Diosampit Cristompit cheqa yatichäwi
Jaqenakajj walja diosanakarus yupaychapkchejja, mä sapa cheqpach Diosakiw utji (Juan 17:3). Jupaw ‘alajjpachankir jachʼa Diosajja’, juparakiw taqe kun Luririsa, jakäwi Utjayirisa. Jupakirakiw yupaychatäñatakejj derechoni (Daniel 7:18; Apocalipsis 4:11).
¿Khitis Diosajja?
Nayra qellqatanakanjja Diosan sutipajj MÄ 7.000 KUTIW UÑSTI
JEHOVÁ Ukaw Diosan sutipajja
TATITO, DIOS, AWKI Ukanakajj Jehová Diosan sutiñchanakapawa
Sutipa. Dios pachpaw akham qhanañchi: ‘Nayätwa Jehová Dios Tatitojja ukarakiw sutejajja’ sasa (Isaías 42:8). Biblianjja, Diosan sutipajj mä 7.000 kutiw uñsti. Ukampis yaqha Biblianakanjja, Tatitu sasakiw Diosan Jehová sutip lantejj aleqat uchjjapjje. Diosajj amigomäñwa muni, ‘sutip aytasis’ Jupar jakʼachasisma ukwa munaraki (Salmo 105:1).
Sutiñchanakapa. Biblianjja, aka sutiñchanakampiw Jehová Diosarojj uñtʼasi: Dios, Taqe Chʼamani, Luriri, Awki, Tatitu, Taqe Kunjjar Munañäni. Diosan servirinakapat waljanejja, Diosarojj Jehová sutip aytasaw oracionanakapan jakʼachasipjjerïna, sutiñchanakap respetomp aytasas jakʼachasipjjarakirïnwa (Daniel 9:4).
Kunjamasa. Diosajj jan uñjkañ mä espirituwa (Juan 4:24). “Janipuniw khiti jaqes Diosarojj kunapachas uñjkiti” sasaw Bibliajj qhanañchi (Juan 1:18). Jupajj kunjamas jikjjatasi uksa Bibliajj qhanañcharakiwa. Luratasampejj chuymap ustʼaysnawa jan ukajj kusisiysnawa (Proverbios 27:11; Salmo 78:40, 41).
Kunjam Diosasa. Diosajj janiw khitirus yaqhachkiti, taqeniruw katoqe (Hechos 10:34, 35). Jupajj khuyaptʼayasiri, sinttʼasiri, jan jankʼak colerasiri, jan jaytjasir Diosawa, taqe kunsa cheqpunwa parli (Éxodo 34:6, 7). Ukampis chʼamanïtapa, yatiñanïtapa, cheqapar uñjirïtapa, munasirïtapaw jilanki.
Chʼamaniwa. Jehová Diosajj ‘Taqe Chʼamani Diosawa’. Kuntï lurañ amtki uk phoqañatakejj wali chʼamaniwa, ukwa ukajj amuytʼayistu (Génesis 17:1).
Yatiñaniwa. Diosjam yatiñanejj janiw khitis utjkiti. Ukatwa Bibliajj “jupa sapakiw yatiñan Diosajj utji” sasin qhanañchi (Romanos 16:27).
Cheqapar uñjiriwa. Taqe kunsa cheqaparjamapuniw luri. Taqe “luräwipasa cheqaparakiwa”, “janiw jupanjja kunatejj jan cheqapäki ukajj utjkiti” (Deuteronomio 32:4).
Munasiriwa. Bibliajja, “Diosajj munasiñawa” sasaw qhanañchi (1 Juan 4:8). Diosajj janiw aleq munasir Diosakïkiti, jan ukasti Jupapachpaw munasiñajja. Munasiñapajj wali jachʼawa, taqe luratanakapanwa uñjasi, ukajj kunaymanitwa yanaptʼarakistu.
Jaqenakampejj kunjamsa apasi. Diosajj Alajjpachankiri munasir Awkisawa (Mateo 6:9). Jiwasatï Jupar confiyañäni ukhajja, amigopäsnawa (Salmo 25:14). Diosajj jiwasanakat wal llakisi, Jupar oración toqe jakʼachassna, problemanakas yatiysna ukwa munaraki (1 Pedro 5:7; Santiago 4:8).
¿Diosampi Jesucristompejj pachpakïpjjeti?
Jesusajj janiw Diosäkiti. Jesusjamajj janiw yaqhajj utjkiti, kunattejj Dios pachpaw jupar lurawayi. Ukatwa Bibliajj ‘Diosan mä sapa yoqapa’ sasin saraki (Juan 1:14). Jesusarojj Jehová Diosaw lurawayi, jupajj Diosan jilïr wawapawa. Ukatjja, ‘suma yatjjattʼat mä trabajirïñapatakiw’ Diosajj uttʼayäna, ukhamat alajjpachsa, aka oraqsa, kunanakatï utjki taqe ukanaksa lurañapataki (Proverbios 8:30, 31, NM; Colosenses 1:15, 16).
Nayajj Diosätwa sasajj janipuniw Jesusajj siskänti. Antisas akham sänwa: “Sutipjjar jutataj laykojj nayajj jupar uñtʼtwa, juparakiw khitanitu” sasa (Juan 7:29). Jesusajj mä discipulapamp parlkasajj jupar akham sänwa: “Nayajj Awkijan ukaruw makataskta, jumanakan Awkimäkis ukaru, nayan Diosajäkis ukaru, jumanakan Diosamäkis ukaruraki” sasa (Juan 20:17). Jiwjjäna uka qhepatjja, Jehová Diosajj alajjpachan jakañapatakiw jaktayäna, kupëjjapar qontʼayasasti, taqe munañanïñwa (autoridad) Jesusar churarakïna (Mateo 28:18; Hechos 2:32, 33).
Jesucristow Diosar jakʼachasiñamatakejj yanaptʼiristam
Jesusajj aka oraqer jutasaw Awkipajj kunjamasa uk yatichistu. Jehová Dios pachpaw Jesusat akham säna: “Jupajj Wawajawa, wali munatawa. Jupar istʼapjjam” sasa (Marcos 9:7). Ukhamajj Jesusaw Diosarojj sum uñtʼi. Jupajj akham sänwa: “Janirakiw Awkirojj khitis uñtʼkiti, jan ukasti Yoqa sapakiw jupar uñtʼaraki. Ukatjja khitinakarutï Yoqajj Awkit qhanañchañ munki ukanakaw uñtʼapjjaraki” sasa (Lucas 10:22).
Diosajj kunjam Diosasa uk Jesusaw qhan uñachtʼayi. Jesusajj Awkipat yateqasisaw taqe kuns luräna, ukatwa jupajj akham säna: “Khititejj nayar uñjkitu ukajj Awkirojj uñjarakiwa” sasa (Juan 14:9). Jesusajj Awkipjam wali munasirïnwa, parlatapampis luratapampis ukwa uñachtʼayäna, ukhamatwa jaqenakarojj Diosar jakʼachasipjjañapatak yanaptʼäna. Jesusajj akham sänwa: “Nayätwa thakisa, cheqasa, jakañasa. Naya taypikiw Awkin ukar puriñajj utji” sasa (Juan 14:6). Ukatjja, akham sarakïnwa: “Cheqpach adoririnakajj alajjpachankir Awkirojj espiritumpi cheqampi adorapjjani” sasa (Juan 4:23). ¿Amuytati? Jehová Diosajj jumjam jaqenakaruw thaqaski, mä arunjja, Jupat kunatï cheqäki uk yatiñ munir jaqenakaruw thaqaski.