Yatichkasax sum amuytʼayañasawa
1. Yatiykasaxa, ¿kunas Diosan Arup sum apnaqañatakix munasi?
1 Apóstol Pabljam suma yatichirinakaxa, ‘chiqa aru yäpar apnaqañatakix’ janiw Qullan Qillqatanakatak aytapkiti, ukxa jupanakax sum amuyasipxi (2 Timoteo 2:15, MT). ¿Kunjamatsa Bibliat yatiqirinakarux sum amuytʼaysna? (Hech. 28:23.)
2. ¿Kunjamatsa istʼirinakasarux Diosan Arupar respetomp uñjapxañapatak yanaptʼsna?
2 Bibliatpun liytʼarapiñasa. Nayraqataxa, Bibliampiw amuytʼayañasa, ukhamatwa Bibliax Diosan yatiñkankañ arunakanïtap amuyapxani ukat respetapxarakini. Diosan Arupar taqi chuyma atinisitasaw istʼirinakarux Bibliat liytʼkañäni ukhax sum istʼapxañapatakix yanaptʼani (Heb. 4:12). “Kunsa Diosax aka tuqit amuyi uk yatiñaw nayarux wal yanaptʼawayitu. Bibliax kamsis uka tuqit uk uñxatʼañäni” sasaw saraksna. Yatiykasaxa Bibliat liytʼañatakipuniw chʼamachtʼasipxañasa.
3. Bibliat liytʼasinxa, ¿kunsa istʼirinakasax sum amuytʼapxañapatakix lursna?
3 Payïrinsti, Biblia liytʼasax jiskʼa tʼaqanakapat sum qhanañchtʼañasa. Waljaniw kuntï liytʼarapktan ukxa jan ukspach amuyapkiti. Kuna tuqitti parlktan ukarux kunjamsa uka jiskʼa tʼaqax yanaptʼi uk sum amuytʼapxañapatakix qhanañchtʼañaw wakisi (Luc. 24:26, 27). Kunatï qhanstayasiñapäki uk sum qhanstayañasaraki. Ukat kuntï parlktan uk amuyaskit janich uk yatiñatakix jisktʼañasarakiwa (Pro. 20:5; Hech. 8:30).
4. ¿Istʼirinakar sum amuytʼayañatakixa kunamp lurañas wakisi?
4 Bibliampiw amuytʼayañasa. Kimsïrinsti, istʼirinakan amuyuparu ukat chuymapar purtʼañatakiw chʼamachasiñasa. Kunjams uka jiskʼa tʼaqax jakäwipan yanaptʼaspa uk amuytʼañapatakiw yanaptʼañasa. Bibliampitï qhanañchtʼañänixa inas amuytʼaysna ukat Diosan kamachinakaparjam sarnaqxarakchispa (Hech. 17:2-4; 19:8). Amuytʼañataki, Salmo 83:18, (NM) liytʼxasaxa, kunatsa maynimp sum apasiñatakisa ukat taqi kunatakis maynin sutip yatiñax wali wakiskirix uk qhanañchtʼañasawa. Ukatsti akham sasaw jisktʼaraksna: “¿Mayisïwinakaman Diosan sutip aytañax janit mayisïwinakamarux jukʼamp sumaptaykaspa?” sasa. Biblian uka jiskʼa tʼaqapax kunjamsa uka jaqin jakäwipan yanaptʼaspa uk amuytʼayasinxa, Diosan Arupax wali suma iwxtʼanakanïtapwa amuyasini. Qullan Qillqatanakat ukham sum amuytʼayañawa suma chuyman jaqinakarux jakkiri ukat chiqpach Diosar jakʼachasipxañapatakix yanaptʼi (Jer. 10:10).