¿Ukat phuqaskä sasktati?
¿Kuna tuqitsa parlasktanxa? Jehová Diosan Qhanañchirinakapax Directriz anticipada para la atención de la salud (DPA) jan ukax Consentimiento Informado para la Atención Médica (CIAM) uka tarjetanïtanwa, uka tarjeta phuqantañ tuqit parlasktanxa. Janiw yatktanti “kunatix qharürux paskani” ukxa, ukhamax akatjamat chijin uñjasiñäni ukhaxa, kunjamsa qullayasiñäni ukat kuna yanaptʼanaksa wila jan ina chʼusar wartañatakix katuqañäni ukxa nayraqatwa amtxañasa, ukat qillqtʼasiñasawa (Sant. 4:14; Hech. 15:28, 29). Uka tuqinakat sum amtañatakixa, Asistencia médica sin transfusiones. Necesidades y derechos del paciente sat videow wakichasi. Nayraqatxa uka video uñtañasawa, ukatxa Diosat maytʼasisaxa kunanaksa uñjawaytan ukanakwa aka jisktʼanakampi yanaptʼayasisax amtapxañasa. (Uka video uñjkasaxa awk taykanakaxa jiskʼa wawanakanïpxchi ukhaxa amuytʼasipxañapawa, kunattix yaqhip chiqanakanxa jaqinakaruw operapxi.)
1) ¿Kunatsa yaqhip doctoranakax wasitat wila uchayasiñ tuqit parlakipasipki? 2) Kunjamsa wila jan uchasax wali chʼama operacionanak lurapxi ukanakat kims arstʼma. 3) ¿Qhawqha doctoranakasa (médicos, cirujanos) jan wil uchasax usutanakar qullapxaspa? ¿Kunatsa ukham amtapxpacha? 4) ¿Wil uchayasiñ tuqitxa kunsa walja hospitalanakan yatxatawayapxi? 5) ¿Wila uchayasisax kuna jan waltʼäwinakansa uñjasipxaspa? 6) Jan wil uchayasisa yaqha yanaptʼanakampi qullayasiñ tuqitxa, ¿walja yatxattʼatatanakax kamsapxisa? 7) ¿Kunatsa anemiax utji? ¿Qhawqha hemoglobinankamas mä anemian jaqix aguantaskaspa? ¿Kunampis yaptʼasispa? 8) Usut jaqin wilapan glóbulos rojos satäkis ukax jilxattañapatakixa, ¿kunjamsa yanaptʼasispa? 9) Mä jaqir operasiski ukhaxa, ¿kunjamanakatsa wil jan ina chʼusar wartañatakix yanaptʼasispa? 10) Mä wali usuntat wawar jan ukax jiwañampiski uka jaqiruxa, ¿jan wilampix qullasiskarakikispati? 11) Usutanakar wali suma uñjañataki ukhamarak sum qullañatakixa, ¿doctoranakax kunjamsa uñjapxañapa? 12) Cristianonakjamaxa, ¿kunatsa wali wakisirixa jan wil uchayasisa sum qullayasiñataki nayraqat qillqtʼasipxañasaxa? ¿kunjamatsa uk lursna?
Kunjam yanaptʼäwinaktix aka videon uñjawayktan ukaxa sapa maynitäxiwa, maynitakix askïskiti janicha ukxa sapa mayniwa Bibliat yatiqataparjamax chuymapat amtxañapa. ¿Kunjamsa jan wil uchayasisax qullayasïta ukhamaraki wil jan ina chʼusar wartañatakixa kuna yanaptʼanaksa katuqäta uk sumti amuyxta? ¿Ukat wawanakamax kunjamsa qullayasipxani? Uka tuqinakat wali suma qhanañchtʼata qillqatanakax akanakawa: “Preguntas de los lectores” La Atalaya 15 de junio de 2004; “Preguntas de los lectores” La Atalaya 15 de octubre de 2000; ukhamaraki Nuestro Ministerio del Reino de noviembre de 2006 uka taypinkki uka qillqata, ukasti akham satawa: “¿Qué opino de las fracciones sanguíneas y de los procedimientos médicos que impliquen el uso de mi sangre?”. Chiqpachansa, arxatirinakamasa (representantes) ukhamaraki familiamat Jehová Diosar jan luqtapkchi uka familiamasa wila tuqit amtatanakamxa yatipxañapawa.