‘Walja achuqasipkakiñäniʼ
1 Amuytʼayañatakixa, Jesusax chiqpach uva alïkiristsa ukhamätwa sasaw säna, Awkijasti Yapuchirïkaspas ukhamarakiwa, qullan ajayumpi ajllita arkirinakajasti walja uva achuni ramäpkaspas ukhamäpxarakiwa sasaw säna. Yapuchirin luräwipat arkirinakapar amuytʼayasaxa, kunatsa uka uva alimpi mayakïñapax wakisi uk Jesusax sum qhanañchäna (Juan 15:1-4). Khitinakatï Jehová Diosampi sum apasipxi ukanakaxa, ‘chiqpach uva ali’ Jesucristor uñtasitaw ramanakjamax achupxañapa, ukwa aka yatichäwix amuytʼayistu. Ukhamax ‘ajayun luräwiparjamasa’, Diosan Apnaqäwipataki irnaqasasa achuqasipkakiñasawa (Gál. 5:22, 23; Mat. 24:14; 28:19, 20).
2 Ajayun luräwiparjam achuqapxañäni: Qullan ajayun luräwiparjam sarnaqasawa cristianjam nayrar sartatasxa uñachtʼayañäni. Diosan Arupat sapa kuti liyisasa ukhamaraki lupʼisasa, ¿qullan ajayun luräwiparjam sarnaqañataki chʼamachasisktati? (Fili. 1:9-11.) Diosan qullan ajayupxa mayiñamapuniwa, ukaw suma jaqïñ yanaptʼätamxa, ukhamatwa Jehová Diosax jachʼañchatäni ukhamaraki cristianjamas nayraqatar sartaskakïta (Luc. 11:13; Juan 13:35).
3 Ajayun luräwiparjam sarnaqañaxa Jehová Diosatak taqi chuyma irnaqtʼañwa yanaptʼätamxa. Amuytʼañataki, munasiñampi iyawsäwinïñampixa yatiyir sarañataki tiemp apstʼasiñwa yanaptʼistani. Sumankañasa, paciencia chuymanïñasa, khuyaptʼayasirïñasa, suma jaqïñasa, llampʼu chuymanïñasa, ukat munañasar atipjañasa, jan istʼasir jaqinakar sum uñjañatakiw yanaptʼistani. Kusisiñasti jan yäqasir jaqinakar kusisita yatiyañatakiw yanaptʼarakistani.
4 Diosan Apnaqäwipatak irnaqasa achuqapxañäni: Apnaqäwipat parlasax achunïñwa muntanxa. Diosar sacrificio luqtasawa, mä arunxa, ‘lakanakasampi’ Jehová Diosan sutipat yatiyasaw achunïsnaxa (Heb 13:15). Suma yatiyäwinak taqi chuyma apasaw uk lurtanxa. ¿Apnaqäwipat parlasa walja achunïñatakix chʼamachasisktati?
5 Jesusax chiqpach arkirijaxa waljsa jukʼaksa achuqaniw sasaw säna (Mat. 13:23). Ukhamax janiw mayninakan luräwip uñchʼukiñasäkiti, jan ukasti sapa mayniw taqi chuyma Jehová Diosatak lurañasa (Gal. 6:4). Diosan Aruparjam sum amuytʼasisinwa Jehová Diosar jachʼañchañataki ‘walja achuqañani’ (Juan 15:8).