¿Yatiyañatakix wakichtʼatäpachatti?
1. ¿Kunatsa yatiyañatakix janis yatxattʼatäksna ukham jan amuyasiñasäki?
1 Awisax ukham jisktʼasirïsta ukhaxa, ¡jan llakisimti! Diosan Arupat sum yatiyañatakixa, janiw suma yatxattʼatäñasa ni taqi kun suma lurtʼirïñas wakiskapuniti. Amtañäni, Jesusan yaqhip arkirinakaparux ‘jan suma yatichat jaqinaka’ sasaw sapxirïna, ukampis suma yatiyäwinakxa wali sumwa yatiyapxäna. ¿Kunatsa? Kunattix Jesusat yatiqasiñwa taqi chuym amtapxäna (Hech. 4:13; 1 Ped. 2:21).
2. Kunjamsa Jesusax yatichirïna uk mä qhawqha qhanañchtʼam.
2 Kunjamsa Jesusax yatichäna. Taqinins amuytʼkaya, qhana ukat jakäwitakis wali aski ukhamwa Jesusax yatichirïna. Janiw chʼama arunakampix parlañ qalltkänti, jisktʼanakapasa uñachtʼäwinakapasa jaqinakan chuymaparupuniw purtʼirïna (Mat. 6:26). Ukat jaqinakatsa khuyaptʼayasirakïnwa (Mat. 14:14). Ukhamarusa, Jehová Diosax jupar yanaptʼaskatap yatisax taqi chuyma jan axsarasaw yatiyäna, kunattix Diosaw yatiyañapatakix khitanïna (Luc. 4:18).
3. ¿Sum yatiyañasatakix kunjamsa Jehová Diosax yanaptʼistu?
3 Jehová Diosaw yanaptʼistu. Suma yatiyäwinak taqinir sum yatiyañatakixa, Jehová Diosaw Suma Yatichirisjamax Arup tuqi ukhamarak markap tuqi yatichistu (Isa. 54:13). Kunjamsa Jesusax yatichäna ukwa Jehová Diosax jiwasan askisataki qillqayawayi, ukhamat yatiqañasataki ukat ukarjam lurañasataki. Qullan ajayupwa churistu, ukat tantachäwinakansa yaticharakistu (Juan 14:26). Ukat sum yatiyañasatakix yatiyañ tuqit yatxattʼat jilat kullakanakampiw yanaptʼarakistu.
4. Suma yatiyäwinak yatiyañatakix suma wakichtʼatätanwa, ¿kunatsa ukham sissna?
4 Ukhamasti, yatiyañatakix janis yatxatatäksna ukham janiw amuyasiñasäkiti, kunattix Diosaw yatiyañasatakix sum yatichistu (2 Cor. 3:5). Jehová Diosarutï atinisiñäni ukat kuntï Jupax sum yatiyañasataki yanaptʼanak churkistu ukanakampi yanapayasiñäni ukhaxa, ‘wali yatiñanïñaniwa ukat taqi kasta suma luräwinakatak suma wakichatäpxarakiñaniwa’ (2 Tim. 3:17).