Chachanakar Diosan Arupat yatiyañax wali wakiskiripuniwa
1. ¿Tamanakan nayrar sum sarantañapatakix kunas jankʼak munasi?
1 Aka qhipa urunakanxa, Diosan Apnaqäwipat yatiyäwix jukʼampiw jilxattaski ukat nayrar sarayañatakix walja chachanakaw munasi (Mar. 4:30-32; Hech. 20:28; 1 Tim. 3:1-13). Chiqas chachanakat sipansa warminakaw Diosan Apnaqäwipat awisax jilpach istʼañ yatipxi. Yaqhip chiqanakanxa, chachanakax warminakarukiw Bibliat yatichañataki ukat Dios tuqit wawanakapar yatichañapatak jaytañ yatipxi. Chachanakan Jehová Diosar sum uñtʼapxañapax wali wakiskirïtap amuyasipxañapatakisa ukat jiwasamp chika Jehová Diosar yupaychapxañapatakisa, ¿kun lurañas wakisispa?
2. Pablompi Pedrompix chachanakar yatiyapkän ukhaxa, ¿kuna askinaks jikxatapxäna?
2 Thaqhañasawa. Kunapachatï mä chachax Bibliat yatiqañ qallti ukhaxa, taqpach familiapaw yatiqañ amtapxaraki. Amtañäni, Pablompi Silasampix cárcel uñjir mä chacharuw yatiyapxäna. Ukhamatwa uka chachax taqpach familiapampi bautisasipxäna (Hech. 16:25-34). Kunapachatï Pablox Corinto markan yatiykäna ukhaxa, “Sinagogan Crispo sat jilïripasti familiapamppachaw Tatiturux iyawsxana” (Hech. 18:8). Ukat Jehová Diosax capitán Cornelior yatiyañapatakiw Pedrorux khitäna, uka chachasti “Dios chuyma jaqïnwa, ukhamarkiw Diosar axsartʼas sarnaqirïna”. Qhipatxa, Corneliox parientenakapampi ukat munat amigonakapamp kunaw bautisasipxäna (Hech. 10:1-48).
3. ¿Felipjamax kawkïr ‘autoridadanakarus’ Diosan arunakapat yatiyarakisma?
3 Kawkïr chachanakatix ‘autoridadäpki’ ukanakar yatiyañax wali askiwa kunattix wali aski luräwinakaw utjaspa (1 Tim. 2:1, 2). Mä angelan arupar istʼasaxa, Felipex mä eunucoruw jikxatäna, uka jaqix “mä jilïrit uttʼayatarakïnwa”, ukat Etiopía markankïr reinan qullqi katuripänwa. Felipex “Isaías profetan librop [jachʼat] leeskir” istʼäna, ukat Jesusan suma yatichäwinakapatwa amuytʼayäna. Etiopía markankir jaqix Jesusan arkiripar tukusax markapar kuttʼasaw yaqhanakar suma arunak yatiyarakpachäna. Reinaru ukat khitinakatï ukan irnaqapki ukanakar inas yatiyarakchïna, ukhamatwa jupanakax Diosan suma arunakap istʼapxarakpachäna (Hech. 8:26-39).
4. ¿Kunjamatsa chachanakar Diosan arunakapat yatiysna?
4 Kawkinsa ukat kunjams jikxatsna. Chachanakax urunwa jilpach irnaqapxi, ¿ukhamax jaypʼunaka, sábado, domingo jan ukax feriado urunakan yatiyir sarañatakix tiempo apstʼasismati? Utat uta sarasax janiw waljanimp parlktanti kunattix janiw utapankapkiti, ukampis kawkhantï qhatunakax utjki uka chiqanakan yatiyañäni ukhaxa, jukʼampwa chachanakar jikxatañäni. Jilatanakax irnaqäwinakapan yatiyañatakiw chʼamachasipxaspa. Kawkhantï sapa kuti yatiyktan ukhanakan utat uta yatiykasaxa ‘utankki uka chachamp parltʼiristti’ sasaw jilatanakax jisktʼapxarakispa.
5. ¿Bibliat wal yatiqañ munir chachar mä kullakax jikxataspa ukhax kuns lurañapa?
5 Kunapachatï mä kullakax Bibliat jukʼamp yatxatañ munir chachar jikxatkani ukhax janiw sapak wasitat kuttʼañapäkiti. Jan ukasti chachapampiw kuttʼañapa, jan chachanïkchi ukhax yaqha jilatampi jan ukax kullakampiw kuttʼañapa. Uka chachatï jukʼamp yatiqañ munani ukhax yatxattʼat mä jilataw yatichir sarañapa.
6. ¿Kunjamsa “walja jaqinakar jikxatañ layku” apóstol Pablot yatiqassna?
6 ¿Kuna tuqitsa yatxatañ munaspa? Apóstol Pablox “walja jaqinakar jikxatañ layku[x]” kunayman tuqinakatwa yatichäna (1 Cor. 9:19-23). Jiwasax ukham lurañasarakiwa, chachanakax kuna tuqinakatsa yatxatañ munapxaspa ukarjam wakichasiñasawa. Amuytʼañäni, inas qullqi tuqit llakitächi, familiapan sum jakasiñapat llakisirakchi jan ukax mä suma gobierno utjañap munchi. Ukat inas akham jisktʼasirakchi ¿kunats jaktanxa? ¿Aka Uraqix kunarus purtʼasini? Ukat ¿kunatsa Diosax aka jan waltʼäwinak utjayaskakpacha?, sasa. Jiwasatï Diosan Apnaqäwipat parlkasax ukham jisktʼanakat parlañäni ukhax istʼapxistaniwa (Pro. 16:23).
7. Kullakanakan Diosar jan yupaychiri chachanakapax Tantachasiñ Utaru jutapki ukhaxa, ¿kunsa jilat kullakanakax lurapxañapa?
7 ¿Mä kullakan Diosar jan yupaychiri chachaparux kunjams yanaptʼsna? Kullakanakax chachanakapan Diosar iyawsapxañapatakiw sum sarnaqañatak chʼamachasipxi, ukat jilat kullakanakax yanaptʼapxarakiwa (1 Ped. 3:1-4). Jïsa, kunapachatï Tantachasiñ Utar jutapki ukhax wali sum katuqtʼañäni ukhaxa Diosar luqtañax wali sumätap uñachtʼayañäni. Ukat tantachäwinakar jutapki ukhax Diosan arunakap yatiqañ munapxatap uñachtʼayapxi, ukat inas Bibliat jukʼamp yatiqañ munapxchini.
8. ¿Kawkïr chachanakatï Diosat mä jukʼsa yatxatañ munapki ukanakarux kunjamsa jilatanakax yanaptʼapxaspa?
8 Maysa tuqitxa, yaqhip chachanakax janiw jankʼaki Bibliat yatxatañ munapkiti, ukampis kunapachatï yaqha jilatanakamp sum uñtʼasxapxi ukhax inas jukʼat jukʼata Bibliat yatiqañ munapchispa. Mä tamanxa mä familiaw utjäna, uka familianxa chachax janiw Jehová Diosar yupaychirïkänti, ukat kuna tuqitxay parlañ muñchïna uka tuqit parlañatakiw jilatanakax utapar awisax sarapxäna. Ukham sapa kuti parlkasax Bibliat parlañwa qalltapxäna, jichhax uka chachax bautisatäxiwa. Yaqha chachat parltʼarakiñäni, uka chachax taqinimp parltʼasir suma jaqïnwa mä urux utapan uyuchañwa mä jilatax jupar yanaptʼatayna. Ukham lurasax Bibliat parlañwa qalltxapxäna (Gál. 6:10; Fili. 2:4). Jilatanaka, ¿Jehová Diosar jan yupaychirïpki uka chachanakar yanaptʼsnati?
9. ¿Jilatanakar wakichtan ukhax kuns jikxattanxa?
9 Tama sum irpapxañapatakiw wakichañasa. Jïsa kawkïr chachanakatix Diosan arunakap sum yatiqapki ukanakax taman Jehová Diosar luqtañatakiw wakichasi, jupanakax ‘churäwir uñtat jaqinakäpxiwa’, mä arunxa kunanaktï lurañ yatipki ukanakampix irpir chuymaninakjamaw tamanakar yanaptʼapxi (Efe. 4:8; Sal. 68:18). Jupanakax wali munasiñampi ukat taqi chuymaw uwijanakar awatipxañapa (1 Ped. 5:2, 3). ¡Jupanakax taqi jilat kullakanakatakix mä jachʼa bendicionäpxaspawa!
10. Ananiyasamp yanaptʼatäsaxa, ¿kunjamsa Pablox walja jaqinakar yanaptʼawayi?
10 Saulox cristianonakar arknaqir jaqïnwa, ukat kunapachatï apostoläxäna ukhaxa, “jan judiöpkis ukanakar khita[tänwa]” (Rom. 11:13). Kunapachatï Tatitux Saulo sutini jaqir jankʼaki thaqir saram sasin Ananiasar säna ukhax janiw jupax yatiyir sarañ munkänti. Ukampis qhipat saränwa, ukat Saulox Jesusan arkiripäxänwa, qhipatxa apóstol Pabloxänwa. Ukat marat mararuw waranq waranqa jaqinakar Pablox Diosan arunakap yatichasa yanaptʼäna. Jichhürunakanxa cartanakapat yatiqaskaktanwa ukampis uka cartanakax Diosan amuytʼayatarakiwa (Hech. 9:3-19; 2 Tim. 3:16, 17).
11. ¿Kunatsa chachanakar yatiyañatak kunayman tuqit chʼamachtʼasiñasäspa?
11 Ukhamax chachanakar yatiyañatak kunayman tuqit chʼamachtʼasipxañäni. Ukham lurañäni ukhax Jehová Diosan bendicionap katuqañäni, kunattix Jupan munañapwa lurañ muntanxa ukat kuna lurañanaktï katuqtan ukanak sum uñjañwa munaraktanxa.