Maynit maynikam chʼamachtʼasiñataki
1. Tamanak tumptʼir jilatax visitkistu ukhaxa, ¿kuns lursna?
1 Roma tamankir jilat kullakanakaruxa, apóstol Pablox akham sasaw qillqäna: “Jumanakarux uñjañwa munta ukhamat ajayu tuqin chʼamachtʼañataki ukhamat jukʼamp sum saytʼasipxañamataki; ukhamat maynit mayniru yanaptʼasiñasataki kawkïr iyawsañatix jumanakansa nayansa utjki ukarjama” sasa (Rom. 1:11, 12). Kunapachatï tamanak tumptʼir jilatax visitkistu ukhaxa, tamanxa ‘maynit mayniruw yanaptʼastanxa’.
2. ¿Kunatsa tamanak tumptʼir jilatax kunapachas visittʼistani ukax jayäkipan yatiyasi?
2 Tamaru. Niya kimsa phaxsi faltkipanwa kunapachas tamanak tumptʼir jilatax visittʼistani ukax yatiyasxi, ukhamat tiempo apstʼasiñasataki ukat uka semanaxa jupamp chika wal irnaqtʼañasataki (Efe. 5:15, 16). Uka semanan visitamp chika yatiyir sarañatakix tiempo irnaqäwiman mayiñamaw wakisispa. Inas uka phaxsix precursorjam irnaqtʼchisma. Ukat inas uka phaxsix jayanakar sarä sas amtaskchiyäta, jan chhaqhasiñatakixa, ¿yaqha urur jittʼayasmati?
3. Sapa mayni jiwasanakax jilatan chʼamañchäwip katuqañatakixa, ¿kuns lursna?
3 ¿Kunatsa tamanak tumptʼir jilatax visitpachïstu? Taman jilat kullakanakar chʼamachtʼañataki ukat kunjamatsa yatiyir sarasax sum yatichsna uk yanaptʼañatakiwa visittʼistu. ¿Janit walïkaspa jupampi irnaqtʼañataki jan ukax warminïchi ukhax kullakanakax warmipampi irnaqtʼañataki mayiñasaxa? Jilatatakixa, mayn mayni jilat kullakanakampi irnaqtʼañaxa wali askiwa, janis maynix suma yatxatatäkpan jan ukax yanaptʼsa yatiyir sarañataki munpan jupampix irnaqtʼapxaspawa. Kunjamsa yatiyir sarasax jaqinakampi parltʼi ukxa taqiniw yatiqassna ukat suma munasiñampi amuytʼayäwinakapatsa yatiqasiraksnawa (1 Cor. 4:16, 17). Jupampi manqtʼasiñataki jawsañäni ukhasa chuymachtʼäwi katuqarakiñäniwa (Heb. 13:2). Ukampis taman kunas munasi ukanakxa arstʼäwinakapanxa qhanañchtʼapuniwa, ukhamax arstʼäwinakap sum istʼapxañäni.
4. ¿Kunjamsa tamanak tumptʼir jilataruxa chʼamañchsna?
4 Tamanak tumptʼir jilataru. Apóstol Pabloxa visitkäna uka jilat kullakat sipansa janiw mayjäkänti. Jupanakjamarakiwa, jan waltʼäwinakansa llakinakansa jikxatasirakïna. Ukatwa chʼamachtʼäwi munäna ukat chʼamachtʼataxa wali kusisitaw jikxatasirïna (2 Cor. 11:26-28). Roma markankir tamax carcelankir apóstol Pablon puriniñapa yatisaxa, yaqhip jilat kullakanakax Pablompi jikisiñatakix 74 kilometronak sarapxäna Foro de Apio satäkis ukakama. Ukat “Pablox jupanakar uñkatasinsti, Diosaruw yuspagari, ukatsti wal kusisirakïna.” (Hech. 28:15.) Ukhamarakiw maynix tamanak tumptʼir jilatarux chʼamañchtʼaspa. ¿Kunjamatsa? Visitkistu uka semanan taqi chuyma jupampi chika irnaqtʼasawa ‘jukʼampi jupar sum uñjatas’ uñachtʼaysna (1 Tim. 5:17). Kuntï juma layku lurki ukanakatxa yuspärtʼätawa ukat sarnaqäwimampi luräwimampiw yuspäratam uñachtʼayarakïta. Iyawsäwisa, munasiñasa, ukhamarak aguantatanakasa uñjasaxa tama tumptʼir jilatasa warmipasa wal kusisipxani (2 Tes. 1:3, 4).
5. ¿Kunatsa taqinis chʼamachtʼatäñ muntanxa?
5 ‘Jan wali tiemponakana jaktanxa’, ¿khitisa jan muntanxa chʼamachtʼatäñxa? (2 Tim. 3:1.) Jichhjatpach tamanak tumptʼir jilatampi semanpach irnaqtʼañataki wakichtʼasipxañäni. Tamanak tumptʼir jilatasa taqi jiwasanakasa maynit maynikamaw chʼamachtʼasipxañäni. Ukhamatwa maynit maynikamax chuymachtʼasiskakiñäni ukhamaraki yanaptʼasiskakiñäni (1 Tes. 5:11).