Yatiyañatakix paciencianïñasaw wakisi
1. ¿Kunjamsa Jehová Diosax paciencianïtap jaqinakar uñachtʼayi?
1 Jehová Diosax jaqinakamp sum apasiñatakix wali paciencianiwa (Éxo. 34:6; Sal. 106:41-45; 2 Ped. 3:9). Ukham wali paciencianïtapxa, Reinopat Uraqpachan yatiyasiski uka tuqnamwa uñachtʼayi. Jehová Diosaxa niya 2.000 maranakaw markapar mantapxañapatak jaqinakar apaniski (Juan 6:44). ¿Yatiykasinxa kunjamsa jiwasax Jehová Diosjam paciencianïtas uñachtʼaysna?
2. ¿Kunjamsa yatiyir sarasin paciencianïtas uñachtʼaytanxa?
2 Utat utat yatiykasa. Khitinakatï Bibliat janïr yatiqañ munapki ukanakar jan qarjtas yatiyir sarasaw Jehová Diosjam paciencianïtas uñachtʼaytanxa (Hech. 5:42). Yatiyir sarktan ukhaxa, janis istʼañ munapkchistu, larusipkchistusa ukat awisax tʼaqhisiyatasa, arknaqatas uñjaskstanxa, pacienciampiw aguanttanxa (Mar. 13:12, 13). Utat ut sarasin janis Bibliat yatiqañ munirinakar jikxatkstanxa, Diosan arunakap yatiyañatak chʼamachasisaw paciencianïtas uñachtʼayaraktanxa.
3. Bibliat yatiqañ munapki jupanakan ukar kuttʼasasa ukat Bibliat yatichkasasa, ¿kunatsa paciencianïñax wakisi?
3 Bibliat yatiqirinaka. Yapu yapuchañax pacienciatakiwa. Kuna qullanakampis uchsna ukhasa, janiw jankʼak jiltayksnati (Sant. 5:7, MT). Diosar yupaychañ tuqit jiltañaxa niya ukhamarakiwa (Mar. 4:28). Biblian yatichäwinakaparjamax kunatï jan walïki uka costumbrenak apanukuñax inas Bibliat yatiqirinakatakix chʼamächispa. Ukanak jankʼaki apanukupxañapatakix janiw sint waytʼañasäkiti; antisasa pacienciampiw suytʼañasa, ukat Diosan qullan ajayupawa ukanak apanukuñ yanaptʼaskani (1 Cor. 3:6, 7).
4. ¿Kunjamatsa paciencianïñax Diosar jan yupaychir familiaranakasar yatiyañatak yanaptʼistaspa?
4 Diosar jan yupaychir familiaranaka. Jupanakax Biblian chiqa yatichäwinakap yatiqañaps wal munkstanxa, pacienciampiw kunapachas iyawsäwisat parlsna uk suytʼtanxa, ukat parlañ horasax purini ukhaxa, walja yatichäwinakamp jan qarjayañatakiw chʼamachastanxa (Ecl. 3:1, 7). Ukañkamaxa suma sarnaqatasampiw yatiytanxa, ukat Biblian yatichäwinakap yatiqatasa respetompi pacienciampi yatiyañatak wakichtʼatäñatakiw chʼamachasiraktanxa (1 Ped. 3:1, 15). Yatiyasinsa, yatichkasinsa paciencianiñäni ukhaxa, suma yatichiriñäniwa ukat Jehová Diosarus kusisiyarakiñäniwa.