Jehová Diosar sapür jachʼañchapxañäni
1. ¿Kun lurañatakis Diosan luqtirinakapax wal chʼamachastanxa, ukat kunatsa?
1 David reyix “sapüruw jachʼañchäma [...,] wiñaya[taki]” sasaw Jehová Diosarux säna (Sal. 145:2, 7, 21). Uka kikparakiw jiwasax Jehová Diosar walja churäwinakapat sapüru jachʼañcharaktanxa (Sal. 37:10; 145:14, 18; 2 Ped. 3:13).
2. ¿Kunjamatsa utasan Jehová Diosar sapüru jachʼañchsna?
2 Utana. Bibliat apstʼat walja qillqatanakaw utjistu, ukanakaw Examinando las Escrituras diariamente sat qillqatat yatxatañataki, Diosar Familpach Yupaychañataki ukhamarak tantachäwinakataki wakichtʼasiñsa wal yanaptʼistu. Walja familianakaw urun may kutikis familjam manqtʼasiñatak tiemp apstʼasiñ yatipxi, ukhamat sum parltʼasiñataki ukat Jehová Diosar jachʼañchañataki. Chiqas awk taykanakaw wawanakapampi parltʼasiñatakix tiempo apstʼasipxañapa, ukhamatwa “chiqapar yatichasina sum uywap[xani], Tatitur iyawsapxañapataki” (Efe. 6:4; Deu. 6:5-7).
3. ¿Jilat kullakanakasampïktan ukhax kunsa lurtanxa?
3 Jilat kullakanakampi. Kunapachatï yatiyir mistktan ukat tantachäwinakar sarktan ukhaxa, jilat kullakanakasamp chikaw Jehová Diosar jachʼañchtanxa (Pro. 15:30; Fili. 4:8; Heb. 13:15). Chiqas Jehová Diosan munasiñapaw mayachistu, ukhamax uka suma khuyapayasiñapat Diosar yuspäratas uñachtʼayañatakix parlatanakasax wali sumäñapawa (Sal. 106:1).
4. ¿Kunjamanakatsa Jehová Diosar jachʼañchsna?
4 Yaqha jaqinakampi. Awisax inas utat uta sapür yatiyir sarañatak tiempox jan utjkchistuti, ukampis yaqha jaqinakan chuymapar purtʼsnawa, masinakasaru, irnaqäwisana ukat khitinakampitï jikisktan ukanakarux Jehová Diosata ukhamarak amtanakapat yatiysnawa (Sal. 27:14; 1 Ped. 3:15). Mä kullakax avionat sarkasaxa mä warmiruw Diosan Arupat yatiyatayna; ukat uka warmix wali kusisitaw jikxatasïna, jukʼampi yatxatañ munasaxa, kunjamatsa parltʼasipkakispa ukatakiw direccionap kullakarux yatiyäna. Chiqas akapachax kunayman jan waltʼäwinakampiw sapürutjam aynachtʼaski, ukampis Jehová Diosan Qhanañchirinakapaxa “suma kusiskañ yatiyäwinak” istʼañ munirinakar yatiyasipki. Jaqinakax suma suytʼäwi utjatap yatiqapxi ukatwa Jehová Diosar jachʼañchañ amtapxi (Isa. 52:7; Rom. 15:11).
5. ¿Kunatsa Jehová Diosar jachʼañchañ muntanxa, ukat uk lurasax kunsa jikxatsna?
5 Luqtirinakapan sapür jachʼañchapxatapatxa, ¡Jehová Diosax wali kusisitaw jikxataspacha! Diosan luratanakapax sapüruw Diosar jachʼañchi, jiwasax ukhamarakiw utankkasasa jilat kullakanakasampisa ukat yaqha jaqinakar yatichkasasa Jehová Diosar jachʼañcharaktanxa (Sal. 19:1-4).