukhajja, ¿Jehová Diosajj kuntï Hebreos 13:5 texton siski uk amtasiyätanti? Ukan akham siwa: “Nayajj janipuniw jaytanukkämati, janipuniw apanukkämasa” sasa. Uka arunakajj ¿‘Jehová Diosaw yanaptʼitani’ sasin confiyañatak yanaptʼistänti? Yanaptʼawaychistu ukhajja, escudosajj suma cuidatäskiwa.

5. Diosar confiyasktanti janicha uk uñakipasajja, ¿kunsa amuysna?

⁵ Diosar confiyasktanti janicha uk uñakipasajja, inas Diosar jan nayrjam confiyatas amuystan. Sañäni, inas sinti llakisitasata, aynachtʼatasata, jan ukajj kʼari arunak istʼatasat Diosar jan nayrjam confiyjjstanti. Ukhamächejja, ¿kunsa Diosar confiyañan jan aynachtʼañatak lursna?

SINTI LLAKISIÑATSA, KʼARI ARUNAKATSA, AYNACHTʼAÑATSA AMUYASIÑÄNI

6. ¿Kunanakat llakisiñas walikïski?

⁶ Jehová Diosampi Jesusampi suma jaqet uñjatäñatak llakisiñasa, yaqha ukhamanakat llakisiñas walikïskiwa (1 Cor. 7:32). Mä jachʼa juchar purtʼastan ukhajja, Diosampi wasitat sum apasiñatakejj wal chʼamachastanjja (Sal. 38:18). Casadonakajja, esposopampi jan ukajj esposapampi sum uñjatäñwa munapjje, uka toqet llakisiñajj walikïskiwa, taqenirakiw familiasatsa jilat kullakanakasatsa llakistanjja (1 Cor. 7:33; 2 Cor. 11:28).

7. Proverbios 29:25 textorjamajja, ¿kunatsa jaqenakar ajjsarañajj jan walïki?

⁷ Maysa toqetjja, sinti llakisisajj janiw Diosar taqe chuym confiyjjsnati. ¿Kunanakas llakisiyistaspa? Maya, manqʼata isitwa sint llakisjjsna (Mat. 6:31, 32). Ukanakat sint llakissna ukhajja, yänaka jan ukajj cosasanak jikjjatañatakiw wal chʼamachasjjsna, qollqe chuymäjjaraksnawa. Ukatsti janiw Diosarojj taqe chuym confiyjjsnati, janirakiw Jupampis sum apasjjsnati (Mar. 4:19; 1 Tim. 6:10). Paya, mayninakampi suma uñjatäñatwa sint llakisjjaraksna. Ukhamäspajja, Diosar ajjsarañat sipansa, jaqenakampi jiskʼachatäña jan ukajj arknaqatäñwa jukʼamp ajjsarjjsna. Jaqenakar jan ajjsarañatakejja, ‘Jumar confiyañatakisa jan ajjsarirïñatakis yanaptʼita’ sasaw Jehová Diosar mayisiñasa (Proverbios 29:25 liytʼañataki; Luc. 17:5).

8. Maynejj Jehová Diosatsa jilat kullakanakasatsa kʼarinak parli ukhajja, ¿kunsa lurañasa?

⁸ ‘Kʼarin awkipa’ Supayajja, munañapankki uka jaqenak toqew Jehová Diosatsa jilat kullakanakasatsa kʼarinak parli (Juan 8:44). Sañäni, apostatanakajj Internetansa televisionansa yaqha ukhamanakansa kʼarinakwa Jehová Diosan markapat parlapjje, kunatï Diosan markapat cheqäki ukanaksa mayjtʼayapjjewa. Uka kʼari arunakajj Supayan ‘aqkir flechanakapat’ maynïriwa (Efes. 6:16). Ukhamajja ¿maynejj kʼarinak parlistani ukhajj kunsa lurañasa? Janiw istʼañasäkiti. ¿Kunatsa? Jehová Diosarusa jilat kullakanakasarus confiytanwa ukatwa jan istʼañasäkiti. Cheqansa, janipuniw apostatanakampejj parlktanti, janirakiw jukʼampi yatiñ munasasa ni kunäkipansa jupanakamp jiskhisktanti.

9. ¿Kunjamsa aynachtʼañajj jan waltʼayistaspa?

⁹ Aynachtʼasaw Diosarojj taqe chuym jan confiyjjaraksnati. Jan walinakan uñjasisajj jankʼakiw askichañatak chʼamachasiñasa. Jan ukham lurañajj janiw walïkaspati. Awisajja jan walinakajj aynachtʼayistaspawa. Ukampis uka jan walinakat janiw sapakut lupʼiñasäkiti. Uka toqetak lupʼisksna ukhajja, kuntï Jehová Diosajj jutïrin lurkani ukanakat armasjjsnawa (Apoc. 21:3, 4). Sinti aynachtʼasajj jan chʼamanjamaw uñjassna Diosar serviñsa jaytjjaraksnawa (Prov. 24:10). Ukampis janiw ukajj jiwasamp pasañapäkiti.

10. Kuntï mä kullakajj qellqkäna ukat ¿kunsa yateqsna?

¹⁰ Estados Unidos markankir mä kullakajja, usuta esposopar cuidasajj Diosar taqe chuyma confiyaskakiwa, ¿kunjamsa kullakajj uk luri? Jupajj akham sasaw central mundialarojj mä carta qellqäna: “Awisajja, ukhaman uñjasiñajj wal llakisiyapjjetu aynachtʼayapjjarakituwa, ukampis jutïrinjja, uka jan walinakajj janiw utj-jjaniti, uk yatiñajj wal chʼamañchapjjetu. Kunanaktï Diosar jukʼamp confiyañatakisa jan aynachtʼañatakis katoqapkta ukat wal yuspärapjjta. Ukanakajj nanakatak wali wakiskiriwa. Ukaw Diosar serviskakiñatakisa Supayan yantʼatäsin jan aynachtʼañatakis yanaptʼapjjetu” sasa. Kullakan uka arunakapajja, aynachtʼañar atipjsnawa ukwa yatichistu. ¿Kunjamsa atipjsna? Jan walinakajj Supayan Dios contra saytʼasitapatwa utji ukwa amtañasa. ‘Jehová Diosaw chuymachtʼitani’ sasaw confiyañasaraki. Diosajj yatichäwinakap manqʼar uñtasit churkistu ukanaksa wali valoranitwa uñjañasa.

11. Diosarojj taqe chuymat confiyasktan janicha uk yatiñatakejja, ¿kunanaksa jisktʼasiñasa?

¹¹ ¿Diosar jukʼamp confiyañasajj wakisiti? Akham jisktʼasiñäni: “Pasïr phajjsinakanjja, ¿jan sinti llakisiñataki, apostatanakan kʼari arunakap jan istʼañataki, jupanakampi jan jiskhisiñatakis chʼamachasiwaytti? ¿Aynachtʼañar saykatawaytti?” sasa. Uka jisktʼanakarutï ‘jïsa’ sisstanjja, Diosar taqe chuymaw confiyasktanjja. Ukampis amuyasiñasawa, Supayajj kunaymanitwa jan waltʼayistaspa. Ukanakat maya uñjañäni.

QOLLQE CHUYMÄÑAT AMUYASIÑÄNI

12. ¿Kunas qollqe chuymäsna ukhajj pasaspa?

¹² Qollqe chuymäsajja Diosar janiw taqe chuym confiyjjsnati, janirakiw Jupar serviñatakis chʼamachasjjsnati. Apóstol Pablojj akham sänwa: “Maynitejj soldadjam serviskchejja, janiw negocionak lurañar mitiskiti, jan ukasti khititejj soldadjam katoqki ukar kusisiyañatakiw chʼamachasi” sasa (2 Tim. 2:4). Cheqansa, romano soldadonakajj janiw negocionak lurapjjañapäkänti. ¿Mä soldadotï negocionak luraspäna ukhajj kunas pasaspäna?

13. ¿Kunatsa soldadonakajj negocionak jan lurapjjañapäkäna?

¹³ Aka toqet amuytʼañäni. Mä gruponkir soldadonakaw espadamp nuwasiñ yatsusipki, ukampis jupanakat maynïrejj janiw ukankkiti. Mercadon manqʼa aljañatakiw wakichasiski. Uka jaypʼojja, soldadonakajj armaduranakapwa uñakipapjje, espadanakapsa ariptayapjjarakiwa. Ukampis manqʼa aljir soldadojja, qhepür aljañatakiw wakichasiski. Qhepa alwasti, mä akatjamatwa enemigonakapajj jupanakar atacañ qallti. Ukhaman uñjasisajja, ¿kawkïr soldados nuwasiñatak wakichtʼatäni, comandanteparus kusisiyarakini? ¿Kawkïr soldadomp chika nuwasiñsa munsna? ¿Nuwasiñatak wakichtʼaskäna ukampi, jan ukajj manqʼa aljañatak wakichaskäna ukampicha?

14. Niyakejjay Criston soldadopästanjja, ¿kunas jiwasatak jukʼamp wakiskirejja?

¹⁴ Kunjamatï nuwasiñatak wakichtʼat mä soldadojj comandantepar kusisiykejja, jiwasajj ukhamarakiw Jehová Diosampiru Cristompir kusisiyañ muntanjja, jupanakaw comandantenakasajja. Jupanakar kusisiyañajj jiwasatak wali wakiskiriwa, kunanaktï akapachan jikjjatksna ukanakat sipansa jukʼamp wakiskiriwa. Ukatwa Jehová Diosar serviñatak chʼamanïñatakisa tiemponïñatakis wal chʼamachastanjja. Niyakejjay Diosar confiyañajj mä escudor uñtasitächejja, escudos askichañatakisa armaduras askichañatakis chʼamachasiraktanwa.

15. ¿Kunsa Pablojj ewjjtʼäna, ukat kunatsa?

¹⁵ Janipuniw jiwas pachparuk confiyasiñasäkiti, ¿kunatsa? Apóstol Pablojja, ‘qamirïñ amtapki ukanakajj Diosar confiyañat saranukupjjaniwa’ sasaw säna (1 Tim. 6:9, 10). ‘Saranukupjjaniwa’ siski uka arojja, jan sinti wakiskirïki ukanak jikjjatañatakiw maynejj chʼamachasjjaspa sañwa muni. Cheqas “jan kunatak servir munañanakaru, jan waltʼayir munañanakampiruw” purtʼassna. Uka munañanakajj janipun chuymasan utjpanti. Ukanakajj Supayan armanakapawa, janipun uk armañäniti, Supayajj ukanakampiw jan waltʼayañ munistu, mä arunjja, Diosar taqe chuyma jan confiyañaswa muni.

16. Marcos 10:17-22 texton qellqatäki uka sarnaqäwi liytʼasajja, ¿kuna jisktʼanakatsa lupʼiñasa?

¹⁶ Walja cosasanak alasiñatakejj qollqenïksnas ukham sañäni. ¿Jan wakiskirïki ukanak alañajj jan walïspati? Janiwa. Ukampis akhamwa jisktʼasiñasa: Qollqenïkstsa, ¿kuntï alkä uk apnaqañatakisa cuidañatakisa tiempos chʼamas utjitaniti? ¿Janit ukanakar sinti munaskäjja? Ukhamäspa ukhajja, ¿Jesusar jan arkañ munkäna uka waynjamarakit Diosarojj jukʼamp serviñ jan munjjeristjja? (Marcos 10:17-22 liytʼañataki). Cheqas jiwasatakejja, kunatï jakasiñatak munaski ukampik jakasiña, Diosan munañap lurañatak tiemponïña chʼamanïñaw taqe kunat sipansa jukʼamp wakiskirejja.

ESCUDOS CHʼAMAMPI KATJJARUPJJAÑÄNI

17. ¿Kunsa janipun armañasäki?

¹⁷ Cristianonakajj mä guerranktanwa, nuwasiñatakejj sapüruw wakichtʼatäñasa, janipun uk armañäniti (Apoc. 12:17). Niyakejjay Diosar confiyañajj mä escudor uñtasitächejja, jiwasaw uka escudo chʼamamp katjjaruñatak chʼamachasiñasa, mä arunjja, jiwasaw Diosar confiyañatak chʼamachasiñasa. Jilat kullakanakasajj janiw jiwas lantejj uk lurapkaspati.

18. Nayra tiemponjja, ¿kunatsa soldadonakajj escudonakap chʼamampi katjjarupjjerïna?

¹⁸ Nayra tiemponakanjja, jan ajjsartʼas nuwasiri soldadorojj jachʼañchapjjerïnwa. Ukampis nuwasïwit jan escudon kuttʼanirinakajj mä phenqʼa uñjatänwa. Sarnaqäwinakat yatjjatiri Tácito sat romano chachajj akham sänwa: “Mä soldadojj escudop aptʼasïna ukhajj mä phenqʼänwa” sasa. Ukatwa soldadonakajj escudonakap chʼamamp katjjarupjjerïna.

19. ¿Kunsa escudos chʼamampi katjjaruñatak lurañasa?

¹⁹ Niyakejjay Diosar confiyañajj mä escudor uñtasitächejja, chʼamampiw katjjaruñasa. Ukatakejj jan faltasisaw tantachäwinakar sarañasa, Diosan sutipatsa Reinopatsa parlañasarakiwa (Heb. 10:23-25). Sapüruw Diosan Arup liyiñasa, kuntï yateqktan ukarjam sarnaqañatakis Jehová Diosaruw yanaptʼa mayiñasa (2 Tim. 3:16, 17). Ukham lurañäni ukhajja, janiw Supayan kuna armapas wiñayatak jan waltʼaykistaniti (Is. 54:17). Diosar taqe chuyma confiyañaw jarkʼaqestani. Jilat kullakanakampi chika Jehová Diosar servisajj janiw kuns ajjsarkañäniti, jan waltʼäwinakarus atipjañäniwa. Janiw ukakïkaniti, Jesusajj Supayarusa Supayan arkirinakaparus tukjkani ukapachajja, Jesús toqetwa saytʼasiñäni, ukajj wali kusiskañäniwa (Apoc. 17:14; 20:10).