Jesusan jiwäwip amtañatakix suma wakichtʼatäpxañäni
Jesusan arkirinakapjamaxa, wali kusiskaña ukat wali askipuniw Pʼiqtʼirisana jiwäwip amtañatak wakichasiñaxa (Luc. 22:19). ¿Kuna wakiskirinakas uka arumatak waktʼayañax wakisi?
◼ Kawkhankanisa ukat kuna horasarünisa. Kawkhansa Jesusan jiwäwip amtañatak tantachasiñäni ukat kuna horasarünisa ukxa taqiniw yatipxañapa. Ukatakix horasapar puriñax wali wakiskiriwa ukat janiw uka lugarat mäki waljanit mistuñax askïkaspati, inas walja tamanak uka tantachasiñ utan uka arumax tantachasipxchini, ukatwa tiempox jan utjkaspati. Tantachasiñ Utar mantañäki ukhansa autonak saytʼayañäki ukhansa janiw waljan qutunaqtañasäkiti.
◼ Invitacionanaka. ¿Taqinit invitacionanak katuqxapxi ukat liytʼxapxarakiti? ¿Kunjamsa uka invitación jaytäta uk yatiqxtati? ¿Khitirus jaytäta? Uka invitacionanak taqinir jaytañatakiw chʼamachasiñama.
◼ Yanaptʼaraksnawa. Uka tantachäwir sarañ munirinakarusa jilat kullakanakarusa, autot irpsna jan ukax yaqha tuqitsa yanaptʼaraksnawa. ¿Jupanakar yanaptʼañatakix kunsa amtawayapxta?
◼ Tʼantʼampi vinompi. Janïr Inti jalantkipanxa tʼantʼampi vinompxa tantachäwinkirinakarux janiw pastʼayapxañapäkiti, ukwa irpir chuymaninakax sum uñjapxañapa. Mä ajllit jilata jan ukax kullakatï usutäsin jan uka tantachäwir sarirjamäkchixa tʼantʼampi vinompxa aparapipxañapawa. Yäparu waktʼayatäki uka tʼantʼampi vinompwa wakichtʼapxäta (ukatakixa La Atalaya del 15 de febrero de 2003, 14, 15 jananaka, 14, 17 tʼaqanaka qillqatarjamaw waktʼayapxañama).
◼ Tantachasiñ Uta. Tiempompiw Tantachasiñ Utxa sum qʼumachtʼapxañama ukatxa platosa, copasa, mesasa, mantelasa suma wakichtʼatäñapawa. Uka tantachäwix yaqha lugaran apasini ukhaxa, arstʼäwi taqinin suma ukat qhana istʼapxañapatakiw parlantenak sum wakichtʼapxañama. Khitinakas katuqtʼasipkani ukat tʼantʼampi vinompi pastʼayasipkani ukanakxa tiempompiw ajlltʼapxäta, sum irnaqtʼapxañapatakisa cristianjam isthaptʼat sarapxañapatakisa iwxtʼapxañamarakiwa.
Jesusan jiwäwip maran mä kuti amtañax jiwasatak wali wakiskiripuniwa ukatwa sapa maynisa tampachas suma wakichtʼatäpxañasa. Jehová Diosax Jesusan jiwäwip tuqi jachʼa munasiñap jiwasar uñachtʼayatapat wali yuspärasir chuymamp uñjañäni ukhaxa, Diosan bendicionapax jiwasatakix utjapuniniwa.