Diosar taqi chuym luqtirinakaxa respetompipuniw sarnaqapxi
1 Suma respetompi sarnaqañaxa janiw jichhürunakan uñjasxiti. ¿Kunatsa? Kunattix jaqinakax sapüru luräwinakapampix armtʼasxapxiwa suma respeto arunakampi akham saña “mirä amp suma”, “yuspära”, “pampachita” sasa. Aka qhipa urunakanxa janiw respetompi sarnaqañax utjxaniti sasaw Diosan Arupax säna, kunattix jaqinakax ‘michʼaw tukupxani, jachʼa jachʼaw tukupxani, jilamp parlirinaka, jan yäqasirinaka, jan munasiñanïpxaniwa, jan wali luririnaka, aski luräwinakan uñisirinaka, jan axsarasa kuna jan walsa arsurinaka’ sasa (2 Tim. 3:1-4). Taqi akanakatwa jan respetompi sarnaqañax utji. Diosar axsartʼir jaqinakjamaxa, janiw akapachankir jaqinakjamax jan respeton sarnaqapxañasäkiti.
2 ¿Kunjamsa respetompi sarnaqañasaxa? Respetomp sarnaqañaxa mayninakan amuyunakapatsa llakisiña ukat taqinimpis sumak jakasiñatakiw yanapistu. Akanakarakiw suma respetomp sarnaqañatakix yanaptʼistaspa sañäni: mayninakar sum uñjaña, munasirïña ukat amuyumpi mayninakar uñjaña. Diosarusa jaqi masisarusa munasitas laykuw ukham respeto uñachtʼaytanxa (Luc. 10:27). Janiw ukhamarjam sarnaqañax chʼamäkiti, ukampis jaqi masisampi sum apasiñatakixa yanaptʼistuwa.
3 Suma respetompi sarnaqañatxa Jesusawa mä suma uñachtʼäwi jaytawayistu. Jupaxa aka arunakarjamapuniw sarnaqirïna: “Kunjämtix jumanakax mayninakampix lurayasiñ munapktaxa, ukhamarak jumanakax jupanakarux lurapxam” sasa (Luc. 6:31). Munasiñampi ukat respetompipuniw arkirinakaparux uñjirïna, ¿janit ukham lurañax wali askïkaspa? (Mat. 11:28-30.) Janiw jaqinakan qillqat libronakapat yatiqaskänti, jan ukasti munasiñaw chuymapan utjäna ukatwa respetompi sarnaqirïna. Jiwasanakaxa, taqi chuyma jupat yatiqasiñatakix chʼamachtʼasiñasarakiwa.
4 ¿Cristianonakax kunapachas respeto uñachtʼaysna? ¿Yaqhip luräwinakanakti mayninakamp sum uñjatäñatakix respetomp sarnaqsna? Janiwa, taqi horasanwa respetompi sarnaqañasa. ¿Jilat kullakanakasampix kunjamsa taman respeto uñachtʼaysna?
5 Tantachasiñ Utana. Tantachasiñ Utanwa Diosar yupaychtanxa. Jehová Diosaw utapar jawstʼistu ukat tantachastanxa. Mä arunxa Diosan utapan qurpachatäksnas ukhamawa (Sal. 15:1). ¿Tantachasiñ Utar sarktan ukhax respeto uñachtʼaytanti? ¿Kunjam isisitätansa kunjam kʼachachtʼasitätansa uk uñakiptʼastanti? Chiqpachansa, janiw kunjamtï akapachankir jaqinakax isisipki ukham isisiñ munktanti. Jachʼa tantachäwinakarusa taman utjki uka tantachäwinakarusa Jehová Diosan luqtirinakapjam qʼuma ukat suma kʼachachtʼat saririt uñtʼatätanwa, kunjamtix Diosar katuyata jaqinakax isisipki ukhama (1 Tim. 2:9, 10). Ukhamatwa utapar Jawstʼiri alaxpachankir Diosarusa jilat kullakanakarusa respeto uñachtʼayaraktanxa.
6 Maysa tuqitxa tantachäwinakaru horasapar purisarakiwa respeto uñachtʼaytanxa. Chiqasa awispax ukax janiw faciläkiti. Inas yaqhipanakax wali jayan jakasipchi jan ukax walja wawanïpxaräkchi. Ukampis yaqhip tamanakanxa yatiyirinakax qʼuchumpi ukat mayisiwimpi qalltxi ukhakiw qhiptʼat puriñ yatipxi, sañäni patakatxa pä tunka phisqhaniw ukham lurapxi. Horasapar puriñax wali wakiskiriwa. Suma respetompi sarnaqañaxa mayninakan amuyunakapat llakisiña sañ munaraki. Jehová Diosaw munasir Jawstʼirisaxa, Jupawa jiwasan askisataki manqʼäkaspas ukham suma yatichäwinak waktʼayi. Horasapar purisaw Jupar yuspäratas uñachtʼayaraksnaxa. Ukampis qhiptʼanisaxa mayninakarux mayjtʼaytanwa istʼirinakarusa janis respetksna ukhamawa.
7 ¿Khitinakas tantachäwinakar jichhaki jutasipki uk amuyasktanti? Jupanakaru sum katuqtʼasaxa respeto uñachtʼayaraksna (Mat. 5:47; Rom. 15:7). Wali munasiñampi arunttʼasawa chiqpach cristianütasxa uñachtʼayaraksna (Juan 13:35). Mä Tantachasiñ Utar visittʼir sarasaxa mä chachax akham satayna: “Janisay uka jaqinakaru uñtʼkchiyätxa, kawkïr iglesiarutï wawatpach sarkayätxa ukat sipansa mä urunak chiqpach munasiñ uñachtʼayir jaqinakar jikxatta. Chiqasa, chiqpach yupaychäwi jikxatta” sasa. Ukhamatwa nayra jakäwip apanukusax paqallq phaxsi pasatatxa bautisasxäna. Chiqpachansa suma respetompi mayninakar uñjañaxa wali askipuniwa.
8 Jan uñtʼat jaqinakarutï respeto uñachtʼaystanxa, ¿janit ‘iyäwsir masinakasarux’ ukham respeto uñachtʼaykaraksna? (Gál. 6:10, Machaka Testamento) “Jilïri [chuymankipstat] jaqinak nayraqatansti saytʼasisina jupanakarux mä suma axsartʼaña uñachtʼayarakim” siski uka iwxarjam lurañax askiwa (Lev. 19:32). Tantachäwinakasanxa janipuniw chuymankipstat jilat kullakanakasat armasiñasäkiti.
9 Sum istʼapxañäni. Tantachäwinakanxa, jilat kullakanakasaxa Diosar yupaychañ tuqit suma chʼamañchtʼatäñasatakiw arstʼapxi (Rom. 1:11). Jiwasatï tantachäwinakan iksna, taqin istʼkaya chicle qʼawchisksna, ladosänkki ukampis parlasksna, aliqatak bañor sarsna, yaqha tuqinakat liyisksna jan ukax yaqha luräwinak lursna ukhaxa jan respetonïksna ukhamaspawa. Uka tuqitxa irpir chuymaninakaxa sum sarnaqapxañapa. Arstʼirirusa ukhamarak yatichäwiparusa taqi chuym istʼasaxa wali respetompi sarnaqataswa uñachtʼayaraktanxa.
10 Ukhamaraki, janiw celularanakax naktayatäñapäkiti, ukhamatwa arstʼirirusa tantachasirinakarusa respeto uñachtʼayarakiñäni.
11 Wawanakampi. Awk taykanakaxa wawanakapax kunjamäsipkisa kunsa lurasipki ukxa sumwa uñjapxañapa. Mä wawatï tantachäwin jachasa jan ukax jan aliqtʼasa mayninakar pʼiq usuychi ukhaxa, wali askïspawa waw anqar ichsuña jan ukax irpsuñaxa. Chiqasa, ukham lurañax chʼamäspawa, ukampis ukham lurasax mayninakar respetataswa uñachtʼaytanxa. Jiskʼa wawanakanïpki uka awk taykanakax qhiparuw quntʼasipxi, ukhamat sum ischʼukisipki uka jilat kullakanakaru sartasin jan pantjasiyañataki. Ukat wawanïpki uka jilat kullakanakataki qunuñanak qhipäxar jiltʼayañax wali askïspawa, ukhamatwa respetasirïtasxa uñachtʼaysna.
12 Janïr tantachäwi qalltkipansa jan ukax tukuyxipansa awk taykanakax wawanakapar sumwa uñjapxañaparaki. Janiw Tantachasiñ Utanxa tʼijnaqapxañapäkiti, kunattix mayninakaruw kuna chijir puriyapxaspa. Ukhamaraki anqan tʼijnaqasasa chijinakaruw puripxaspa, arumanakax yamas chʼamakätap laykuxa jukʼamp jan walinakaruw puripxaspa. Ukat anqan jachʼat parlañasa, jakʼankir utaninakaruw colerayaspa, yupaychäwis tuqitsa jan walinak parlapxaspa. Kawkïr awk taykanakatï wawanakapar Tantachasiñ Uta anqansa manqhansa chuymapatjam sum uñjapki uka awk taykanakax wali askpun lurapxi, kunattix mayachtʼat suman jakasiñaruw yanaptʼapxi (Sal. 133:1).
13 Librot yatiqañataki tantachäwina. Utanakapan tantachasiñasataki katuqtʼkistu uka jilat kullakanakarux walpun yuspärtanxa. Ukhamasti, uka utanakar sarasaxa respetäsirïtasxa uñachtʼayañasarakiwa. Janïr uka utar mantkasaxa, jan utap qʼañuchjañatakixa sumwa zapatonakas pichartʼasiwayañasa. Awk taykanakax wawanakapxa sum uñjapxañapa, janiw jilat kullakasan yaqha utanakapar mantapxañapäkiti, jan ukasti tantachasiñatak maytʼkistu ukankapxakiñapawa. Janis Tantachasiñ Utanjam tantachatäkstanxa, ukhamaraki jukʼanikïstansa janiw utasanksnas ukham amuyasiñasäkiti. Wawax bañor sarañ munchi ukhaxa, awkiw jan ukax taykaw irpañapa. Amtapxañäni uka tantachäwix Librot Yatiqañataki Taman Tantachäwipawa, ukhamasti Tantachasiñ Utar sarirïktanxa ukham suma isthaptʼata, suma kʼachachtʼataw sarañasaraki.
14 Respetasirïñaxa wali wakiskiriwa. Mayninakar respetañäni ukhaxa, janiw yatiyäwisarukix sum uñjaykaniti, jan ukasti mayninakampi sum apasiñwa yanaptʼistani (2 Cor. 6:3, 4, 6). Kusisit Diosaruxay yupaychstanxa, ukhamasti kusisitaskañasawa, respetasir suma jaqïñasawa, jaqi masisan chuymap kusisiyañ laykuxa jan yäqañjamäkchi ukanaksa phuqañasawa. Respetasir jaqin jakäwipax wali suma uñjatawa.