Awisajj yatiyir sarañatakejj thaqhañaw wakisispa
1. Kawkhanakantï kunayman arunak parlapki ukawjanakajja, ¿kunatsa sapa tamarojj kuna aruttï parlapki ukarjam territoriojj churasi?
1 Pentecostés 33 maranjja, Jesucriston arkirinakapajj qollan ajay katoqasajj “yaqha arunak parlaña qalltapjjäna” ukan kunayman markanakat jutapkäna ukanakaruw parlapjjäna (Hech. 2:4). Ukham parlapjjatapatjja, 3.000 jaqenakaw bautisasipjjäna. Ukar saririnakatjja, inas waljanejj hebreo jan ukajj griego arunak parlapjjarakchïna. Ukampis Jehová Diosajj Reinop toqet suma yatiyäwinakjja, kuna artï jupanakajj parlapki uka pachpa arupat istʼapjjañapwa munäna. Cheqansa, pachpa arupat yatiyatajj wali sum jaqenakajj istʼañ yatipjje. Ukatwa kawkhanakantï kunayman arunakat jaqenakajj parlañ yatipki ukawjanakajja, kuna aruttï tamanakajj parlañ yatipki ukarjamaw territoriojj churasi (Organizados sat libro, 107 jana, 1, 2 tʼaqanakap uñjjattʼäta). Anqäjj markat jutiri yaqha aru parlir gruponakarojj janiw mä territoriojj churaskiti, jan ukasti kawkhanakantï uka arunak parlirejj utjki ukawjanakaruw yatiyir sarapjje, katoqer taman territorionakapan yatiyapjje ukat uka jakʼankir yaqha territorionakansa.
2. 1) ¿Kunjamsa yaqha arunak parlirinakarojj thaqsna ukat kawkhanakansa ukajj wakisispa? 2) Yaqha arunak parlirinakar jikjjatañatakejj ¿kunjamatsa tamanakajj yanaptʼasipjjaspa? 3) Yatiykasin yaqha aru parlirir jikjjatsna ukat Bibliat yatjjatañsa wal munarakispa ukhajja, ¿kun lurañasas wakisispa?
2 Kawkhantï mä sapa aruk parlapki uka cheqanakanjja, yatiyirinakajj mä khuskatwa Diosan Arupat yatiyapjje. Ukampis kunayman kasta arunak parlapki uka markankir tamanakajja, yaqha aru parlir tamanakampiw pachpa territorion yatiyapjjarakispa. Jupanakatï yaqha aru parlir jaqenak jikjjatapjjani ukhajja, kamsatasa, kawkhans jakasi, taqe ukanak qellqaqtʼapjjaspa, ukhamat uka arut yatiyir jilat kullakanakajj visittʼapjjañapataki; ukampis uka arut parlir tamaruw jan ukajj gruporuw uka lurañapajj jukʼampis waktʼi. (“Maynit maynikam yanaptʼasipjjañäni” siski uka cheq uñjjattʼäta.) Ukhamasti, uka aru parlir tamanakawa jan ukajj gruponakaw censo lurañapajj jan ukajj sum qellqaqtʼapjjañapajj wakisini. Jichhajj uka toqenakat mä qhawqha yanaptʼanak uñjañäni.
3. ¿Qhawqha tiempos censojj lurasiñapa uk kunjamatsa yatsna? ¿Kawkhantï yatiyaski ukhanakanjja, mä kipkakti yatiyañasa?
3 Kunjamsa yaqha aru parlirinakar thaqsna. Yaqha aru parlirinakar thaqhañatakejja, kawkhanjjay yatiyaskstan ukarjamaw tiempojj munasini. Sañäni ¿qhawqhanis uka aru parlirinakajj utji? ¿Qhawqha yatiyirinakas taman jan ukajj grupon utji? ¿Qhawqha direccionanakas yatiyasiñapatakejj uttjje? Janiw taqe cheqan kipka thaqhañajj wakiskaniti, jan ukasti kawkhanakantï uka arunak parlirinakajj walj utjki ukawjanakanwa jukʼampejj thaqhasini. Ukat yaqhawjanakar sarapjjarakispawa, janiw sinti jayanakar sarapjjañapäkiti. Ukampisa, yaqha arunak thaqher sarañatakejj wali suma waktʼayatäñapawa, ukhamatwa uka arunak parlirinakarojj walj jikjjatapjjaspa, ukhamat Jehová Diosan sutip jachʼañchapjjañapataki (Rom. 10:13, 14).
4. 1) ¿Kunjamsa waktʼayasiñapa thaqhañatakejja? 2) Kunjamanakatsa yaqha aru parlirinakar thaqhasispa uka toqet qhanañchtʼma.
4 Jan mayamp mayampi thaqhañatak kuttʼasiskañapatakejja, irpir chuymaninakaw wakichtʼañapa ukat jukʼampis yatiyañ toqet irpir chuyman jilataw thaqhañatak sum waktʼayañapa (1 Cor. 9:26). Kunapachatï anqäjj markat yaqha arut parlir mä grupo utjani ukhajja, katoqer tamankir irpir chuyman jilatanakaw yanaptʼarakispa, ukat kawkïr irpir chuyman jilatas jan ukajj irpir chuymanin yanapiripas uka grupo sarayaspa uksa uttʼayarakispawa. Ukat walja tamanakanjja jan ukajj gruponakanjja, kunjamsa yaqha aru parlirinakar thaqhasispa ukjja yatipjjarakiwa. Inas Internet toqnam jan ukajj uñtʼat sutinak toqes directorio utjki ukan thaqhas uka aru parlirinakar jikjjatapjjchi. Ukjjarusti telefononakaparuw jawstʼapjje jan ukajj visittʼiriw sarapjje, ukhamatwa khitinakas cheqapun uka aru parlañ yatipjje uk territorio listapar uchañataki. Ukat katoqtʼir tamankir irpir chuymaninakatï uka grupor yanaptʼañajj wakisispaw sasin amtapjjchi ukhajja, awisajj tamjamajj thaqhañ yanaptʼañatakejj waktʼayapjjarakispawa (“Kun lurañasas yaqha aru parlir jaqenakar jikjjatañatakejja” siski uka cheq uñjjattʼäta).
5. 1) Khitinakatï censo lurasipki ukanakajj ¿kuns amtapjjañapa? 2) ¿Kamsnas jaqenakarojja?
5 Janïr mä suma amtäwir purkasajja, janiw censo lurañajj wakiskiti. Ukatjja, censo lurir sarañatakejj kunjamtï Diosan Arunakap yatiyirejj sarktan ukham isthaptʼataw sarañasa, kunattejj uk lurañajj Diosar loqtañamp sasirakiwa. Ukat kunjams jaqenakar parlsna uk yatsuñasa ukat pachpa arupat parlañasa waljaniruw kusisita yatiyañatak ukat uka aru sum yatjjatañatakis yanaptʼawayi. Yaqha aru parlir thaqkasajj qhawqha tiempos lurtan ukajj jakhusispawa, ukampis thaqher sarañatak mapanaka wakichktan ukat qellqtʼasiñatak lista wakichktan ukanakajj janiw jakhusiñapäkiti. Ukat thaqktan uka aru paliriru jikjjatañäni ukhajja, Diosan Arupat parltʼañasapuniwa. Utanejj istʼkchistanis janisa, jankʼakiw yatiyañ toqet irpir chuyman jilatar jan ukajj khititï uka toqet sarayaski uka jilatar yatiyañasa, ukhamat territorio listapar sum qellqtʼjjañapataki. Cheqansa, censo lurañajj wali wakiskirikchisa, ukampis Diosan Arupat kunayman toqet yatiyañjja janiw armañasäkiti (“Censo lurkasinjja kamsañasasa” siski uka cheq uñjjattʼäta).
6. Oqaranakar thaqkasajja, ¿kuna chʼama luräwinakansa uñjassna?
6 Kunjams oqaranakar thaqsna. Uka luräwejj cheqans chʼamäspawa ukampis wal chʼamachtʼasiñasawa ukat janiw qariñasäkarakiti. Yaqha aru parlapki ukanakarojj isisitapatsa, parlatapatsa ukat sutipatsa amuyañjamawa, ukampis oqaranakarojj janiw amuyañjamäkiti. Ukat familiaranakapasa, amigonakapasa jupanakatjj jarkʼasipjjarakiwa, ukatwa Diosan Arunakap yatiyirinakarojj jan kuns avisañ munapkaspati. Jichhajj uka toqet yanaptʼanak uñjkañäni ukajj oqaranakar ukat yaqha aru parlirinakar jikjjatañatakiw yanaptʼistani.
7. 1) Oqar jaqenakar thaqkasajja, ¿kun jisktʼasiñasasa? 2) ¿Jiwasanakat jan wal jan amuyaskañapatakejj kunas yanaptʼistani?
7 Amparamp parlir tamanakas ukat gruponakas kawkhantï yatiyasipki, ukawjanakan jakapki ukanakaruw oqaranakajj utjit janicha uk jisktʼapjje. Inas mä vecinopas jan ukajj irnaqer masipas, yateqañ utankir masipasa amparamp parlañ yatchi jan ukajj familiarapat oqarajj utjarakchi. Inas auto apnaqerinakar avisañatakejj oqar wawanakaw utji sasin mä letrerojj utjchi uka toqetsa yatiyarakistaspawa. Ukampis ukham jisktʼatajj inas maynejj mayj amuychispa. Ukat maynitï munasiñampi, respetompi, qhana arumpi ukat jukʼa arunakampik parltʼani ukhajja, jaqenakajj janiw kuna jan walsa amuyapkaspati. Yaqhepanakajja, Biblia toqet apstʼat DVD jan ukajj yaqha ukhamanakamp uñachtʼayasa ukat kuna suytʼawis oqaranakatakejj utji uka toqet Bibliamp qhanañchtʼasajja wali askinak jikjjatapjjatayna. Utanitï jan kuns avisañ munkätamjja, tantachäwir jutañapatakiw mä invitación jaytaniwayasma ukhamat kawkïr oqararutï uñtʼki ukar churañapataki.
8. ¿Kunjamatsa amparamp parlir tamanakarojj yaqha tamanakajj yanaptʼapjjaspa?
8 Kawkhantï walja jaqenakajj utjki ukhanakan censo lurañatakejja, amparamp parlir tamajja, maranjj maya jan ukajj pä kutiw yaqha tamar yanaptʼa mayispa. Yatiyir mistuñataki tantachäw apaskani ukhajja, amparamp parlir tamankki uka jilataw sarayaspa, ukat kunjamsa lurasispa ukajja mä demostracionampiw uñachtʼayasirakispa. Ukat autot sarañatak grupojj tʼaqjjtani ukhajja, sapa grupon amparamp parlir mä yatiyirejj utjañapapuniwa, ukhamat kawkhans censo lurapjjani uk sum mapampi thaqhapjjañapataki.
9. Kawkhanakantï oqaranakajj jilapart qamarapki ukawjanakan sutipsa uka kawkhans jakasipjje uk yatjjatañatakejj ¿kun lurañas wakisispa?
9 Ukat kawkhanakarutï oqaranakajj kusistʼiri, tantachtʼasiri, jan ukajj kuna yanaptʼa katoqasiris sarapki uka cheqanakaruw visittʼir sararaksna. Kawkharutï Diosan Arup yatiyir sarktan ukarjamaw isthaptʼasiñasa. Taqpachaniru parljjayañat sipansa maynimpi jan ukajj paninimpikiw parltʼsna. Ukat jukʼamp yatjjatañ munapjjani ukhajja, sutimsa yatiyarakismawa ukat kawkhans jakasipjje, kuna sutinisa uksa mayiraksnawa.
10. ¿Kunjamsa negocionakan oqaranakarojj thaqhasispa?
10 Yaqha toqetjja, qhatunakan kunapachas visittʼasispa ukatakejj mapanak lurañaw wakisirakispa. Inas mä maparojj kawkhantï gasolinanak aljapki ukanak qellqtʼaschispa, ukat isinak tʼajjsupki, manqʼanak aljapki, qorpachasiñ utanakas utjki jan ukajj yaqha ukhamanakatakisa yaqha mapanakwa waktʼayaraksna. Ukat sapa kasta negocionakataki mapajj waktʼayasini ukhajja, yatiyirinakajj wali suma yatsutapjjani ukat yatichtʼäwipas chuymar purtʼkirirakiniwa. Sañäni, qorpachir utan katoqtʼirirojj mä jukʼa qhanañchtʼasajja, inas tantachäwir jutapjjañapatak invitacionsa ukat DVD jaytaraksna, ukhamat khiti oqaranakatï ukar qorpachaskani ukar churañapataki. Yaqhep negocionakanjja, inas mä irnaqericha jan ukajj alasiricha amparamp parlir utji sasin jisktʼañajj wakischispa. Ukat kawkhantï yatiyasktan ukhan inas oqaranakatak yateqañ utajj utjchi, ukawjarus Bibliat apstʼat DVD bibliotecapatak jaytaraksnawa.
11. Diosan Arupat yatiykasajja, ¿kunatsa censo lurañajj wali wakiskirejja?
11 Wali wakiskir luräwi. Yaqha arunak parlir jaqenakar thaqhañajj cheqans chʼamäspawa. Ukampisa, yaqhep aru parlirinakajj janiw mä cheqanak jakapkiti, ukatwa qhawqhanipunis utji uk yatiñajj jukʼamp chʼamaraki. Ukampisa, sapurutjam walja cheqanakan ukham jaqenakar thaqhasajj Diosar loqtasipki. Jehová Diosaw jaqenakar yatiyañasatakejj uka luräw jaytistu, ukat Jupatakejj taqe jaqes mayakiwa (Hech. 10:34). “Jupajj taqenin qhespiyatäñapwa muni, kunatejj cheqäki uk uñtʼapjjañaparaki” (1 Tim. 2:3, 4). Ukhamajja, Jehová Diosaru ukat jilat kullakanakar taqe kasta aru parlirinakar ukat ‘taqe chuymampi Diosan arup istʼapki, ukhamarak katoqapki’ ukanakar thaqhañ yanaptʼapjjañäni (Luc. 8:15).
[5 janan recuadropa]
Maynit maynikam yanaptʼasipjjañäni
Tamatï jan ukajj grupotï uka pachpa arupat parlirinakar thaqhañatak yanaptʼayasiñ munapchi ukhajja, yatiyañ toqet irpir chuyman jilataw yaqha aru parlir tamanakan irpir chuyman jilatanakampi parltʼañapa. Ukampisa, kawkïr tamanakatï uka jakʼanakankchi jan ukajj territotoriopan kuna aru parlirtï thaqhasktan ukanakajj wal utjchi ukanakaruw yanaptʼa mayispa. Ukat yanaptʼañatak ajllit tamajja, tamapankir jilat kullakanakaruw yatiyjjañapa, yatiykasajj yaqha aru parliriru jikjjatani ukhajja, kawkhansa jakasi, kuna arutsa parli ukwa qellqaqtʼañapa ukat yatiyañ toqet irpir chuyman jilataruw churjjañapa, ukhamat kawkïr tamatï jan ukajj grupotï uka aru thaqapki ukar churjjañapataki. Yatiyañ toqet irpir chuyman jilatanakawa, kawkhanakantï kunayman aru parlir jaqenakajj utjki ukhanakan kunjamsa sum yatiyasispa ukat kawkïr tamasa jan ukajj gruposa uka arunak parliriru yanaptʼaspa uka toqenakat amuykiptʼjjapjjaspa.
Yaqha toqetjja, wal yatjjatʼañ muniriru jeqjjatäta ukat yaqha aru parlarakchi (jan ukajj oqarächi) ukhajja, jankʼakiw Sírvase visitar (S-43) sat formularior qellqantañama ukat tamankir secretario jilataruw churjjañama. Ukhamatwa jankʼaki uka jaqenakarojj ajay toqet yanaptʼasini (km 5/11, 3 jana uñjjattʼäta).
[6 janan recuadropa]
Kun lurañasas yaqha aru parlir jaqenakar jikjjatañatakejja
• Yaqha jaqenakar jisktʼañasawa, sañäni: Bibliat yateqerinakaru, familiaranakaru, irnaqtʼir masinakaru.
• Kuna aru parlirtï thaqktan ukjja, directorio telefónico sat libronwa jikjjatsna. Ukat yaqha ukham yanaptʼanakas utjarakiwa, ukanwa sutinakapsa, kawkhans jakasipjje uk jikjjatsna ukat Internet toqnamas jikjjataraksnawa.
• Kawkhanakantï jilapart walja jaqenakajj utjkejja, sañäni: bibliotecanakansa, marka apnaqerinakan oficinanakapansa ukat yateqañ utanakansa, wali amuyumpiw jisktʼaraksna.
• Ukat periodicon inas kuna aru parlirtï thaqktan ukanakan luräwinakapat yatiyasiskchi uks thaqtaraksnawa.
• Kawkïr negociorusa ukat alasirisa kuna aru parlirtï thaqktan ukanakajj sarapjje ukarus visittʼaraksnawa.
• Qhatunakansa, yateqañ jachʼa utanakansa jan ukajj auto suyañanakansa, permiso mayisin Diosan Arupat apstʼat qellqatanakwa mä mesa patjjar uchtʼaraksna. Ukampis kawkhanakantï uka aru parlirinakajj jila utjki ukhanakana.
• Jaqenakan sutinakapajj uñstki uka directorio alañasa jan ukajj Internetan thaqhañatak mä programa alañatak jan ukajj pagañatak markaman leyenakaparjamajj walikiskchi ukhajja, alasirakispawa jan ukajj pagasirakispawa.
[7 janan recuadropa]
Censo lurkasinjja kamsañasasa
Jaqenakarojj munasiñampi, qhana arumpi parltʼañäni ukhajja, janiw jiwasanakat kuna jan wals amuyapkaniti. Ukat kuna artï parlki uka arut qellqatanak uñachtʼayañajja wali askirakiwa.
Arunttʼasajja akham sarakismawa: “Khitinakatï ______ aru parlapki ukanakaruw kuna suytʼäwtï Bibliajj churki ukanak qhanañchtʼañatak thaqhasipkta. ¿Uñtʼtati ukham aru parlirinakarojja?” sasa.
Oqaranakar thaqkasajj akham sarakismawa: “Kamisaraki. Mä video uñachtʼayañ munsma ¿tiemponismati? [DVD uñtʼañatak mä apnaqañ jiskʼa maquinatwa amparam parlirinakatak Bibliat apstʼat mä jiskʼa tʼaqap uñachtʼayäta.] Aka jiskʼa tʼaqajja Bibliat apstʼatawa, amparamp parlirinakataki. Walja ukham videonakaniptwa ukat inakirakiw churasi ukhamat oqaranakajj Diosat yateqapjjañapataki. Jumajj ¿oqaranakaru jan ukajj jan sum istʼapki ukat amparamp parlañ yatipjjaraki ukanakar uñtʼtati?” sasa. Utanitï jan khitits amtkchi ukhajja, irnaqäwinsa, yateqañ utansa jan ukajj uta jakʼanakansa inas ukhanakan oqaranakar uñjirïsta sasaw amtayaraksna.