Khuyaptʼayasirïpxañäni
1. ¿Kunsa jaqinakax jichhürunakan thaqhapxi?
1 Kuna jan waltʼäwinakatï Uraqpachan pasaski ukanak uñjasaxa, jaqinakax llakimp aynachtʼata ukat jan suytʼäwini ukhamanwa jikxatasipxi. Ukatwa yanaptʼayasiñ wal thaqapxi, janipuniw nayrax ukham yanap thaqhapxirïkänti. Millón millón jaqinakax yanaptʼa munapxatapxa sumwa chiqpach cristianonakax yattanxa ukat jiwasarakiw jupanakar khuyaptʼayañasa (Mat. 22:39; Gál. 6:10). Kunjamsa jaqi masisar taqi chuyma khuyaptʼayasiñ uñachtʼaysna uk jichhax uñjañäni.
2. ¿Kunjamatsa jaqi masisat khuyaptʼayasitas uñachtʼaysna?
2 Khuyaptʼayasiñatwa yatiyasiski. Chiqpach chuymachtʼäwxa Diosakiw churistu (2 Cor. 1:3, 4). Jehová Diosaxa, wali khuyaptʼayasiriwa ukatwa “khuyapayasipxarakim” sasin iwxtʼistu, ukat Jupaw Apnaqäwipat jaqi masisar yatiyañasatak khitistu (1 Ped. 3:8). Uka Apnaqäwit yatiyasakiw ‘llaktʼatanakarux chuymachtʼsna’, kunattix Diosan Apnaqäwipakiw taqi tʼaqhisiñanak chhaqtayani (Isa. 61:1). Yupaychirinakapat khuyaptʼayasisawa Jehová Diosax jan waltʼäwinak niy tukjani ukat mä machaq uraq uttʼayani (2 Ped. 3:13).
3. ¿Kunjamsa Jesusjam jaqi masisar uñjsna?
3 Kunjamtï Jesusax jaqinakar uñjkäna ukham uñjapxarakiñäni. Jesusax walja jaqinak nayraqatans yatiykchïnxa, sapa mayniruw wali askit uñjäna. Kunjamsa sapa maynix Diosamp sum apasipxaspa uk sum yatïna ukatwa pacienciamp yatichäna, kunattix jan awatirin uwijanakjam uñjasinwa jaqinakat khuyaptʼayasïna (Mar. 6:34). Uka tuqitï Jesusat yatiqasiñäni ukhaxa, chiqpach khuyaptʼayasiñwa uñachtʼayañäni, ukax uñnaqtʼasana ukat arunakasanwa amuyasini. Ukhamarusa, jakäwisanxa yatiyañaw nayrankani ukat istʼapkistu jupanakatakjamaw parltʼarakiñäni (1 Cor. 9:19-23).
4. ¿Kunatsa ‘khuyapayasirïñasa’?
4 Taqi chuyma khuyaptʼayasisin yatiyir saratasatwa waranq waranqa jaqinakax Uraqpachan Diosan arunakapat yatiqasin ukarjam sarnaqxapxi. ‘Khuyapayasirïñäni’ ukhaxa, khuyaptʼayasir Jehová Diosaruw jachʼañchañäni ukat kusisiyarakiñäni (Col. 3:12).